શાહરુખ ખાન

શાહરૂખ ખાનને એસઆરકેના નામથી પણ ઓળખવામાં આવે છે, તે એક ભારતીય એક્ટર અને ફિલ્મ નિર્માતા છે. તેને ‘બોલિવુડનો બાદશાહ’ અને ‘કિંગ ખાન’ તરીકે પણ ઓળખવામાં આવે છે. શાહરુખ 90થી વધુ ફિલ્મોમાં જોવા મળ્યો છે અને ફિલ્મફેર સહિત અનેક એવોર્ડ મળ્યા છે.

57 વર્ષની ઉંમરે શાહરૂખ ખાન આજના યુવા સ્ટાર્સને ટક્કર આપી રહ્યો છે. છેલ્લી કેટલીક ફિલ્મો ફ્લોપ થયા બાદ શાહરૂખે પઠાણ સાથે બોક્સ ઓફિસ પર ધૂમ મચાવી હતી. શાહરૂખે રોમેન્ટિક ઈમેજને તોડીને જે એક્શન હીરોનો રસ્તો અપનાવ્યો છે, તેને લોકો પસંદ કરી રહ્યા છે. પઠાણ અને જવાન બંને ફિલ્મોમાં શાહરૂખ ખાનની જબરદસ્ત એક્શન જોવા મળી હતી, જેને ફેન્સે પસંદ કરી હતી અને તેની બંને ફિલ્મોએ મોટી કમાણી કરી હતી.

સતત બે ફિલ્મો બ્લોકબસ્ટર સાબિત થયા બાદ શાહરૂખ ફરી એકવાર બોક્સ ઓફિસ પર ધૂમ મચાવવા માટે તૈયાર છે. પઠાણ અને જવાન બંને ફિલ્મો શાહરૂખ ખાનના કરિયરની સૌથી મોટી હિટ ફિલ્મ છે હવે જો ડંકી પણ હિટ થશે તો શાહરુખ હેટ્રિક કરશે.

શાહરૂખ ખાન પોતાની ફિલ્મ જવાનની સુપરહિટ બાદ હવે ડંકી લઈને આવી રહ્યો છે, આ ફિલ્મ આ વર્ષે ક્રિસમસના અવસર પર રિલીઝ થઈ રહી છે. શાહરૂખ ખાન માટે આ વર્ષ 2023 ખૂબ જ ખાસ રહ્યું છે. પઠાણ ફિલ્મથી શરુ થયેલો શાહરુખ ખાનનો ક્રેઝ જવાન સુધી યથાવત રહ્યો.