તુર્કિયે

તુર્કિયે, જે સત્તાવાર રીતે ‘તુર્કિ પ્રજાસત્તાક’ તરીકે ઓળખાય છે. તે મુખ્યત્વે પશ્ચિમ એશિયાના એનાટોલીયા ક્ષેત્રમાં સ્થિત એક દેશ છે, જેનો એક નાનો ભાગ દક્ષિણપૂર્વ યુરોપમાં પૂર્વ થ્રેસ તરીકે ઓળખાય છે. તેની ઉત્તરમાં કાળો સમુદ્ર, પૂર્વમાં જ્યોર્જિયા, આર્મેનિયા, અઝરબૈજાન અને ઈરાન, દક્ષિણમાં ઇરાક, સીરિયા અને ભૂમધ્ય સમુદ્ર અને પશ્ચિમમાં એજિયન સમુદ્ર, ગ્રીસ અને બલ્ગેરિયા આવેલા છે. તુર્કીની વસ્તી 85 મિલિયનથી વધુ છે. અહીંના મોટાભાગના લોકો તુર્કી સમુદાયના છે, જ્યારે કુર્દ લોકો સૌથી મોટો વંશીય લઘુમતી સમુદાય છે.

સત્તાવાર રીતે તુર્કિ એક ધર્મનિરપેક્ષ રાષ્ટ્ર અને મુસ્લિમ બહુમતી ધરાવતો દેશ છે. અંકારા તુર્કિનું પાટનગર અને બીજું સૌથી મોટું શહેર છે, જ્યારે ઇસ્તંબુલ તેનું સૌથી મોટું શહેર અને મહત્વપૂર્ણ આર્થિક અને નાણાકીય કેન્દ્ર છે. તુર્કિના અન્ય મુખ્ય શહેરોમાં ઇઝમીર, અંતાલ્યા અને બુર્સાનો સમાવેશ થાય છે. અહીંની ભાષા ટર્કિશ છે.

‘રિપબ્લિક ઓફ ટર્કિ’ ની સ્થાપના ‘મુસ્તફા કમાલ અતાતુર્ક’ દ્વારા 1923 માં કરવામાં આવી હતી. તુર્કીમાં પહેલી ચૂંટણી 1950 માં યોજાઈ હતી. જેમાં ‘ડેમોક્રેટ પાર્ટી’ ની જીત બાદ, ‘અદનાન મેન્ડેરેસ’ એ દેશના વડા પ્રધાન પદ સંભાળ્યું. તેમણે દેશની અર્થવ્યવસ્થા સુધારવા માટે ઘણું કામ કર્યું.