ક્રિકેટ

ક્રિકેટ એ વિશ્વની સૌથી લોકપ્રિય રમતોમાંની એક છે. આ રમત ત્રણ ફોર્મેટમાં રમાય છે, જેમાંથી સૌથી લાંબુ ફોર્મેટ ટેસ્ટ ક્રિકેટ છે. જે પાંચ દિવસ સુધી ચાલે છે. આ પછી ODI ક્રિકેટ છે જે 50 ઓવર પ્રતિ ઇનિંગ્સની છે. જ્યારે આંતરરાષ્ટ્રીય મંચ પર, સૌથી ટૂંકું ફોર્મેટ T20 ક્રિકેટ છે. જે 20 ઓવર પ્રતિ ઇનિંગ્સ છે.

ત્રણેય ફોર્મેટની પોતપોતાની વર્લ્ડ ચેમ્પિયનશિપ છે. આઈસીસીએ 2019થી વર્લ્ડ ટેસ્ટ ચેમ્પિયનશિપ શરૂ કરી હતી. આ અંતર્ગત, આઈસીસી રેન્કિંગની ટોપ-10 ટીમો બે વર્ષ સુધી અલગ-અલગ શ્રેણી રમે છે અને આ ચેમ્પિયનશિપના પોઈન્ટ ટેબલમાં ટોચ પર રહેનારી બે ટીમો ફાઈનલ રમશે.

ભારત અત્યાર સુધી બંને ટેસ્ટ ચેમ્પિયનશિપની ફાઈનલ રમ્યું છે. પરંતુ બંનેમાં હાર્યું છે. પ્રથમ ફાઈનલમાં ભારતને ન્યુઝીલેન્ડે હરાવ્યું હતું જ્યારે બીજી ફાઇનલમાં ટીમ ઈન્ડિયાને ઓસ્ટ્રેલિયાએ હરાવ્યું હતું. ઓડીઆઈ વર્લ્ડ કપ 1975 થી રમાઈ રહ્યો છે અને દર ચાર વર્ષે યોજાય છે.

તેની સૌથી સફળ ટીમ ઓસ્ટ્રેલિયા છે. ઓસ્ટ્રેલિયા છ વખત આ ખિતાબ જીતી ચૂક્યું છે. તાજેતરમાં જ ઓસ્ટ્રેલિયાએ ફાઇનલમાં ભારતને હરાવીને છઠ્ઠી વખત ટાઇટલ જીત્યું હતું. ભારત 1983 અને 2011માં બે વખત આ ટુર્નામેન્ટ જીતી ચૂક્યું છે. T20 વર્લ્ડ કપની શરૂઆત વર્ષ 2007માં થઈ હતી.

આ ટુર્નામેન્ટ દર બે વર્ષે રમાય છે. વેસ્ટ ઈન્ડિઝ અને ઈંગ્લેન્ડ બે-બે વખત આ ટુર્નામેન્ટ જીતી ચૂકી છે. ભારતે 2007માં મહેન્દ્ર સિંહ ધોનીની કપ્તાનીમાં આ ટૂર્નામેન્ટ જીતી હતી.