વેસ્ટ ઈન્ડિઝ

વેસ્ટ ઈન્ડિઝ એ ખરેખર કોઈ એક દેશ નહીં પરંતુ 28 કેરેબિયન ટાપુઓના સમૂહમાંથી ક્રિકેટ રમતા 15 દેશો અને પ્રદેશોની સંયુક્ત ટીમ છે.વેસ્ટ ઈન્ડિઝ ક્રિકેટની શરૂઆત 1890ના દાયકામાં થઈ હતી. પ્રવાસી ઈંગ્લેન્ડની ટીમ સામે રમવા માટે વિરોધી ટીમનું એક સંગઠન વેસ્ટ ઈન્ડિઝ ક્રિકેટ બોર્ડ બનાવાયું હતું.
વેસ્ટ ઈન્ડિઝ ક્રિકેટ બોર્ડમાં છ ક્રિકેટ એસોસિએશન છે, જેમાં બાર્બાડોસ, ગુયાના, જમૈકા, ત્રિનિદાદ અને ટોબેગો, લીવર્ડ આઇલેન્ડ્સ અને વિન્ડવર્ડ આઈલેન્ડ્સના બોર્ડ્સનો સમાવેશ થાય છે.1928માં વેસ્ટ ઈન્ડિઝને પ્રથમવાર ટેસ્ટ ક્રિકેટની માન્યતા મળી હતી. તે જ વર્ષથી આ ટીમે આંતરરાષ્ટ્રીય ક્રિકેટમાં પોતાનું મજબૂત સ્થાન બનાવવાનું શરૂ કર્યું અને ક્રિકેટમાં વર્ચસ્વ જમાવ્યું.

વેસ્ટ ઈન્ડિઝ ટીમે પહેલા બે ક્રિકેટ વર્લ્ડ કપ (1975 અને 1979) જીત્યા હતા. વેસ્ટ ઈન્ડિઝ બે T20 વર્લ્ડ કપ (2012 અને 2016) પણ જીત્યું છે. આમ કુલ ચાર વર્લ્ડ કપ વેસ્ટ ઈન્ડિઝ જીત્યું છે. વેસ્ટ ઈન્ડિઝ પાસે પોતાનું રાષ્ટ્રગીત (Anthem) નથી. કારણ કે એ કોઈ દેશ નથી, તેથી તેનું પોતાનું રાષ્ટ્રીય ગીત પણ નથી.વેસ્ટ ઈન્ડિઝનો ધ્વજ એ કોઈ રાષ્ટ્રીય ધ્વજ નહીં પણ ખાસ કરીને ક્રિકેટ ટીમ માટે બનાવાયેલો ધ્વજ છે. આ ધ્વજ ક્રિકેટમાં તેમની ઓળખ છે.