‘ભૂલ થઈ ગઈ…’ સલમાનને ધમકી આપનારે માંગી માફી, કહ્યું હતું- બાબા સિદ્દીકી કરતા પણ ખરાબ હાલત કરીશ
મુંબઈ પોલીસના ટ્રાફિક કંટ્રોલ રૂમે તે યુવકની ઓળખ કરી છે, જેણે વોટ્સએપ પર બાબા સિદ્દીકી કરતા પણ ખરાબ હાલત કરવાની ધમકી સલમાન ખાનને આપી હતી. ઝારખંડમાં રહેતા આ યુવકે ફરી એકવાર મુંબઈ પોલીસના ટ્રાફિક કંટ્રોલ રૂમને મેસેજ મોકલીને માફી માંગી છે. જો કે તેની ધરપકડ કરવા માટે મુંબઈ પોલીસની ટીમ ઝારખંડ પહોંચી ગઈ છે.
મુંબઈમાં NCP નેતા બાબા સિદ્દીકીની હત્યા બાદ બોલિવૂડ એક્ટર સલમાન ખાનને ધમકી આપનાર વ્યક્તિ હોશમાં આવી ગયો હોય તેમ છે. આ વ્યક્તિએ ફરી એકવાર મુંબઈ પોલીસ ટ્રાફિક કંટ્રોલ રૂમના વોટ્સએપ નંબર પર મેસેજ મોકલીને માફી માંગી છે. કહ્યું કે તેણે ભૂલ કરી છે. એવું પણ કહ્યું છે કે તે સમયે પણ આવું જ વાતાવરણ હતું, તેથી તેણે લાગણીમાં આવીને ધમકીભર્યો મેસેજ મોકલ્યો હતો. જ્યારે, હવે મુંબઈ પોલીસે આરોપીના મોબાઈલ નંબરને ટ્રેસ કરીને તેનું લોકેશન શોધી કાઢ્યું છે. આ લોકેશન ઝારખંડનું છે.
આવી સ્થિતિમાં આરોપીને પકડવા માટે મુંબઈ પોલીસની એક ટીમ ઝારખંડમાં દરોડા પાડી રહી છે. અત્રે ઉલ્લેખનીય છે કે બાબા સિદ્દીકીની હત્યા બાદ મુંબઈ પોલીસના ટ્રાફિક કંટ્રોલ રૂમના વોટ્સએપ નંબર પર એક મેસેજ આવ્યો હતો. મેસેજ મોકલનાર લોરેન્સ બિશ્નોઈ ગેંગની નજીક હોવાનો દાવો કર્યો છે. તેણે પોતાના સંદેશમાં લખ્યું હતું કે આને કોઈએ હળવાશથી ના લેવું જોઈએ. બાબા સિદ્દીકી કરતા પણ ખરાબ હાલતમાં હશે સલમાન ખાન. આ સાથે આરોપીએ એમ પણ લખ્યું હતું કે, તે મામલો પતાવી શકે છે, પરંતુ આ માટે સલમાન ખાને 5 કરોડ રૂપિયા ચૂકવવા પડશે.
ઝારખંડમાં આરોપીનું લોકેશન મળ્યું
આ મેસેજ જોઈને મુંબઈ પોલીસમાં ખળભળાટ મચી ગયો હતો. પોલીસે ઝડપથી આરોપીનો મોબાઈલ નંબર સર્વેલન્સ પર મૂક્યો અને તેનું જીપીએસ ચેક કર્યું. આ મોબાઈલ નંબર ઝારખંડનો હોવાનું અને સતત એક્ટિવ હોવાનું સામે આવ્યું હતું. આરોપીનું ચોક્કસ લોકેશન મળ્યા બાદ, મુંબઈ પોલીસે આરોપીને પકડવા માટે એક ટીમ ઝારખંડ મોકલી હતી. દરમિયાન, એક અઠવાડિયામાં આરોપીનો બીજો મેસેજ મુંબઈ પોલીસના ટ્રાફિક કંટ્રોલ રૂમના વોટ્સએપ નંબર પર આવ્યો છે. જેમાં તેણે અગાઉ ધમકી ભર્યા મેસેજ અંગે માફી માગી છે.
સલમાન-લોરેન્સ વચ્ચે જૂની દુશ્મની
પોતાના મેસેજમાં આરોપીએ માફી માંગી છે અને લખ્યું છે કે તેણે ભૂલ કરી છે. તે સમયે આવું વાતાવરણ પ્રવર્તતું હતું, તેથી તેણે ધમકીભર્યો મેસેજ લખ્યો હતો, પરંતુ હવે તેને પોતાની ભૂલનો અહેસાસ થયો છે. ઉલ્લેખનીય છે કે ગેંગસ્ટર લોરેન્સ બિશ્નોઈની બોલિવૂડ એક્ટર સલમાન ખાન સાથે જૂની દુશ્મની છે. 26 વર્ષ પહેલા સલમાન ખાને જોધપુરમાં કાળા હરણનો શિકાર કર્યો હતો. જેના વિરોધમાં લોરેન્સ બિશ્નોઈએ 2012માં સલમાનને મારી નાખવાના સોગંદ લીધા હતા તેમ કહેવાય છે.
