14 સપ્ટેમ્બરના મહત્વના સમાચાર : સવારના 6 વાગ્યાથી રાતના 8 વાગ્યા સુધીના 14 કલાકમાં 259 તાલુકામાં વરસાદ વરસ્યો

પોરબંદર સમુદ્રમાં ફિશિંગ કરતા માછીમારોને આજથી પાંચ દિવસ દરિયો ના ખેડવાની સૂચના

પોરબંદર સમુદ્રમાં ફિશિંગ કરતા માછીમારોને આજથી પાંચ દિવસ દરિયો ના ખેડવાની સૂચના આપવામાં આવી છે. હવામાન વિભાગની આગાહીના પગલે રાજ્યના મત્સ્ય ઉદ્યોગ વિભાગે માછીમારોને સાવચેત કર્યા. સમુદ્રમાં ભારે પવન ફૂંકાવાની શક્યતાને પગલે માછીમારોને પરિપત્ર જાહેર કરી આપી ચેતવણી. જે માછીમારો સમુદ્રમાં ફિશિંગ કરતા હોય એમને નજીકના બંદર પર પહોચી જવા માછીમાર બોટ એસોસિયેશન મારફત જાણ કરવામાં આવી છે.

સવારના 6 વાગ્યાથી રાતના 8 વાગ્યા સુધીના 14 કલાકમાં 259 તાલુકામાં વરસાદ વરસ્યો

ગુજરાતમાં આજે સવારના 6 વાગ્યાથી રાતના 8 વાગ્યા સુધીના 14 કલાકમાં 259 તાલુકામાં વરસાદ વરસ્યો છે. સૌથી વધુ વરસાદ ભાવનગરના વલ્લભીપુરમાં 6 ઈંચ વરસાદ નોંધાયો છે. આણંદના બોરસદમાં સાડા પાંચ ઈંચ, કોટડા સાંગાણીમાં પોણા પાંચ ઈંચ વરસાદ નોંધાયો છે. બોટાદ અને નડીયાદમાં 4 ઈંચ જેટલો વરસાદ વરસ્યો છે. રાજ્યના 259 તાલુકા પૈકી, 8 તાલુકામાં 4 ઈંચથી વધુ, 18 તાલુકામાં 3 ઈંચથી વધુ વરસાદ વરસ્યો છે.

ખોરાક અને ઔષધ નિયમન તંત્રે રાજ્યભરમાં 200 હોસ્ટેલ અને કેન્ટિનમાં દરોડા પાડ્યા

ખોરાક અને ઔષધ નિયમન તંત્રની સ્પેશ્યલ ડ્રાઇવ હાથ ધરાઈ હતી. રાજ્યભરમાં 200 હોસ્ટેલ અને કેન્ટિનમાં દરોડા દરમિયાન 61 ઇમ્પ્રુવમેન્‍ટ નોટીસ આપવામાં આવી, 98 નમુના લેવામાં આવ્યા અને 10 હોસ્ટેલ તથા કેન્‍ટીનમાં ગંભીર કક્ષાની અસ્વચ્છતા અને અનહાઇજેનિક પરિસ્થિતિને પગલે સ્વંયભુ બંધ કરાવડાવી છે.

માત્ર 2 કલાકમાં કોટડાસાંગાણીમાં સવા ત્રણ ઈંચ, ગોંડલ-તાલાલામાં બે ઈંચ, ગઢડામાં પોણા બે ઈંચ વરસાદ વરસ્યો

રાજકોટના કોટડાસાંગાણીમાં આજે સાંજે 4 થી 6 વાગ્યા સુધીના બે કલાકમાં સવા ત્રણ ઈંચ જ્યારે ગોંડલમાં બે ઈંચ વરસાદ વરસ્યો છે. ગીર સોમનાથના તાલાલામાં બે ઈંચ વરસાદ નોંધાયો છે. બોટાદના ગઢડામાં પણ પોણા બે ઈંચ વરસાદ વરસ્યો છે. ભાવનગરના વલ્લભીપુરમાં સવા ઈંચ જેટલો વરસાદ નોંધાયો છે.

વિશ્વ પ્રસિધ્ધ તરણેતરના ભાતીગળ લોકમેળાનો વરસાદી માહોલ વચ્ચે પ્રારંભ

સુરેન્દ્રનગરના થાન નજીક આવેલ તરણેતર ખાતે વિશ્વ પ્રસિધ્ધ ભાતીગળ લોકમેળાને વરસાદી માહોલ વચ્ચે પ્રજાજનો માટે ખુલ્લો મુકવામાં આવ્યો છે. ગુજરાત વિઘાનસભાના નાયબ મુખ્યદંડક જગદીશભાઈ મકવાણા, ચોટીલાના ધારાસભ્ય શામજીભાઈ ચૌહાણ સહિતનાઓ ત્રિનેતેશ્વર મહાદેવની પુજા અર્ચના અને આરતી કરીને મેળો ખુલ્લો મુકયો હતો. આગામી 17 સપ્ટેમ્બર સુધી  તરણેતરનો ભાતીગળ લોકમેળો યોજાશે. પરંપરાગત હુડો રાસ, રંગબેરંગી ભરત ભરેલી છત્રી, ગ્રામીણ ઓલિમ્પિક્સ, પશુ હરિફાઈ, લોક ડાયરો અને સાંસ્કૃતિક કાર્યક્રમો આકર્ષણનું કેન્દ્ર બનશે.

કડીમાં પડેલા વરસાદથી શહેરના વિવિધ વિસ્તારો સહીત માર્કેટયાર્ડમાં ભરાયા વરસાદી પાણી

મહેસાણા જિલ્લાના કડી માર્કેટયાર્ડમાં વરસાદી પાણી ભરાઈ ગયા છે. માર્કેટયાર્ડમાં પાણી ભરાતા વેપારીઓ ચિંતામાં. દુકાનમાંથી પાણી ઉલેચી નુકશાન થતું બચાવવા વેપારીઓનો પ્રયાસ. કડી શહેરના ઘણા વિસ્તારોમાં પાણી જ પાણી જોવા મળ્યું છે.

બનાસકાંઠા જિલ્લા પ્રમુખ ગુલાબસિંહે જાહેર કરેલ જિલ્લા કોંગ્રેસના સંગઠનનું માળખુ પ્રદેશ પ્રમુખ અમિત ચાવડાએ વિખેરી નાખ્યું

ગુજરાત પ્રદેશ કોંગ્રેસ પ્રમુખ અને બનાસકાંઠા જિલ્લા પ્રમુખનો ગજગ્રાહ સપાટી પર આવ્યો છે. ગુજરાત કોંગ્રેસ પ્રમુખ અમિત ચાવડાએ, બનાસકાંઠા કોંગ્રેસના નવા માળખાને વિખેરી નાખ્યું છે. બનાસકાંઠા કોંગ્રેસ પ્રમુખ ગુલાબસિંહ રાજપુતે, ગુજરાત પ્રદેશ કોંગ્રેસ પ્રમુખને વિશ્વાસમાં લીધા વિના જ બનાસકાંઠા જિલ્લા સમિતિનુ માળખુ જાહેર કર્યું હતું. ગત 11 સપ્ટેમ્બરના રોજ, સંગઠનના નવા માળખાને સોશિયલ મીડિયા પર જાહે કર્યુ હતુ. માળખાને પ્રદેશ સમિતિએ મંજુરી આપી ના હોવાથી રદ્દ કરાયુ. બનાસકાંઠા અને વાવ-થરાદ જિલ્લો અલગ હોવાથી નવી નિમણુકની પ્રક્રિયા હાથ ધરાશે.

અરવલ્લીના ભિલોડાના ગ્રામ્ય વિસ્તારોમાં વરસેલા વરસાદથી ચેકડેમ છલકાયા

ભિલોડાના ગ્રામ્ય વિસ્તારોમાં વરસા પડતા ખેડૂતોને થઈ રાહત. ધોધમાર વરસાદના કારણે ચેકડેમો છલકાયા. સિઝનમાં પ્રથમ વખત ચેકડેમો ઉપરથી પાણી વહયા. ચેકડેમો છલકાતા ખેતીમાં રાહત થવાની ખેડૂતોને આશા.

અમરેલીના વડેરા, નાના ભંડારીયા, બરવાળા બાવીશી સહિતના ગામોમાં 43 દિવસ બાદ વરસ્યો વરસાદ

અમરેલી તાલુકાના ગ્રામ્ય વિસ્તારોમાં મેઘરાજાની તોફાની બેટિંગ જોવા મળી હતી. અમરેલીના વડેરા, નાના ભંડારીયા અને બરવાળા બાવીશી સહિતના ગામોમાં ભારે વરસાદ ખાબક્યો. 43 દિવસના લાંબા વિરામ બાદ વરસાદની પધરામણી થવા પામી હતી. વડેરા તેમજ નાના ભંડારીયા ગામની સ્થાનીક નદીમાં પુર આવ્યું. ધોધમાર વરસાદ થી મુર્જાતા પાકને જીવતદાન..

નડિયાદના જુદા જુદા વિસ્તારોમા પાણી ભરાવા અંગે બોલ્યા ધારાસભ્ય પંકજ દેસાઈ

ખેડા જિલ્લાના નડિયાદ મહાનગરપાલિકામાં વરસેલા વરસાદથી,  જુદા જુદા વિસ્તારોમાં પાણી ભરાઈ જવા પામ્યું હતું. વરસાદી પાણી અને નાગરિકોની હેરાનગતિ અંગે નડિયાદના ધારાસભ્યનું નિવેદન સામે આવ્યું છે. નડિયાદ શહેરમાંથી પસાર થતાં કાસંને નવો બનાવવાનો પ્રોજેક્ટ એક વર્ષ પહેલાં મંજૂર થઈ ગયો છે. ​સરકારમાંથી ગ્રાન્ટ પણ મંજૂર થઈ ગઈ છે. હાલમાં કામગીરી ચાલી રહી છે. જો કે, નવા કાંસની કામગીરી ક્યારે પૂર્ણ થશે, તેનાથી પાણી ભરાશે કે નહી તેનો કોઈ નક્કર જવાબ ધારાસભ્ય આપી શક્યા નહોતા.

બોટાદ શહેરની મધુ અને ઉતાવળી નદીમાં એક સાથે સિઝનમાં પહેલીવાર પાણીની આવક થતા પૂર જેવી સ્થિતિ

બોટાદ શહેરની બે નદીમાં એક સાથે સિઝનમાં પહેલીવાર પાણીની થઈ આવક. શહેરની મધ્યમાથી પસાર થતી મધુ અને ઉતાવળી નદીમાં આવ્યા નવા નીર. બોટાદ સહિત ઉપરવાસમાં પડેલા વરસાદી પાણીની આવક. શહેરના ભાવનગર રોડ સર્કલ પાસે બન્ને નદી ઓ થાય છે ભેગી. ભાવનગર રોડ સર્કલ ખાતે રોડ પરથી અડધો ફૂટ જેટલા વહી રહ્યા છે પાણી. પાણીની આવક સતત વધી રહી છે.

પોરબંદરના કુતિયાણા તાલુકાના કાસંબડ ગામે વીજળી પડતાં એક વ્યક્તિનું મોત

પોરબંદરના કુતિયાણા તાલુકાના કાસંબડ ગામે વીજળી પડતાં એક વ્યક્તિનું મોત થયું છે. વીજળી પડતા 50 વર્ષીય વિનુભાઈ મેરામણ ઓડેદરાનું ઘટના સ્થળે જ મોત થયું છે. વીજળી પડતા એક ભેંસનું પણ મોત થયાના સમાચારો સામે આવ્યા છે. કાસંબડ ગામે વીજળી પડતા એક પુરુષ અને એક ભેંશનું મોત થતા સ્થાનિક લોકોમાં ગભરાટ ફેલાયો. મૃતક વિનુભાઈ ઓડેદરાને પોરબંદરની હોસ્પિટલ ખાતે પોસ્ટમોર્ટમ માટે લાવવામાં આવ્યા.

જસદણ, આટકોટ, વીરનગર, કમળાપુર,ભાડલા સહિતના ગ્રામ્ય વિસ્તારોમાં વરસ્યો ધોધમાર વરસાદ, ખેડૂતોના પાકને મળશે જીવનદાન

જસદણ શહેર અને ગ્રામ્ય વિસ્તારમાં મેઘરાજાની ધમાકેદાર એન્ટ્રી. જસદણ શહેર અને ગ્રામ્યમાં સતત બીજા દિવસે વરસાદ. જસદણમાં બપોર બાદ ધોધમાર વરસાદ વરસ્યો. જસદણ,આટકોટ,વીરનગર કમળાપુર ,ભાડલા,સહિત ગ્રામ્ય વિસ્તારોમાં વરસ્યો ધોધમાર વરસાદ. ધોધમાર વરસાદના કારણે જસદણના ચિતલીયા રોડ તેમજ નવા બસ સ્ટેશન ગંગા ભુવન પાસે રોડ પર પાણી ભરાયા. જસદણ શહેર સહિત ગ્રામ્ય વિસ્તારોમાં વરસાદી માહોલ. વરસાદ વરસતા ખેડૂતોના પાકને નવું જીવનદાન. વરસાદ વરસતા ખેડૂતોમાં ખુશીનો માહોલ જોવા મળ્યો.

બોટાદ સાળંગપુર રોડ પરના રેલવે અંડરબ્રિજમાં કમર સુધી ભરાયા વરસાદી પાણી

બોટાદ શહેરનો રેલવે અંડર બ્રિજ પાણીમાં ગરકાવ થયો છે. રેલવે અંડર બ્રિજમાં કમર સુધી પાણી ભરાયા છે. બોટાદ શહેરના સાળંગપુર રોડ પર આવેલો છે રેલવે અંડર બ્રિજ. બોટાદ શહેર સહિત સમગ્ર સૌરાષ્ટ્રમાં અવરજવર કરવા માટેનો છે મુખ્ય માર્ગે.  દર વર્ષની માફક આ વર્ષે પણ માત્ર 20 મિનિટના ધોધમાર વરસાદમાં પાણી ભરાયા. હાલ ડીઝલ એન્જિન મૂકી પાણી બહાર કાઢવાનો પ્રયાસ છત્તાં પણ પાણી ભરાવો યથાવત. અનેક વાહન ચાલકોના વાહનો પાણીમાં બંધ પડ્યા છે. તો બીજી તરફ અનેક વાહન ચાલકો જીવના જોખમે પાણીમાંથી વાહનો પસાર કરી રહ્યા છે.

બોટાદ શહેર અને તાલુકા પંથકમાં સાંજે તુટી પડ્યો વરસાદ

બોટાદ તાલુકા પંથકમાં સાંજે તુટી પડ્યો ધોધમાર વરસાદ. બોટાદ શહેરના તમામ વિસ્તારોમાં ધોધમાર વરસાદ વરસ્યો. સમઢીયાળા, સેંથળી, લાઠીદડ, નાગલપર સહિતના ગામોમાં વરસાદ હોવાના વાવડ આવ્યા છે. બપોર બાદ કાળા ડિબાંગ વાદળો ઘેરાયા હતા અને વીજળીના કડાકા સાથે ધોધમાર વરસાદ તુટી પડ્યો. બોટાદ જિલ્લા કલેકટર અને જિલ્લા પોલીસ વડાની કચેરી જ્યાં આવી છે તે બોટાદ શહેરના ખસ રોડ, ભાવનગર રોડ, ગઢડા રોડ, પાળીયાદ રોડ, ટાવર ચોક, હવેલી ચોક સહિત શહેરના વિવિધ વિસ્તારોમાં ધોધમાર વરસાદ વરસ્યો છે.

હવામાન વિભાગનુ નાઉકાસ્ટ, સાંજે 7 વાગ્યા સુધીમાં 20 જિલ્લામાં ભારે વરસાદની આગાહી

હવામાન વિભાગે આગામી 3 કલાક માટે જાહેર કર્યું નાઉકાસ્ટ. ગુજરાતના અનેક જિલ્લાઓમાં સાંજે 7 વાગ્યા સુધી ભારે વરસાદની આગાહી કરવામાં આવી છે. કચ્છ સહિત 20 જિલ્લાઓમાં રેડ એલર્ટ આપવામાં આવ્યું છે. અમદાવાદ સહિતના જિલ્લાઓમાં ઓરેન્જ એલર્ટ સાથે મધ્યમ વરસાદ અને ગાજવીજની શક્યતા વ્યક્ત કરવામાં આવી છે.

અમદાવાદના ઘૂમા વિસ્તારમાં વરસાદી પાણીને લઈ મેયરને જ્યાં લોકોએ ઘેર્યા હતા ત્યાં ફરી ભરાયા પાણી

અમદાવાદમાં વહેલી સવારથી વરસેલા ધોધમાર વરસાદથી હાલાકી. ઘુમા ગામના નીચાણવાળા વિસ્તારની સોસાયટીઓ જળમગ્ન થઈ છે. હરિઓમ વીલા, ઈસ્કોન ફ્લાવર સહિતની સોસાયટીમાં જળભરાવ. અગાઉ પણ આ વિસ્તારમાં પાણી ભરાતાં લોકોએ મેયરને ઘેર્યા હતા. આ વરસાદમાં ફરી એકવાર તે જ વિસ્તારમાં ભરાયા પાણી. મનપા તંત્રએ હેવી ડિવોટરિંગ વાન મૂકી પાણીનો નિકાલ કરવાની કરી વ્યવસ્થા કરી.

અમદાવાદ શહેરમાં વરસાદના વિરામ બાદ પણ અનેક સ્થળોએ નથી ઓસર્યા પાણી

અમદાવાદ શહેરમાં વરસાદના વિરામ બાદ પણ અનેક સ્થળોએ નથી ઓસર્યા પાણી. વરસાદના વિરામ બાદ ઠેર ઠેર પાણી ભરાયા. શ્યામલ ચાર રસ્તાથી શિવરંજની આવવાના રોડ પર પાણી ભરાયા છે. બ્રિજના બંને સાઇડ પાણી ભરાયા. પાણી ભરાવાના કારણે વાહન ચાલકોને ભારે હાલાકી ભોગવવી પડી છે. વાહનો બંધ પડી જતા લોકોમાં રોષ.

અડધો કલાકના વરસાદમાં રાજકોટના મવડી વિસ્તારમાં ભરાયા પાણી

રાજકોટ શહેરમાં અડધો કલાકમાં પહેલા વરસાદથી પાણી ભરાઈ ગયા છે. રાજકોટ શહેરના મવડી વિસ્તારમાં પાણી ભરાયા છે. 80 ફૂટના રોડ પર પાણી ભરાયા છે. જો કે વરસાદ બંધ થતાં ધીરેધીરે પાણી આસરવા લાગ્યા છે.

દેવભૂમિ દ્વારકા જિલ્લામાં મેઘરાજાની પધરામણી, દુકાળની ભીતિથી ચિંતિત ખેડૂતોમાં ફરી ખુશીની લહેર

દેવભૂમિ દ્વારકા જિલ્લામાં મેઘરાજાની પધરામણી થવા પામી છે. ભાણવડ પંથકમાં લાંબા વિરામ બાદ વરસાદી માહોલ સર્જાયો. મેવાસા, ગુંદા, ઘુમલી સહિતના ગ્રામ્ય વિસ્તારોમાં વરસાદ વરસ્યો છે. ભાણવડ શહેર સહિત ગ્રામ્ય વિસ્તારોમાં વરસાદી જમાવટ થવા પામી છે. દુકાળની ભીતિથી ચિંતિત ખેડૂતોમાં ફરી ખુશીની લહેર ફરી વળી છે.

વડોદરાના શિનોર પંથકમાં વરસાદ, શિનોરના બજારોમાં વરસાદી પાણી વહ્યાં

વડોદરાના શિનોરમાં વરસાદી માહોલ જામ્યો છે. શિનોર કરજણમાં ખેતીલાયક વરસાદ વરસ્યો. પંથકના ગામડાઓમાં ખેડૂતો ખેતીલાયક વરસાદથી ખુશહાલ. નાનીભાગોળ, મોટીભાગોળ, માલસર રોડ, સેગવા રોડ પર વરસાદ. શિનોરના મેન બજારોમાંથી વરસાદી પાણી વહેતા થયા.

ગોંડલ લાંબા સમયના વિરામ બાદ મેઘરાજાની ધમાકેદાર એન્ટ્રી, ખેતરોમાં ઉભા પાકને જીવંતદાન મળશે

રાજકોટના ગોંડલ લાંબા સમયના વિરામ બાદ મેઘરાજાની ધમાકેદાર એન્ટ્રી થઈ છે. આકાશમાં કાળાડીબાંગ વાદળોની વચ્ચે વાતાવરણમાં પલટો આવ્યો. ધીમીધારની પધરામણી અને બપોર બાદ ધોધમાર વરસાદ શરૂ થયો. શહેરના મુખ્ય રાજમાર્ગો પર વરસાદી પાણી ફરી વળ્યાં. વાતાવરણમાં ઠંડક પ્રસરી જતાં લોકોને અસહ્ય ગરમીથી મુક્તિ મળી. લાંબા વિરામ બાદ મેઘમહેર થતાં ખેડૂતોના ઉભા પાકને જીવંતદાન મળ્યું

વીજળીના કડાકાં સાથે રાજકોટ શહેરમાં વરસ્યો ધોધમાર વરસાદ

રાજકોટ શહેરમાં વરસાદી માહોલ જોવા મળ્યો. વીજળીના કડાકાં સાથે ધોધમાર વરસાદ પડ્યો. ભારે વરસાદથી શહેરીજનોમાં ખુશી. જો કે હજુ સારા વરસાદની રાહ જોતા રાજકોટવાસીઓ

ગીર સોમનાથના તાલાલામાં ધોધમાર વરસાદ

ગીર સોમનાથના તાલાલામાં ધોધમાર વરસાદ વરસ્યો છે. ધોધમાર વરસાદના કારણે રોડ પર પાણી ભરાયા છે. હાઈવે પર ઘૂસિયા નજીક રોડ પર ગોઠણ સમું પાણી ભરાયું છે.

થોડાક વરસાદમાં નારોલ નરોડા હાઇવે પર પાણી જ પાણી

અમદાવાદના નારોલ વિસ્તારમાં પાણી ભરાયા. નારોલ નરોડા હાઇવે પર પાણી જ પાણી. રોડની બંને તરફ પાણી ભરાયા. નારોલ ઔદ્યોગિક એકમોમાં પાણી ભરાયા

મહેસાણા જિલ્લાના તમામ તાલુકાઓમાં વરસાદી માહોલ

મહેસાણા જિલ્લાના તમામ તાલુકાઓમાં વરસાદી માહોલ જામ્યો છે. વિજાપુરમાં 4 કલાકમાં 3 ઇંચ વરસાદ વરસ્યો છે. સવારે દસથી બપોરે બે વાગ્યા સુધી સાર્વત્રિક વરસાદ નોંધાયો છે. વિજાપુરમાં સૌથી વધુ 77 mm વરસાદ ખાબકતાં પાણી ભરાયા છે. કડીમાં 40mm અને ખેરાલુમાં 39mm વરસાદ વરસ્યો છે. મહેસાણામાં 27mm તેમજ વડનગર પંથકમાં 20mm વરસાદ વરસ્યો છે. જોટાણા, ઊંઝા અને સતલાસણા પંથકમાં પણ સારો વરસાદ નોંધાયો

અમદાવાદમાં વરસાદની સ્થિતિને લઈ,વિદ્યાર્થીઓ, વાલીઓ તથા શાળાના સ્ટાફની સલામતીને સર્વોચ્ચ પ્રાથમિકતા આપવા DEOની સૂચના

અમદાવાદ શહેર પૂર્વ તથા પશ્ચિમ વિસ્તારની તમામ શાળાઓના સંચાલક તેમજ આચાર્યને અમદાવાદના DEOની અતિ મહત્વની સૂચના આપી છે. અમદાવાદ શહેરમાં હાલ ભારે વરસાદની પરિસ્થિતિ તેમજ વિવિધ વિસ્તારોમાં પાણી ભરાવાની સ્થિતિને ધ્યાનમાં રાખી, વિદ્યાર્થીઓ, વાલીઓ તથા શાળાના સ્ટાફની સલામતીને સર્વોચ્ચ પ્રાથમિકતા આપવી. આથી દરેક શાળાએ પોતાના વિસ્તારની સ્થાનિક વરસાદી પરિસ્થિતિ, રસ્તાઓની સ્થિતિ, પાણી ભરાવાની સ્થિતિ તથા વિદ્યાર્થીઓને શાળાએ આવવા-જવા દરમિયાન ઊભા થઈ શકે તેવા જોખમનું સ્થાનિક સ્તરે મૂલ્યાંકન કરી, પોતાના વિવેકબુદ્ધિ મુજબ શૈક્ષણિક કામગીરી ચાલુ રાખવા અથવા બંધ રાખવા અંગે યોગ્ય નિર્ણય લેવો. જ્યાં પરિસ્થિતિ પ્રતિકૂળ હોય ત્યાં વિદ્યાર્થીઓની સલામતીના હિતમાં શાળાએ જરૂરી સાવચેતીનો નિર્ણય લેવો. તમામ શાળાઓને અનુરોધ છે કે વાલીઓ અને વિદ્યાર્થીઓને નિર્ણય અંગે સમયસર જાણ કરવામાં આવે તથા કોઈપણ સંજોગોમાં વિદ્યાર્થીઓની સલામતી સાથે સમાધાન ન થાય તેની ખાસ કાળજી રાખવી.

બનાસકાંઠાઃ અંબાજીમાં બે દિવસથી વરસાદી માહોલ, રસ્તાઓ પર ફરી વળ્યાં પાણી

બનાસકાંઠાના અંબાજીમાં છેલ્લા બે દિવસથી વરસાદી માહોલ જામ્યો છે. ભારે વરસાદને પગલે અંબાજીના રસ્તાઓ પર પાણી ફરી વળ્યાં છે, જ્યારે હાઇવે પણ પાણીમાં ગરકાવ થતાં વાહનચાલકોને મુશ્કેલીનો સામનો કરવો પડી રહ્યો છે. ગટરો ઉભરાતા રસ્તાઓ પર ગંદકી ફેલાઈ જતાં સ્થાનિકોને હાલાકી પડી રહી છે. જોકે, વરસાદથી લોકોને ગરમીમાંથી આંશિક રાહત મળી છે. લાંબા સમય બાદ સારો વરસાદ થતાં ખેડૂતોમાં પણ ખુશીનો માહોલ જોવા મળી રહ્યો છે.

ખેડા: નડિયાદમાં 3 ઈંચ વરસાદમાં જ મનપાની પોલ ખુલી, અનેક વિસ્તારો જળમગ્ન

નડિયાદમાં માત્ર 3 ઈંચ વરસાદમાં જ વરસાદી પાણીના નિકાલની વ્યવસ્થાની પોલ ખુલી ગઈ છે. શહેરના અનેક વિસ્તારોમાં પાણી ભરાઈ જતાં જનજીવન પ્રભાવિત થયું છે. સંતરામ હોસ્પિટલ રોડ પર ધારાસભ્ય પંકજ દેસાઈના ઘર પાસે કેડસમા પાણી ભરાયા હતા, જ્યારે VKV રોડ જાણે સ્વિમિંગ પુલમાં ફેરવાઈ ગયો હોય તેવા દૃશ્યો સર્જાયા હતા. રસ્તાઓ પર વરસાદી પાણી ભરાતા વાહનચાલકોને ભારે હાલાકીનો સામનો કરવો પડ્યો હતો. ઉપરાંત, સંતરામ હોસ્પિટલમાં સારવાર માટે આવતા દર્દીઓના સગાઓને પણ પાણી ભરાવાના કારણે મુશ્કેલી વેઠવી પડી હતી.

સૌરાષ્ટ્ર-કચ્છને ઘમરોળશે મેઘરાજા, 20 સપ્ટેમ્બર સુધી ભારે વરસાદની આગાહી

વરસાદની રાહ જોઈ રહેલા સૌરાષ્ટ્ર-કચ્છમાં હવે મેઘરાજા ધમાકેદાર બેટિંગ કરે તેવી હવામાન વિભાગે આગાહી કરી છે. હવામાન વિભાગ મુજબ 20 સપ્ટેમ્બર સુધી સૌરાષ્ટ્ર અને કચ્છમાં ભારેથી અત્યંત ભારે વરસાદ પડી શકે છે. ખાસ કરીને સુરેન્દ્રનગર, મોરબી અને રાજકોટમાં અત્યંત ભારે વરસાદની શક્યતા વ્યક્ત કરવામાં આવી છે. આવતીકાલે સૌરાષ્ટ્ર-કચ્છ સહિતના વિસ્તારોમાં ભારે વરસાદ પડી શકે છે. આ ઉપરાંત બનાસકાંઠા, વાવ-થરાદ, પાટણ અને મહેસાણામાં પણ ભારે વરસાદની વકી છે, જ્યારે અમદાવાદ અને દક્ષિણ ગુજરાતમાં પણ મેઘરાજા મન મૂકીને વરસી શકે છે.

અમદાવાદ: પૂર્વ વિસ્તારમાં અનરાધાર વરસાદથી જળભરાવ, હાટકેશ્વરમાં ટ્રાફિક જામ

અમદાવાદ શહેરના પૂર્વ વિસ્તારમાં અનરાધાર વરસાદને પગલે અનેક સ્થળોએ જળભરાવની સ્થિતિ સર્જાઈ છે. હાટકેશ્વર સર્કલ પાસે વરસાદી પાણી ભરાઈ જતાં વાહનચાલકો અને સ્થાનિકોને ભારે હાલાકીનો સામનો કરવો પડી રહ્યો છે. હાટકેશ્વર વિસ્તારમાં છેલ્લા એક કલાકથી વધુ સમયથી ટ્રાફિક જામની સ્થિતિ જોવા મળી રહી છે. હાટકેશ્વરથી ખોખરા સુધી 2થી 3 કિલોમીટર લાંબો ટ્રાફિક જામ સર્જાતા વાહનચાલકો અટવાયા છે.

અમદાવાદ: ભારે વરસાદથી વેજલપુર જળમગ્ન, શ્રીનંદનગરમાં ઘૂંટણસમા પાણી

અમદાવાદના વેજલપુર વિસ્તારમાં ભારે વરસાદને પગલે શ્રીનંદનગર સહિતના વિસ્તારો જળમગ્ન બન્યા છે. શ્રીનંદનગરમાં ઘૂંટણસમા પાણી ભરાઈ જતાં સ્થાનિકોને અવરજવરમાં ભારે મુશ્કેલી પડી રહી છે. વર્ષોથી પાણી ભરાવાની સમસ્યા હોવા છતાં સ્થિતિમાં કોઈ સુધારો ન થતાં રહીશોમાં રોષ જોવા મળી રહ્યો છે. વરસાદી પાણીના નિકાલ માટે કાયમી ઉકેલ લાવવામાં મનપા તંત્ર નિષ્ફળ રહ્યું હોવાનો આક્ષેપ કરી સ્થાનિકોએ તંત્ર સામે નારાજગી વ્યક્ત કરી છે.

મહેસાણા: વિજાપુર પંથકમાં ધોધમાર વરસાદ, રસ્તાઓ પર વહ્યાં પાણી

મહેસાણાના વિજાપુર પંથકમાં મેઘરાજાએ ધમાકેદાર બેટિંગ કરતાં વિજાપુર શહેર સહિત આસપાસના ગ્રામ્ય વિસ્તારોમાં ધોધમાર વરસાદ વરસ્યો છે. ભારે વરસાદને પગલે અનેક રસ્તાઓ પર પાણી વહેતા થયા હતા, જ્યારે વિજાપુર શહેરના ટીબી રોડ, ખત્રીકુવા સહિતના વિસ્તારોમાં પાણી ભરાઈ જતાં લોકોને હાલાકીનો સામનો કરવો પડ્યો હતો. બીજી તરફ, સારા વરસાદથી કપાસ અને મગફળીના પાકને નવું જીવનદાન મળતાં ખેડૂતોમાં ખુશીની લહેર જોવા મળી રહી છે.

ગાંધીનગરઃ દહેગામમાં મેઘરાજાએ બોલાવ્યા ભૂક્કા, શહેર-ગ્રામ્ય વિસ્તારમાં મુશળધાર વરસાદ

આગામી 48 કલાક રાજ્યને ઘમરોળશે મેઘરાજા, અંબાલાલ પટેલની વરસાદની આગાહી

આગામી 48 કલાક દરમિયાન રાજ્યભરમાં મેઘમહેર થવાની આગાહી હવામાન નિષ્ણાત અંબાલાલ પટેલે કરી છે. 15 અને 16 સપ્ટેમ્બરે સૌરાષ્ટ્ર, દક્ષિણ ગુજરાત અને ઉત્તર ગુજરાતના વિવિધ વિસ્તારોમાં અનરાધાર વરસાદ પડી શકે છે. ઉત્તર સૌરાષ્ટ્ર અને કચ્છમાં પણ સારા વરસાદની શક્યતા વ્યક્ત કરવામાં આવી છે. 14થી 15 સપ્ટેમ્બર દરમિયાન કેટલાક વિસ્તારોમાં હળવાથી મધ્યમ વરસાદ સાથે 3થી 4 ઇંચ સુધી વરસાદ પડી શકે છે, જ્યારે મધ્ય ગુજરાતમાં પણ 4 ઇંચ સુધી વરસાદની શક્યતા છે. પંચમહાલ, દાહોદ, ગોધરા અને છોટાઉદેપુરમાં પણ વરસાદની આગાહી કરવામાં આવી છે. બીજી તરફ, 22થી 26 સપ્ટેમ્બર દરમિયાન બંગાળની ખાડીમાં નવી સિસ્ટમ સક્રિય થવાની શક્યતા છે અને જો આ સિસ્ટમ ગુજરાત તરફ વળશે તો રાજ્યમાં ફરી વરસાદી માહોલ સર્જાઈ શકે છે. આગામી વરસાદથી સુકાઈ રહેલા પાકને જીવતદાન મળવાની આશા ખેડૂતોમાં જાગી છે.

અમદાવાદઃ રામદેવનગરમાં સામાન્ય વરસાદમાં ટ્રાફિકજામ, વાહનચાલકો પરેશાન

અમદાવાદના રામદેવનગર વિસ્તારમાં સામાન્ય વરસાદ દરમિયાન પણ ટ્રાફિકની સમસ્યા સર્જાતા વાહનચાલકોને ભારે હાલાકીનો સામનો કરવો પડી રહ્યો છે. પાણી ભરાયા ન હોવા છતાં અનેક વિસ્તારોમાં વાહનોની લાંબી કતારો લાગી હતી અને લોકો રસ્તા પર અટવાયા હતા. વરસાદ દરમિયાન ટ્રાફિક પોલીસ પણ સ્થળ પર હાજર ન હોવાથી ટ્રાફિક નિયમન વ્યવસ્થા ખોરવાઈ હોવાનું જોવા મળ્યું હતું. યોગ્ય ટ્રાફિક નિયમનના અભાવે વાહનચાલકોને કલાકો સુધી મુશ્કેલી વેઠવી પડી હતી. સમગ્ર ઘટનાના દ્રશ્યો સામે આવતા ટ્રાફિક વ્યવસ્થાને લઈને તંત્રની કામગીરી સામે સવાલો ઉઠી રહ્યા છે.

અમદાવાદઃ રામદેવનગરમાં સામાન્ય વરસાદમાં ઘૂંટણસમા પાણી, તંત્ર સામે રોષ

રાજકોટઃ રૈયા રોડ પર અસામાજિક તત્વોનો આતંક, મેડિકલ સ્ટોરમાં તોડફોડ

અમદાવાદઃ વહેલી સવારથી ઝરમર વરસાદ, શહેર પર કાળા ડિબાંગ વાદળો

અમદાવાદમાં મોડી રાતથી ધીમીધારે વરસાદ વરસી રહ્યો છે, ત્યારે વહેલી સવારથી પણ શહેરના અનેક વિસ્તારોમાં ઝરમર વરસાદ યથાવત રહ્યો છે. શહેરના આકાશમાં કાળા ડિબાંગ વાદળો છવાતા દિવસ દરમિયાન પણ વરસાદી માહોલ રહેવાની શક્યતા છે. દરમિયાન કેટલાક વિસ્તારોમાં ધોધમાર વરસાદના અહેવાલ સામે આવ્યા છે. સતત વરસાદને કારણે વાતાવરણમાં ઠંડક પ્રસરી છે, જ્યારે વહેલી સવારે કામકાજ માટે નીકળેલા લોકોને પણ વરસાદનો સામનો કરવો પડી રહ્યો છે.

દેવભૂમિ દ્વારકાઃ દુષ્કાળના એંધાણ વચ્ચે સારા સમાચાર, કંડોરણા ગામે સૌની યોજનાનું પાણી પહોંચ્યું

દેવભૂમિ દ્વારકા જિલ્લામાં વરસાદના અભાવે દુષ્કાળના એંધાણ વચ્ચે ખેડૂતો માટે રાહતના સમાચાર સામે આવ્યા છે. ખંભાળિયાના કંડોરણા ગામે સૌની યોજનાનું પાણી પહોંચાડવામાં આવ્યું છે. ઝરમર વરસાદ સાથે સૌની યોજનાનું પાણી મળતા ખેડૂતોમાં ખુશીની લહેર જોવા મળી રહી છે. વરસાદના અભાવે સુકાઈ રહેલા ઉભા પાકને હવે પાણી મળતા જીવતદાન મળવાની આશા જાગી છે.

આણંદઃ વાદળછાયા વાતાવરણ બાદ ગાજવીજ સાથે ધોધમાર વરસાદ

આણંદ જિલ્લામાં વાદળછાયા વાતાવરણ બાદ મેઘરાજાએ ધમાકેદાર એન્ટ્રી કરી છે. ગાજવીજ અને ભારે પવન સાથે જિલ્લામાં ધોધમાર વરસાદ વરસતા વાતાવરણમાં ઠંડક પ્રસરી છે. ઉમરેઠ, લીંગડા અને પણસોરા સહિતના વિસ્તારોમાં પણ સારો વરસાદ નોંધાયો છે. અચાનક પડેલા ધોધમાર વરસાદને પગલે રસ્તાઓ પર પાણી વહેતા થયા છે. લાંબા સમયથી વરસાદની રાહ જોઈ રહેલા ધરતીપુત્રોમાં મેઘરાજાની ધમાકેદાર એન્ટ્રીથી ખુશીની લહેર ફરી વળી છે. વરસાદથી ખેતી પાકને પણ ફાયદો થવાની આશા ખેડૂતોમાં જાગી છે.

જૂનાગઢઃ માંગરોળ બંદર પર 3 નંબરનું સિગ્નલ, માછીમારોને દરિયો ન ખેડવા સૂચના

જૂનાગઢના માંગરોળ બંદર પર દરિયામાં કરંટ અને ઊંચા મોજા ઉછળતા 3 નંબરનું સિગ્નલ લગાવવામાં આવ્યું છે. વરસાદી સિસ્ટમની અસરને પગલે દરિયો ગાંડોતૂર બન્યો છે અને દરિયામાં ભારે કરંટ જોવા મળી રહ્યો છે. જેને પગલે તંત્ર દ્વારા માછીમારોને દરિયો ન ખેડવાની સૂચના આપવામાં આવી છે. બીજી તરફ, માંગરોળમાં સતત સારો વરસાદ વરસી રહ્યો છે, જેના કારણે સમગ્ર પંથકમાં વરસાદી માહોલ છવાયો છે. ભારે પવન અને દરિયાના ઉછળતા મોજાને પગલે તંત્ર દ્વારા દરિયાકાંઠાના વિસ્તારોમાં પણ સાવચેતી રાખવામાં આવી રહી છે.

ચોમાસાના અંતિમ રાઉન્ડમાં મેઘરાજાની સાર્વત્રિક બેટિંગ, 240 તાલુકામાં વરસાદ

રાજ્યભરમાં આજે પણ વરસાદનું જોર, 11 જિલ્લાઓમાં ઓરેન્જ એલર્ટ

રાજ્યભરમાં આજે પણ વરસાદનું જોર યથાવત રહેવાની આગાહી છે. ઉત્તર, મધ્ય અને દક્ષિણ ગુજરાતમાં ભારે વરસાદી માહોલ જોવા મળી શકે છે. રાજ્યના 11 જિલ્લાઓમાં અતિભારે વરસાદની આગાહીને પગલે ઓરેન્જ એલર્ટ જાહેર કરવામાં આવ્યું છે. કેટલાક વિસ્તારોમાં ગાજવીજ અને વાવાઝોડા સાથે વરસાદ પડવાની શક્યતા છે. વરસાદ દરમિયાન 40 કિમી પ્રતિ કલાકની ઝડપે પવન ફૂંકાવાની પણ શક્યતા છે. જ્યારે અમદાવાદ, કચ્છ, મોરબી, ડાંગ અને વડોદરા સહિતના વિસ્તારોમાં યલો એલર્ટ આપવામાં આવ્યું છે. કચ્છ અને સૌરાષ્ટ્રના કેટલાક વિસ્તારોમાં પણ હળવાથી મધ્યમ વરસાદની સંભાવના વ્યક્ત કરવામાં આવી છે.