16 ડિસેમ્બરના મહત્વના સમાચાર : રાજ્ય સરકારે ઇમ્પેક્ટ ફીની મુદતમાં કર્યો વધારો, 6 માસની મુદતમાં કર્યો વધારો, ગેરકાયદે બાંધકામો કાયદેસર કરવા માટે ઈમ્પેક્ટ ફી ભરવી જરૂરી

મોરારી બાપુએ ખરાબ રસ્તા મુદ્દે વ્યાસપીઠ પરથી તંત્રને કરી ટકોર

ગામોના અંતરિયાળ રસ્તાની હાલાકી જેણે ભોગવી હોય તે જ ખરાબ રસ્તાનું અસલ દર્દ વર્ણવી શકે. ત્યારે ભાવનગરના તલગાજરડામાં રહેતા પ્રખ્યાત કથાકાર મોરારી બાપુનું રસ્તા મુદ્દે દર્દ છલકાયું. અને વ્યાસપીઠ પરથી તંત્રને ખરાબ રસ્તાઓ મુદ્દે ટકોર કરી. ફરી એકવાર તંત્રએ દેખાડાની કામગીરી કરી અને થયું એમ કે મોરારી બાપુએ આ કામગીરીના વખાણ કર્યા.પણ જરા થોભી જાઓ. જે રસ્તા બન્યા તેની બાપુના મુખે વાહવાહી મેળવતા અધિકારી કેટલા ભ્રષ્ટ છે. તેનું ઉદાહરણ અહીં જોવા મળ્યું છે.

બેંકના ખાતામાંથી રૂપિયા ટ્રાન્સફર કરતી ગેંગના 8 આરોપી ઝડપાયા

દેશભરમાં દિવસે ને દિવસે સાયબર ક્રાઈમના ગુનાઓ વધતા જાય છે. ત્યારે છેલ્લા કેટલાય સમયથી અલગ અલગ રીતે રીતે બેંકના ખાતાઓમાંથી રૂપિયા ટ્રાન્સફર કરી છેતરપિંડી કરતી ગેંગો ઝડપાય છે. આ ગેંગ લોકોના એકાઉન્ટ ભાડેથી રાખીને તેમાં છેતરપિંડીથી મેળવેલા રૂપિયા ટ્રાન્સફર કરીને પોતાનું નેટવર્ક ચલાવતા હોય છે. જૂનાગઢમાં આવા જ કૌભાંડનો પર્દાફાશ થયો છે. સાયબર ક્રાઇમ પોલીસે અમદાવાદના મુખ્ય બે આરોપી તેમજ જૂનાગઢથી પાંચ મળી કુલ 8 આરોપીની ધરપકડ કરવામાં આવી છે.

જૂનાગઢ, ગીર સોમનાથ, પોરબંદર, અમરેલી જિલ્લાના અલગ અલગ બેંકના ખાતાધારકોને લોભામણી લાલચ આપી ભાડે ખાતા રાખી આ ગેંગ છેતરપિંડી આચરતી હતી. બેંક ખાતાઓ મારફત છેતરપિંડી આચરનાર અમદાવાદના બે મુખ્ય આરોપીઓ, જૂનાગઢના પાંચ આરોપીઓને આ છેતરપિંડી આચરવા કમિશન આપતા હોવાનું પણ પોલીસ તપાસમાં ખુલ્યું છે. છેતરપિંડી માટે જૂનાગઢના 200 જેટલા બેંક ખાતાનો ઉપયોગ થયાનું સામે આવ્યું છે..બેંક ખાતામાં કુલ 50 કરોડ 41 લાખના રૂપિયા ટ્રાન્સફર થયાનું સામે આવ્યું છે..ત્યારે ગુજરાત રાજ્ય બહારના અન્ય લોકોની પણ સંડોવણી બહાર આવે તેવી શક્યતા સેવાઈ રહી છે.

મહીસાગરઃ ફરી એક વાર TV9ના અહેવાલનો પડઘો, નાળાની કાર્યવાહી શરૂ

• મહીસાગરઃ ફરી એક વાર TV9 સમાચારની અસર
• ઝેર ઉમરિયા ગામમાં નાળા ધોવાઈ ગયાનો હતો અહેવાલ
• અહેવાલ બાદ હવે તંત્રએ શરૂ કરી કાર્યવાહી
• નાળા પરથી અવરજવર થઈ શકે તેવી વ્યવસ્થા કરાઈ
• માટીકામ કરીને હાલમાં અવરજવર શરૂ કરાઈ
• ગ્રામજનો કરી રહ્યા છે પાકા પુલની માગ

અમદાવાદ: નિકોલ પાસેના ભુવાલડી ગામે હથિયાર સાથે ધીંગાણું

• અમદાવાદ: નિકોલ પાસેના ભુવાલડી ગામે હથિયાર સાથે ધીંગાણું
• જમીનનો કબજોલેવા જતા સમયે ટોળાએ કર્યો હુમલો
• મામલતદારના આદેશ બાદ કબજો લેવા ગયેલા જમીનદાર પર હુમલો
• જે જમીનનો કબજો અપાયો તે ગૌચરની હૌવાનો દાવો
• સમગ્ર મામલો નિકોલ પોલીસ સ્ટેશને પહોંચ્યો

અમદાવાદઃ માંડલમાં હિટ એન્ડ રન, બાઈકસવાર દંપતીનું મોત

• અમદાવાદઃ માંડલમાં હિટ એન્ડ રનની ઘટના
• કારની અડફેટે બાઇકસવાર દંપતીનું મોત
• અકસ્માત બાદ કારચાલક ફરાર
• વરમોર-એસવાડા રોડ પર અકસ્માત

ભાવનગર: મનપામાં વિપક્ષના નેતાની કરાઇ વરણી

• ભાવનગર: મનપામાં વિપક્ષના નેતાની કરાઇ વરણી
• જીતુ સોલંકી બન્યા મનપામાં વિપક્ષના નેતા
• 30 વર્ષથી કોંગ્રેસ સાથે જોડાયેલા છે જીતુ સોલંકી
• વિપક્ષના નેતા માટે કાંતિ ગોહિલ અને જીતુ સોલંકી હતા મેદાને
• અમદાવાદમાં કોંગ્રેસ ભવનમાં ચૂંટણી બાદ લેવાયો નિર્ણય
• બંને નગરસેવકોને 4-4 વોટ મળતા ચિઠ્ઠી ઉછાળી લેવાયો નિર્ણય

કિન્નર બનીને રૂપિયા માગતા યુવકની હત્યાનો ઉકેલાયો ભેદ

મોરબીના અણીયાળી ગામ નજીકથી ચારેક મહિના પહેલા કરવામાં આવેલ યુવકની હત્યાનો ભેદ ઉકેલાયો. પોલીસે હત્યા કરનાર બે આરોપીની ધરપકડ કરી. 4 મહિના અગાઉ અણીયાળીમાંથી સ્ત્રીના કપડા પહેરેલી હાલતમાં રાજસ્થાનના યુવકનો મૃતદેહ મળ્યો હતો. યુવક કિન્નર બનીને રૂપિયા માગતો હતો. ત્યારે રૂપિયા બાબતે બબાલ થતાં હત્યા કર્યાનું સામે આવ્યું છે. મૃતક યુવકની પત્નીએ 4 દિવસ અગાઉ મોરબીમાં પોલીસ ફરિયાદ નોંધાવી હતી. જેને આધારે પોલીસે 2 આરોપીને ઝડપી પાડ્યા.

રાજ્ય સરકારે ઇમ્પેક્ટ ફીની મુદતમાં કર્યો વધારો

• રાજ્ય સરકારે ઇમ્પેક્ટ ફીની મુદતમાં કર્યો વધારો
• સરકારે ઈમ્પેક્ટ ફીની મુદતમાં 6 મહિનાનો વધારો કર્યો
• ગેરકાયદે બાંધકામો ફી ભરીને કાયદેસર કરવા માટે ઈમ્પેક્ટ ફી ભરવી જરૂરી

ગેરકાયદે તેમજ બીયુ વિનાના બાંધકામને તોડીને ઈમ્પેક્ટ ફી ભરીને કાયદેસર કરી શકાય તે માટે બાંધકામો તોડવાને બદલે નિયત ફી વસુલીને કાયદેસર કરવા માટે ઈમ્પેક્ટ ફી કાયદો અમલી બનાવવામાં આવ્યો છે. જેની મુદ્દતમાં સરકારે 6 મહિનાનો વધારો કર્યો છે.

ગોધરા ફુડ એન્ડ ડ્રગ વિભાગની બેદરકારી મામલે tv9ના અહેવાલના પડ્યા પડઘા

• પંચમહાલ: ગોધરા ફૂડ એન્ડ ડ્રગ વિભાગની ગંભીર બેદરકારીનો મામલો
• TV9ના અસરદાર અહેવાલના પડ્યા પડઘા
• TV9ના અહેવાલ બાદ તંત્ર હરકતમાં આવ્યું
• ફેંકી દેવાયેલા સેમ્પલના યોગ્ય નિકાલની કામગીરી હાથ ધરાઈ
• ખાદ્ય સામગ્રીના લીધેલાં સેમ્પલ કચરાપેટીમાં ફેંકી દેવાયા હતા
• પરીક્ષણ બાદ ખાદ્ય સામગ્રીના નમૂનાનો યોગ્ય રીતે કરવાનો હોય છે નિકાલ
• યોગ્ય નિકાલને બદલે કચરાપેટીમાં સેમ્પલ નાંખી દેવાતા ઉઠ્યા હતા સવાલ
• વર્ષ 2024ના ઓગસ્ટ, સપ્ટેમ્બર, ઓક્ટોબર માસમાં લેવાયા હતા સેમ્પલ
• સીલ બંધ બોટલો કચરાપેટીમાં જોવા મળતા TV9એ ઉઠાવ્યા હતા સવાલ

જો કે સમગ્ર મામલે વિવાદ ઉઠતા  ફૂડ એન્ડ ડ્રગ કમિશનરનું નિવેદન પણ સામે આવ્યું છે. તેમનું કહેવું છે કે ગોધરાના ફૂડ એન્ડ ડ્રગ વિભાગ પાસેથી મળતી જાણકારી પ્રમાણે. આ તમામ સેમ્પલ નાશ કરવાના હોઈ તેને અલગથી મૂકવામાં આવ્યા હતા.

પાટણની HNG યુનિવર્સિટીમાં MLA કિરીટ પટેલ અને પોલીસ વચ્ચે ઘર્ષણ

HNGUમાં MLA કિરીટ પટેલ અને પોલીસ વચ્ચે ઘર્ષણ થયું છે. HNGUના દરવાજા બંધ કરી દેતા, MLAએ પોલીસ સાથે ઝપાઝપી કરી હતી. પોલીસે સમર્થકોને અટકાવતા ધારાસભ્યએ દાદાગીરી કરી હોવાનું કહેવામાં આવી રહ્યું છે. પોલીસ કર્મચારીનો કોલર પકડીને MLA કિરીટ પટેલ અપશબ્દો બોલ્યા હોવાનું પોલીસે કહ્યું છે. દાદાગીરી બાદ લાજવાને બદલે ગાજ્યા ધારાસભ્ય. પોલીસે દાદાગીરી કરી એટલે અમે દાદાગીરી કરી તેમ MLA કિરીટ પટેલે જણાવ્યું હતું. પોલીસે કાયદો વ્યવસ્થા જાળવવાને બદલે પોલીસે અમને રોક્યા તેમ પણ કિરીટ પટેલ કહ્યું હતું. MLA કિરીટ પટેલની ભૂખ હડતાળની ચીમકીના પગલે HNGUમાં પોલીસ બંદોબસ્ત વધારાયો છે. રૂસા હોસ્ટેલમાં દારૂની મહેફિલ મામલે પોલીસ ફરિયાદ નહીં નોંધાતા MLAએ વિરોધ કર્યો છે .

સુરતના ઓલપાડમાં ઘર કંકાસથી કંટાળીને કુહાડીના ઘા મારી પત્નીની હત્યા કરીને, પતિએ ઝેરી દવા પીને ઊંચી ટાંકી પરથી કૂદીને કરી આત્મહત્યા

સુરતના ઓલપાડમાં રોજેરોજના ઘર કંકાસથી કંટાળીને પતિએ, પત્નીને કુહાડીના ઘા મારી પતાવી નાખતા  પરિવારનો માળો વિખરાઈ જવા પામ્યો છે. ઓલપાડ ખાતે રહેતા ધનસુખભાઈ કેશવભાઈ રાઠોડે ઘરમાં રોજ થઈ રહેલ કજિયાથી કંટાળી પોતાની પત્ની લક્ષ્મી રાઠોડની હત્યા કરી દીધી હતી. માથામાં કુહાડીના ઘા મારી મોતને ઘાટ ઉતારી દીધી હતી. હત્યા કરી પતિ ધનસુખ ભાગી ગયો અને ગામની સીમમાં જઈ ઝેરી દવા પી ઊંચી પાણીની ટાંકી પરથી કૂદી આપઘાત કરી લીધો હતો. મર્ડર અને આપઘાતની ઘટનાને લઈને ઓલપાડ પોલીસ દોડતી થઇ છે. ઓલપાડ પોલીસે હાલ આગળની કાર્યવાહી હાથ ધરી છે.

વડોદરામાં 31 ડિસેમ્બરને લઈને પોલીસનું આયોજન, 5000 કર્મી રહેશે શહેરના માર્ગો પર

વડોદરામાં 31 ડિસેમ્બરની સંભવિત પાર્ટીને લઈ વડોદરા પોલીસે આયોજન હાથ ધર્યું છે. પોલીસ કમિશનર દ્વારા અધિકારીઓ અને અન્ય એજન્સીઓ સાથે 31 ડિસેમ્બરને લઈને આગોતરુ આયોજન કર્યું છે. શહેરની વિવિધ ચેકપોસ્ટ સહિતની જગ્યાઓએ વિશિષ્ટ સુરક્ષાનું આયોજન કરવામાં આવ્યું છે. બોડી વોર્ન કેમેરા, બ્રીથ એનાલાઈઝર, ટ્રાફિક પોલીસ સહિત 5000 થી વધુ પોલીસ કર્મચારીઓને તૈનાત રાખવામાં આવશે. પાર્ટી પ્લોટ, બેન્કવેટ હોલ કે અન્ય સ્થળોએ યોજાતી પાર્ટી-ફંકશનના આયોજકો સાથે આગામી દિવસોમાં બેઠક યોજવામાં આવશે.

પ્રેમ પ્રકરણમાં અમદાવાદના યુવાનની અસલાલી-બારેજા નજીક કરાઈ હત્યા

અમદાવાદના યુવાનની પ્રેમ પ્રકરણમાં અસલાલી-બારેજા નજીક હત્યા કરાઈ છે. જુહાપુરાના અંબર ટાવર પાસે રહેતા સાકીરખાન પઠાણની બારેજા નજીક આવેલ મુક્તિ પુરાગામ પાસે છરીના ઘા મારીને હત્યા કરાઈ હતી. અસલાલી પોલીસે હત્યાનો ગુનો નોંધી વધુ તપાસ શરૂ કરી છે.

ગાંધીધામ એ ડિવિઝન પોલીસ સ્ટેશન AAP ના કાર્યકરોએ કર્યો ઘેરાવ

ગાંધીધામ એ ડિવિઝન પોલીસ સ્ટેશનનો આમ આદમી પાર્ટીના કાર્યકરોએ ઘેરાવ કર્યો હતો. ઈડીના નકલી અધિકારી બનેલ આરોપી, ઠગાઈના રુપિયા આમ આદમી પાર્ટીમાં વાપરતો હોવાના કચ્છ પોલીસના નિવેદન સામે આમ આદમી પાર્ટીના કાર્યકરો રોષે ભરાયા છે. આમ આદમી પાર્ટીના ગોપાલ ઈટાલિયા, ઈસુદાન ગઢવી સહિતના નેતાઓએ એસપી શરમ કરો, શરમ કરો..ના નારા લગાવ્યા હતા.

ગુજરાતમાં ઠંડી જળવાઈ રહેશે, પવનની ગતી વધુ હોવાથી અનુભવાય છે તીવ્ર ચમકારો

અમદાવાદ  સહીત રાજ્યમાં આગામી પાંચ દિવસ સુધી ઠંડીના પ્રમાણમાં કોઈ નોંધપાત્ર ફેરફાર થવાની શક્યતા નથી. હવામાન વિભાગે આગાહી કરી છે કે, ઠંડીના પ્રમાણમાં એકાદ-બે ડિગ્રીનો ફેરફાર થઈ શકે છે. જો કે ઠંડીનો પારો 14 ડિગ્રીએ હોવા છતા, પવનની ગતીને કારણે તીવ્ર ચમકારો અનુભવાઈ રહ્યો છે. કચ્છના નલિયામાં 7.8 ડિગ્રી ઠંડી નોંધાઈ છે. વડોદરામાં 12 જ્યારે ગાંધીનગરમાં 11 ડિગ્રી ઠંડી નોંધાઈ છે.

ખાદ્યતેલના ભાવ ગયા વર્ષની સરખામણીએ આ વર્ષે વધ્યા

ખાદ્યતેલના ભાવમાં ગત વર્ષની સરખામણીએ આ વર્ષે ભારે ભાવવધારો જોવા મળી રહ્યો છે. પામોલીન તેલના ભાવ કપાસિયા તેલ કરતા પણ વધારે જોવા મળે છે. હાલમાં પામોલીન તેલના ડબ્બાનો ભાવ 2200 રૂપિયાને પાર થયા છે. જ્યારે કપાસિયા તેલના ભાવ 2000 રૂપિયા છે. ગત વર્ષ કરતા કપાસિયા, પામોલીન તેલ અને સનફલાવર તેલના ભાવમાં 500 થી 700 રૂપિયાનો વધારો જોવા મળે છે. સિંગતેલના ભાવ 2500 થી 2700 રૂપિયા ડબ્બો મળી રહ્યો છે. જો કે પામોલીન તેલના ભાવમાં વધારો થતા અન્ય ખાદ્યતેલના ભાવમાં પણ વધારો થશે. આંતરરાષ્ટ્રીય માર્કેટમાં ઇમ્પોર્ટ ડ્યુટીમાં વધારો થતાં ખાદ્યતેલના ભાવમાં થઇ શકે છે વધારો.

જામનગર માર્કેટીંગ યાર્ડમા ડુંગળી મબલખ આવક

જામનગર માર્કેટીંગ યાર્ડમા ડુંગળી મબલખ આવક થવા પામી છે. પ્રથમ વખત જામનગર માર્કેટીંગ યાર્ડમા ડુંગળીની મબલખ આવક થઈ છે. યાર્ડની બહાર ડુંગળી ભરેલા વાહનોની લાંબી કતાર લાગી છે. ગઈકાલ રવિવારે સાંજથી જ ખેડુતો ડુંગળી લઈને યાર્ડમાં વેચવા માટે આવ્યા છે. એક જ દિવસમા 225 વાહન અને અંદાજે 15000 ગુણીની ડુંગળીની આવક થઈ છે.

BZ કૌંભાડ મુદ્દે ભૂપેન્દ્ર ઝાલા એન્ડ કંપનીને દરોડાની આગોતરા જાણ થતા, પોલીસ અધિકારી-કર્મચારી CID ના રડારમાં

BZ મામલે સીઆઈડીએ તપાસનો ધમધમાટ શરૂ કર્યો છે. આ સમગ્ર કૌંભાડ સંદર્ભે કેટલાક પોલીસ અધિકારીઓ અને કર્મીઓ સીઆઈડીના રડારમાં હોવાનું સામે આવ્યું છે. ભૂપેન્દ્ર ઝાલા એન્ડ કંપની ભૂગર્ભમાં ઉતરી જવાને લઈ રડારમાં હોવાનું કહેવાયું છે. દરોડાની કાર્યવાહીની માહિતી ભૂપેન્દ્ર ઝાલાને અંદરથી જ પહોંચી હોવાની આશંકા સીઆઈડીને છે. સ્થાનિક પોલીસ કર્મી સહિત કેટલાક અધિકારી સામે શંકાની સોય તકાઈ છે. ભૂપેન્દ્ર ઝાલા સાથે ઘરોબો ધરાવતા અને ફાર્મહાઉસ પાર્ટીમાં સામેલ થનારા પોલીસ અધિકારીઓ અને કર્મચારીઓ આશંકા હેઠળ છે. આવા કર્મચારી અને અધિકારી સામે સીઆઈડી કરી શકે છે કાર્યવાહી

જૂનાગઢમાં મુન લાઈટ પ્રોજેક્ટ હેઠળ મકાન તેમજ ફ્લેટ આપવાની લાલચ આપી 2.43 કરોડની છેતરપિંડી

જૂનાગઢમાં લોકોને મકાન તેમજ ફ્લેટ આપવાની લાલચ આપી કરોડોની છેતરપિંડી કરી હોવાનો કિસ્સો સામે આવ્યો છે. મુન લાઈટ પ્રોજેક્ટ હેઠળ 2.કરોડ 43 લાખની છેતરપિંડી કરાઈ હોવાનું કહેવાયું છે. અલગ અલગ વ્યક્તિઓ પાસેથી રૂપિયા લઈ છેતરપિંડી કરી હતી. પોતાની ઓફીસ બંધ કરી પલાયન થયેલા મનીષ મોહનલાલ કારીયા તેમજ સંજય ભંડારી  વિરૂધ્ધ ફરિયાદ કરવામાં આવી છે. છેતરપિંડીનો આંકડો હજુ પણ વધી શકે છે.

જૂનાગઢમાં દુષ્કર્મના આરોપીએ ઝેરી દવા પી કરી આત્મહત્યા

જૂનાગઢમાં દુષ્કર્મના આરોપીએ ઝેરી દવા પી આત્મહત્યા કરી લીધી છે. સાત દીવસના પેરોલ મળતા, આરોપી ઘરે આવ્યો હતો. પેરોલ પૂર્ણ થતા ફરી જેલમા જવુ ના પડે તે માટે તેના ઘરે આત્મહત્યા કરી લીધી હોવાનું પ્રાથમિક તપાસમાં સામે આવ્યું છે. મૃતક આરોપીનું નામ મીતુલ બારૈયા છે.

અમદાવાદના દાણીલીમડામાંથી SOG એ ઝડપ્યો ગેરકાયદેસર કફ સિરપનો જથ્થો

અમદાવાદ SOG પોલીસે ગેરકાયદેસર કફ સિરપનો જથ્થો ઝડપી પાડ્યો છે. દાણીલીમડા ફિરદોસ મસ્જિદ પાસે મુસ્લિમ સોસાયટીમાંથી કફ સિરપની 101 બોટલ જપ્ત કરી છે. નાસિર મોહમદ હનીફ શેખના ઘરેથી મળી કફ શિરપની બોટલો મળી આવી છે. ઝડપાયેલ રૂપિયા 22 હજારની કફ સિરપની બોટલ સહિત કુલ 77 હજારનો મુદ્દામાલ જપ્ત કરવામાં આવ્યો છે.

અમદાવાદ એરપોર્ટ પર 50 લાખના સોના સાથે મહિલા પકડાઈ

અમદાવાદ એરપોર્ટ પર 50 લાખના સોના સાથે કેરિયર મહિલા પકડાઈ છે. એતિહાદ એરલાઈન્સમાં અમદાવાદ આવેલી મહિલા પાસેથી સોનું પકડાયું છે. એરપોર્ટ એર ઇન્ટેલીજન્સ યુનિટ દ્વારા કાર્યવાહી કરાઈ છે. મહિલા કેરિયર તરીકે કામ કરતી હોવાનું તપાસ દરમિયાન બહાર આવ્યું છે. મહિલા પાસેથી 18 અને 9 કેરેટના સોનાના દાગીના મળી આવ્યા હતા.

પાલનપુરમાં યુવતીએ વીડિયો વાયરલ કરીને કર્યો આપધાત

બનાસકાંઠાના પાલનપુરમાં યુવતીએ આપઘાત કર્યો છે. આપઘાત કરતા પહેલા, મૃતક યુવતીએ વીડિયો વાયરલ કર્યો છે. આપઘાત અંગે વીડિયોમાં માફી માંગી છે. મૃતકના મોબાઈલમાથી કોઈ યુવક સાથેના કોલ અને વીડિયો રેકોર્ડિંગ મળ્યા છે. પરિવારજનો એ પાલનપુર પશ્ચિમ પોલીસ મથકે અજાણ્યા યુવક વિરુદ્ધ રજૂઆત કરી છે. પોલીસ યુવતીનો મોબાઇલ કબજે લઈ પંચનામું કર્યું છે. તપાસના અંતે ફરિયાદ નોંધાશે.

ઊંઝા એપીએમસીની આજે ચૂંટણી, ભાજપના બે જૂથો આમને સામને

ઊંઝા APMCની આજે ચૂંટણી યોજાનાર છે. આ ચૂંટણીમાં ભાજપના બે જૂથો આમને સામને છે. ધારાસભ્ય કિરીટ પટેલ અને એપીએમસીના પૂર્વ ચેરમેન દિનેશ પટેલનું જૂથ આમને સામને છે. અજ્ઞાત સ્થળે લઈ જવાયેલા મતદારોને સીધા મતદાન મથકે લવાયા છે. ખેડૂત વિભાગની 10 બેઠકો માટે 260 મતદારો નોંધાયા છે. જ્યારે વેપારી વિભાગની 4 બેઠકો માટે 803 મતદારો નોંધાયેલા છે. કુલ 14 બેઠકો માટે 1063 મતદારો નોંધાયેલા છે. આજે યોજાનાર ચૂંટણીની મતગણતરી આવતીકાલે હાથ ધરાશે.

બહુચરાજી દેલપુરા ગામના 10 બાળકને ફૂડ પોઇઝનિંગ, મહેસાણા સિવિલ હોસ્પિટલમાં દાખલ

મહેસાણાના બહુચરાજી દેલપુરા ગામના 10 બાળકને ફૂડ પોઇઝનિંગની અસર થવા પામી છે. દેલપુરા પ્રાથમિક સ્કૂલ કમ્પાઉન્ડમાં અજાણ્યા વૃક્ષના ફળ ખાવાથી બાળકોને અસર થવા પામી હોવાનું સામે આવ્યું છે. ફૂડ પોઇઝનિંગની અસર પામેલા તમામ બાળકોને બહુચરાજી સિવિલ હોસ્પિટલમાં સારવાર અર્થે ખસેડાયા છે. બહુચરાજી સિવિલના ડોક્ટરોએ પ્રાથમિક સારવાર કરી મહેસાણા સિવિલ હોસ્પિટલ રીફર કરાયા છે. બાળકોના પરિવારજનોનો શાળા સ્ટાફ પ્રત્યે રોષની લાગણી છે. આ પ્રકારના તમામ વૃક્ષો શાળા સંકુલમાંથી હટાવી દેવા કરાશે રજૂઆત.

રાજ્યસભામાં આજથી બંધારણ પર ચર્ચા શરૂ થશે

રાજ્યસભામાં બંધારણ પર ચર્ચા થશે. કેન્દ્રીય નાણામંત્રી નિર્મલા સીતારમણ ભાજપ તરફથી ચર્ચાની શરૂઆત કરશે. બીજી તરફ કોંગ્રેસ વતી મલ્લિકાર્જુન ખડગે પોતાના વિચારો રજૂ કરશે.