પશ્ચિમ બંગાળના કોલકાતામાં બ્રિગેડ પરેડ ગ્રાઉન્ડ ખાતે, આજે મુખ્ય પ્રધાનની શપથ ગ્રહણ સમારોહ માટે પીએમ મોદી સહિત અનેક રાજ્યોના મુખ્યપ્રધાનો ઉપસ્થિત રહ્યાં હતા. આ ભવ્ય રાજકીય સમારોહની વચ્ચે, પીએમ મોદીએ સ્ટેજ પર એક વૃદ્ધ વ્યક્તિના પગ સ્પર્શ કર્યા. તેમને શાલ ઓઢાડી બહુમાન કરવાની સાથે અને આદરપૂર્વક તેમને સસ્મિત ભેટીને અભિવાદન કર્યું.

આ તસવીર જોઈને, દરેકના મનમાં એક પ્રશ્ન ઉભો થાય તે સ્વાભાવિક છે કે, આ વૃદ્ધ વ્યક્તિ કોણ છે, જેના પગે પીએમ મોદી પડ્યા. એટલુ જ નહીં પગે લાગીને તેમના આશીર્વાદ મેળવ્યાં ? આ સજ્જન પશ્ચિમ બંગાળના સૌથી વરિષ્ઠ ભાજપ કાર્યકરોમાંના એક છે. તેમનું નામ માખનલાલ સરકાર છે, અને તેઓની ઉમર આશરે 98 વર્ષની છે. માખનલાલ સરકાર સ્વતંત્રતા પછીના ભારતમાં રાષ્ટ્રવાદી ચળવળ સાથે સંકળાયેલા શરૂઆતના પાયાના નેતાઓમાંના એક છે. 1052માં, કાશ્મીરમાં ભારતીય ત્રિરંગો ફરકાવવાના આંદોલન દરમિયાન તેમની શ્યામા પ્રસાદ મુખર્જી સાથે ધરપકડ કરવામાં આવી હતી.

1980માં ભાજપની સ્થાપના થયા પછી, તેઓ પશ્ચિમ દિનાજપુર, જલપાઈગુડી અને દાર્જિલિંગ જિલ્લાઓના સંગઠનાત્મક સંયોજક બન્યા. માત્ર એક વર્ષમાં, તેમણે લગભગ 10,000 સભ્યોને પક્ષમાં સામેલ કરવામાં મદદ કરી. 1981 થી, તેમણે સતત સાત વર્ષ સુધી જિલ્લા પ્રમુખ તરીકે સેવા આપી. આ એક અસાધારણ સિદ્ધિ હતી જ્યારે ભાજપના નેતાઓ સામાન્ય રીતે બે વર્ષથી વધુ સમય સુધી એક પણ સંગઠનાત્મક પદ સંભાળી શકતા ન હતા.

ભવ્ય સ્વાગત

વડાપ્રધાન ખુલ્લા વાહનમાં સ્થળ પર પહોંચ્યા અને વહેલી સવારથી જ શપથ ગ્રહણ સમારોહ માટે ભેગા થયેલા હજારો સમર્થકોનું સ્વાગત કરવા હાથ લહેરાવીને અભિવાદન કર્યું. મોદી સવારે 10 વાગ્યા પહેલા નેતાજી સુભાષચંદ્ર બોઝ આંતરરાષ્ટ્રીય વિમાનમથક પર ઉતર્યા હતા. ત્યાંથી, તેઓ હેલિકોપ્ટર મારફતે રેસકોર્સ મેદાન ગયા, અને ત્યારબાદ રોડ માર્ગે સ્થળ પર પહોંચ્યા.

બ્રિગેડ પરેડ ગ્રાઉન્ડ ખાતે કેસરીયો લહેરાયો

બ્રિગેડ પરેડ ગ્રાઉન્ડ કેસરી સમુદ્રમાં ફેરવાઈ ગયું હતું, ભાજપના અનેક સમર્થકો પશ્ચિમ બંગાળ, ઝારખંડ જેવા પડોશી રાજ્યો અને વિદેશથી પણ આ કાર્યક્રમ નજરે જોવા માટે ઉમટી પડ્યા હતા.

INDIA Alliance : વિપક્ષ સામે પાર્ટી અસ્તિત્વનું સંકટ, બંગાળના પરિણામોએ વધારી ચિંતા!