T20 વર્લ્ડ કપ

ICC મેન્સ T20 વર્લ્ડ કપ, જે અગાઉ ICC વર્લ્ડ T20 તરીકે ઓળખાતો હતો, ક્રિકેટના T20 ઇન્ટરનેશનલ ફોર્મેટની સૌથી મહત્વપૂર્ણ ટુર્નામેન્ટ છે. આ ટુર્નામેન્ટનું આયોજન ઇન્ટરનેશનલ ક્રિકેટ કાઉન્સિલ (ICC) દ્વારા કરવામાં આવે છે. T20 વર્લ્ડ કપની શરૂઆત વર્ષ 2007માં થઈ હતી અને ટૂંકા સમયગાળામાં આ ફોર્મેટે વિશ્વભરમાં અદ્ભુત લોકપ્રિયતા મેળવી છે.

સામાન્ય રીતે આ ટુર્નામેન્ટ દર બે વર્ષે યોજાય છે, જોકે શેડ્યુલ અને વૈશ્વિક પરિસ્થિતિઓને કારણે કેટલીક આવૃત્તિઓમાં ફેરફાર કરવામાં આવ્યો છે. 2020ની આવૃત્તિ COVID-19 મહામારીના કારણે મુલતવી રાખીને 2021માં યોજવામાં આવી હતી.

અત્યાર સુધીમાં 6 ટીમોએ T20 વર્લ્ડ કપનો ખિતાબ જીત્યો છે. ભારત (2007, 2024), વેસ્ટ ઈન્ડિઝ (2012, 2016) અને ઇંગ્લેન્ડ (2010, 2022) બે-બે વખત ચેમ્પિયન બન્યા છે. જ્યારે પાકિસ્તાન (2009), શ્રીલંકા (2014) અને ઓસ્ટ્રેલિયા (2021) એક-એક વખત વિજેતા બન્યા છે.

ઝડપી રમત, રોમાંચક મેચો અને યુવા ખેલાડીઓને તક આપવાના કારણે T20 વર્લ્ડ કપ ક્રિકેટને નવી ઊંચાઈએ લઇ ગયું છે. 2026 માં 10 મો T20 વર્લ્ડ કપ રમાઈ રહ્યો છે, જેમાં કુલ 20 ટીમો ભાગ લઈ રહી છે. T20 વર્લ્ડ કપ 2026 નું આયોજન ભારત અને શ્રીલંકામાં થઇ રહ્યું છે.