Suvendu Adhikari

સુવેન્દુ અધિકારી પશ્ચિમ બંગાળમાં ભારતીય જનતા પાર્ટી (ભાજપ) ની સરકારના મુખ્ય પ્રધાન છે. તેમણે 2026માં યોજાયેલ પશ્ચિમ બંગાળ વિધાનસભાની ચૂંટણીમાં ભાજપને 200 કરતા પણ વધુ બેઠકો જીતાડી છે. સુવેન્દુ અધિકારીએ કોલકત્તામાં, 09 મે 2026ના રોજ, વડા પ્રધાન નરેન્દ્ર મોદી તેમજ ભાજપ શાસિત રાજ્યોના મુખ્યપ્રધાન અને નાયબ મુખ્ય પ્રધાનોની ઉપસ્થિતિમાં યોજાયેલા ભવ્ય સમારંભમાં પશ્ચિમ બંગાળના મુખ્ય પ્રધાન તરીકે શપથ ગ્રહણ કર્યા હતા.

આ પહેલા, મમતા બેનર્જીના કાર્યકાળ દરમિયાન, તેમણે વિપક્ષના નેતા તરીકે સેવા આપી હતી. તેમનો જન્મ 15 ડિસેમ્બર, 1970 ના રોજ પશ્ચિમ બંગાળના પૂર્વ મેદિનીપુર જિલ્લામાં થયો હતો. તેમણે નેતાજી સુભાષ ઓપન યુનિવર્સિટીમાંથી એમએની ડિગ્રી મેળવી હતી. તેમના પિતા, શિશિર અધિકારી, મનમોહન સિંહ વહીવટ દરમિયાન સંસદ સભ્ય અને ભૂતપૂર્વ કેન્દ્રીય ગ્રામીણ વિકાસ રાજ્યમંત્રી તરીકે સેવા આપી ચૂક્યા છે. સુવેન્દુ અધિકારી પહેલી વાર 1995 માં ભારતીય રાષ્ટ્રીય કોંગ્રેસની ટિકિટ પર કાંઠી નગરપાલિકાના કાઉન્સિલર તરીકે ચૂંટાયા હતા.

તેઓ 1995 થી 1998 સુધી કોંગ્રેસ પાર્ટી સાથે જોડાયેલા રહ્યા. ત્યારબાદ, તેઓ તૃણમૂલ કોંગ્રેસમાં જોડાયા. તેઓ 1998 થી 2020 સુધી મમતા બેનર્જી સાથે તૃણમૂલ કોંગ્રેસમાં રહ્યા. ત્યારબાદ તેમણે તૃણમૂલ કોંગ્રેસ છોડી દીધી અને ભારતીય જનતા પાર્ટીના સભ્ય બન્યા.

સુવેન્દુ 2009 અને 2014માં તામલુક સંસદીય મતવિસ્તારમાંથી લોકસભામાં ચૂંટાયા હતા. 2016 થી 2020 સુધી, તેઓ નંદીગ્રામથી પશ્ચિમ બંગાળ વિધાનસભામાં ચૂંટાયા હતા, આ સમયગાળા દરમિયાન તેમણે રાજ્ય સરકારમાં પરિવહન મંત્રી તરીકે સેવા આપી હતી. તેઓ 2020 માં સત્તાવાર રીતે ભાજપમાં જોડાયા હતા. 2021 ની ચૂંટણીમાં તેમણે મુખ્યમંત્રી મમતા બેનર્જીને હરાવ્યા હતા. 2026 ની ચૂંટણીમાં, તેમણે ફરી એકવાર મમતા સામે ચૂંટણી લડી અને તેમને હરાવ્યા. આ ચૂંટણીમાં, ભાજપે જંગી બહુમતી મેળવી, અને પાર્ટીએ સુવેન્દુ અધિકારીને મુખ્યમંત્રીની જવાબદારી સોંપી.