અનુષ્કા શર્મા

અનુષ્કા શર્મા બોલિવુડ ફિલ્મ ઈન્ડસ્ટ્રીની ટોપ એક્ટ્રેસ છે. ઉત્તર પ્રદેશના અયોધ્યામાં જન્મેલી અનુષ્કા શર્માને 2007માં ફેશન ડિઝાઈનર વેન્ડેલ રોડ્રિક્સ માટે મોડલ તરીકે પહેલો બ્રેક મળ્યો અને મોડેલિંગમાં કારકિર્દી બનાવવા મુંબઈ આવી અને યશરાજ ફિલ્મ્સમાં સફળ ઓડિશન પછી અનુષ્કાએ પ્રોડક્શન હાઉસ સાથે ત્રણ ફિલ્મનો કરાર કર્યો. અનુષ્કાએ 2008માં રિલીઝ થયેલી હિન્દી ફિલ્મ ‘રબ ને બના દી જોડી’થી એક્ટિંગ કરિયરની શરુઆત કરી હતી. આ ફિલ્મ બાદ તે ‘બેન્ડ બાજા બારાત’માં જોવા મળી હતી.

અનુષ્કા શર્માનો જન્મ અયોધ્યામાં થયો હતો પરંતુ તેમના માતા-પિતા ઉત્તરાખંડના ગઢવાલના છે. તેના પિતા કર્નલ અજય કુમાર શર્મા આર્મી ઓફિસર છે અને માતા આશિમા શર્મા હાઉસ વાઈફ છે. તેનો મોટા ભાઈ કર્ણેશ શર્મા જે અગાઉ રાજ્ય કક્ષાનો ક્રિકેટર હતો તે હવે મર્ચન્ટ નેવીમાં સેવા આપી રહ્યો છે. અનુષ્કાએ આર્મી સ્કૂલમાં અભ્યાસ કર્યો હતો અને માઉન્ટ કાર્મેલ કોલેજ, બેંગ્લોરમાંથી આર્ટ્સમાં ડિગ્રી મેળવી છે. અનુષ્કા શર્માએ 11 ડિસેમ્બર 2017 ના રોજ ફેમસ ક્રિકેટર વિરાટ કોહલી સાથે લગ્ન કર્યા હતા.

અનુષ્કા શર્માના વર્ક ફ્રન્ટની વાત કરીએ તો તેની ડેબ્યૂ ફિલ્મ પછી એક્ટ્રેસે વર્ષ 2010માં ‘બેન્ડ બાજા બારાત’, વર્ષ 2012માં ‘જબ તક હૈ જાન’, વર્ષ 2014માં ‘પીકે’, વર્ષ 2016માં ‘એ દિલ હૈ મુશ્કિલ’ અને ‘સુલતાન’, વર્ષ 2018માં ‘સંજુ’ સહિત અનેક હિટ ફિલ્મોમાં કામ કર્યું છે. હવે એક્ટ્રેસ અનુષ્કા શર્મા ઝુલન ગોસ્વામીની બાયોપિક ‘ચકદા એક્સપ્રેસ’માં જોવા મળશે.