વિકાસ…. વાયદા… વાતો અને વિવાદ. ચારેય શબ્દો હાલ અમદાવાદ શહેરની ગલીએ ગલીએ ગૂંજી રહ્યા છે. તેની પાછળનું કારણ છે અમદાવાદ મહાનગરપાલિકાના સત્તાધીશોની અણઆવડત. છેલ્લા બે બજેટમાં મનપાના સત્તાધીશો મોટા મોટા પ્રોજેક્ટની જાહેરાત તો કરી દે છે પરંતુ નવું બજેટ જાહેર થવાને થોડો સમય બાકી છે. છતાં હજુ સુધી મોટા પ્રોજેક્ટની ટેન્ડર પ્રક્રિયા નથી થઈ. ત્યારે સ્માર્ટ સિટીના સ્માર્ટ નાગરિકોએ ભરેલા સ્માર્ટ ટેક્સના બદલામાં તેઓને સ્માર્ટ સુવિધા ક્યારે મળશે? બસ આ સવાલ દરેક શહેરીજનના મનમાં થઈ રહ્યો છે.
અમદાવાદ મહાનગરપાલિકાના સત્તાધિશો વિકાસના નામે માત્ર વાતો કરે છે. દરેક બજેટ વખતે જનતાને મોટા-મોટા સપના દેખાડવામાં આવે છે. પરંતુ સત્તાધિશોએ કરેલા દરેક વચનો તેઓ પુરા કરતા નથી. ત્યારે સવાલ એ છે કે શું વિકાસના નામે માત્ર વહીવટ થઈ રહ્યો છે. સમગ્ર ગુજરાતમાં સૌથી મોટી મહાનગરપાલિકા અમદાવાદ શહેરની છે. જેનુ બજેટ પણ એટલુ જ તગડુ ફાળવવામાં આવે છે અને સત્તાધિશો બજેટની વાહવાહી પણ અપાર કરે છે. પરંતુ હકીકત છે કે સત્તાધિશો વિકાસના નામે માત્ર વચનો અને મોટી મોટા વાતો કરે છે. શહેરના એવા 10 મોટા પ્રોજેક્ટ છે જેના AMCએ માત્ર વાયદા જ કર્યા છે. પરંતુ કામ પુરા કર્યા નથી.
ગુજરાત રાજ્યમાં અમદાવાદ મહાનગરપલિકાનું સૌથી મોટું બજેટ જાહેર થાય છે. પરંતુ તે બજેટ પ્રમાણે નાગરિકોને જે વાયદા કરવામાં આવે છે. તે પ્રોજેક્ટ પુરા કરવામાં AMC ઉણુ ઉતરી શકતું નથી. AMCનું વર્ષ 2025-26 નું વાર્ષિક બજેટ હવે 13 હજાર કરોડની આસપાસ રજુ થશે. પરંતુ પાછલા બે વર્ષના બજેટમાં નાગરિકોને જે વાયદા કર્યા તેના 10 મોટા પ્રોજેક્ટ માત્ર વાયદા સમાન જ રહ્યા અને નાગરિકોને તેનો લાભ પણ મળ્યો નથી. તેવો આક્ષેપ AMC વિપક્ષ નેતાએ કર્યો છે.
હવે એક નજર એવા 10 પ્રોજેક્ટ પર કરીએ જેના પાછલા બે વર્ષ 2023-24 અને વર્ષ 2024-25ના બજેટમાં વાયદા તો કરવામાં આવ્યા પરંતુ તે પ્રોજેક્ટનું ખાતમૂર્હુત પણ નથી થયું.
પ્રોજેક્ટ |
બજેટમાં ફાળવેલ રકમ |
| દરેક વોર્ડ દીઠ 2 વાઈટ ટોપિંગ રોડ | 250 કરોડ |
| તમામ ડ્રેનેજ લાઈનનું રિહેબિલિટેશન | 100 કરોડ |
| કઠવાડામાં ગૌશાળા બનાવવી | 45 કરોડ |
| સરદાર પટેલ સ્ટેડિયમનું નવીનીકરણ | 25 કરોડ |
| આધુનિક આઇકોનિક લેબોરેટરી 20 કરોડ | 20 કરોડ |
| લોટસ ગાર્ડન બનાવવું | 20 કરોડ |
| હયાત સ્મશાનોનું આધુનિકરણ | 15 કરોડ |
| વેટ લેન્ડ ઝોન એટ વાસણા બેરેજ ટૂ વિશાલા બ્રિજ | 10 કરોડ |
| ઝોન દીઠ 2 ડાયાલિસિસ સેન્ટર | 5 કરોડ |
| ઉત્તર પશ્ચિમ ઝોનમાં સ્પોર્ટ્સ કોમ્પ્લેક્સ | 5 કરોડ |
વાયદા કરવામાં આવે છે તે પુરા નથી કરવામાં આવતા તેવી ફરિયાદ પણ નાગરિકો જ કરી રહ્યા છે. ત્યારે આ અંગે મેયરને સવાલ કરતા મેયરે ખૂદ સ્વીકાર્યું કે ઘણા મોટા પ્રોજેક્ટનું કામ બાકી છે. જો કે મેયરનુ ધ્યાન દોરવાનુ ઘટે કે અહીં તો બે વર્ષ એટલે કે 730 દિવસનો સમય થયો. છતાંય તમારાથી આ 10 પ્રોજેક્ટની ટેન્ડર પ્રક્રિયા ન થઈ. ખરેખર આ તો કામ કરવાની પદ્ધતિ પર જ સવાલ ઉભા થઈ રહ્યો છે. અમદાવાદમાં નાગરિકો ટેક્સ સ્માર્ટ ચૂકવે છે. પરંતુ સ્માર્ટ સુવિધાઓથી ક્યાંક વંચિત રહે છે. આગામી દિવસોમાં ફરી હજારો કરોડનું બજેટ તો રજૂ થશે પરંતુ પાછલા વર્ષના બજેટના પ્રોજેક્ટ ક્યારે પૂર્ણ કરશે તે જોવું રહ્યું.
Input Credit- Jignesh Patel- Ahmedabad