અજય દેવગન

હિન્દી ફિલ્મ ઈન્ડસ્ટ્રીમાં વર્ષોથી કપૂર અને ખાનનો દબદબો હોય, પરંતુ અજય દેવગને ત્રણ દાયકાથી વધુ સમયથી પોતાનું મહત્વનું સ્થાન જાળવી રાખ્યું છે. અજય દેવગને વર્ષ 1991માં ફિલ્મ ફૂલ ઔર કાંટેથી તેના કરિયરની શરૂઆત કરી હતી અને આજે પણ તેની હિટ અને સુપરહિટ ફિલ્મો આપે છે.

54 વર્ષની ઉંમરે પણ અજય દેવગન 25 વર્ષના નવા કલાકારો સાથે સાથે 50ની ઉંમર પાર કરી ચૂકેલા એક્ટર્સને બોક્સ ઓફિસ પર ટક્કર આપે છે. 2 એપ્રિલ 1969ના રોજ દેશની રાજધાની દિલ્હીમાં જન્મેલા અજય દેવગને મુંબઈ જઈને મોટું નામ કમાવ્યું હતું. અજય દેવગને તેની પહેલી ફિલ્મ પછી ક્યારેય પાછું વળીને જોયું નથી. તેના કરિયરમાં તેને દ્રષ્યમ 2, તાન્હાજી: ધ અનસંગ વોરિયર, ગોલમાલ અગેન, સિંઘમ રિટર્ન્સ જેવી ઘણી સુપરહિટ ફિલ્મો કરી.

હિન્દી સિનેમામાં અજય દેવગન કેટલો મોટો સ્ટાર છે તેનો અંદાજ એ વાત પરથી લગાવી શકાય છે કે તેને નવેમ્બર 2023 સુધીમાં 100 કરોડની ક્લબમાં સામેલ થતી નવ ફિલ્મો કરી છે. આ સિવાય તેની ત્રણ ફિલ્મો પણ 200 કરોડના ક્લબમાં સામેલ છે. આવનારા દિવસોમાં અજય દેવગન પાસે ઘણી મોટી ફિલ્મો છે જે બોક્સ ઓફિસ પર મોટા રેકોર્ડ બનાવી શકે છે.