Surat : ક્રાઈમ બ્રાંચના કર્મીના નામે ખોટી ઓળખ આપી નાણાં ઉઘરાવતા યુવકને પોલીસે ઝડપ્યો

સુરત ક્રાઈમ બ્રાંચના પોલીસ કર્મચારીની ખોટી ઓળખ આપી તેમજ પોલીસ વિભાગ દ્વારા ચા ની કેબીન આપવામાં આવશે તેવી વાત કરી 3500 રૂપિયાની માંગણી કરતા એક વ્યક્તિને સચિન પોલીસે ઝડપી પાડ્યો છે. આ આરોપી પાસેથી પોલીસે એક બાઈક, મોબાઈલ અને રોકડા રૂપિયા 86590 મળી કુલ 1.23 લાખની મત્તા કબજે કરી હતી. આ ઘટનાની વિગત મુજબ સુરતના સચિન પોલીસનો સ્ટાફ પેટ્રોલિંગમાં હતો તે દરમ્યાન બાતમી મળી હતી કે એક ઇસમ સચિન હાજીવાળા પાસે ચા ની દુકાન પર બાઈક પર બેઠો છે અને પોતાનું નામ અંકિત ભાઈ ક્રાઈમ બ્રાંચના પોલીસ વાળા હોવાનું જણાવે છે અને પોલીસ વિભાગ દ્વારા ચા ની કેબીન આપવામાં આવશે તેવી વાત કહી 3500 રૂપિયા માંગ્યા છે. માહિતીના આધારે સચિન પોલીસનો કાફલો ઘટના સ્થળે દોડી આવ્યો હતો અને યુવકની પૂછપરછ કરી હતી

પોલીસ વિભાગના કર્મચારી તરીકેની ખોટી ઓળખ આપનારની ધરપકડ કરી

સચિન પોલીસે તેની પાસે આઈકાર્ડ માંગતા તેણે આઈકાર્ડ બનાવવાનું બાકી છે તેમ કહ્યું હતું જેથી પોલીસને શંકા જતા તેની કડક પૂછપરછ કરી હતી. પોલીસની કડક પૂછપરછમાં તેણે પોતાનું નામ મોહમંદ ઇલ્યાસ બાંગી જણાવ્યું હતું અને તે પોલીસમાં નોકરી કરતો ના હોવાનું કબુલ્યું હતું. અને પોતાને પોલીસમાં નોકરી કરવાનો શોખ હોય તે પોલીસ જેવું ખાખી પેન્ટ, બેલ્ટ તેમજ બાઈકમાં ડંડો લગાવી ફરતો હતો. આ ઉપરાંત પોલીસ જેવા વાળ પર કટ કરાવ્યા હતા.પોલીસે તેની પાસેથી રોકડા રૂપિયા 86590, એક બાઈક અને મોબાઈલ ફોન મળી કુલ 1.23 લાખની મત્તા કબજે કરી હતી. આમ સચિન પોલીસે પોતે પોલીસ વિભાગના કર્મચારી તરીકેની ખોટી ઓળખ આપનારની ધરપકડ કરી છે અને આ મામલે ઊંડાણ પૂર્વક તપાસ હાથ ધરી છે. આરોપીએ આવી રીતે કોઈ પાસેથી રૂપિયા પડાવ્યા છે કે કેમ તે મામલે પણ પોલીસે ઊંડાણ પૂર્વક તપાસ કરી છે.