બાંગ્લાદેશ પરત ફરતા જ શાકિબની ધરપકડ થશે? ક્રિકેટ બોર્ડે કરી ખાસ અપીલ
બાંગ્લાદેશમાં ગયા મહિને જ શેખ હસીનાની સરકાર પડી ગઈ હતી અને વડા પ્રધાને રાજીનામું આપીને તરત જ દેશ છોડીને ભાગી જવું પડ્યું હતું. શાકિબ અલ હસન શેખ હસીનાની પાર્ટી અવામી લીગનો સાંસદ હતો. આ સમગ્ર ઘટના બાદ તે બાંગ્લાદેશ પરત ફર્યો નથી. તેના વિરુદ્ધ હત્યા કેસમાં એક FIR પણ દાખલ છે, એવામાં બાંગ્લાદેશ પરત ફરતા જ શું તેની ધરપકડ થશે? એ મોટો સવાલ છે.
બાંગ્લાદેશ ક્રિકેટ ટીમનો સ્ટાર ઓલરાઉન્ડર શાકિબ અલ હસન હાલમાં ભારતમાં છે, જ્યાં તે ટેસ્ટ શ્રેણીનો ભાગ છે. આ ટેસ્ટ સિરીઝ આ મહિનાના અંતમાં સમાપ્ત થશે અને બાંગ્લાદેશી ટીમ પોતાના દેશ પરત જશે. પરંતુ સૌથી મોટો સવાલ એ છે કે શું શાકિબ પણ દેશ પરત ફરશે? બાંગ્લાદેશ પરત ફર્યા બાદ શાકિબની ધરપકડ થશે?
હત્યા કેસમાં શાકિબ વિરુદ્ધ FIR
આ સવાલ એટલા માટે ઉભો થઈ રહ્યો છે કારણ કે બાંગ્લાદેશને આવતા મહિને ઘરઆંગણે ટેસ્ટ શ્રેણી રમવાની છે, જેમાં શાકિબની ભાગીદારી અંગે સ્થિતિ સ્પષ્ટ નથી. આવા સમયે બાંગ્લાદેશ ક્રિકેટ બોર્ડે શાકિબને દેશમાં પરત ફરવાની અપીલ કરી છે અને ખાતરી આપી છે કે બાંગ્લાદેશ પરત ફરવા પર તેને કોઈપણ રીતે હેરાન કરવામાં આવશે નહીં.
આ ઘટના બાદથી શાકિબ બાંગ્લાદેશ ગયો નથી
ગત મહિને બાંગ્લાદેશના પૂર્વ વડાપ્રધાન શેખ હસીનાની સરકારના પતન બાદથી દેશમાં ઉથલપાથલ ચાલી રહી છે. શાકિબ અલ હસન આ વર્ષની શરૂઆતમાં હસીનાની અવામી લીગ પાર્ટીમાંથી સાંસદ બન્યા હતા અને સરકારનો ભાગ પણ હતા. થોડા દિવસો બાદ આંદોલનકારી વિદ્યાર્થીના મોતના મામલામાં 147 લોકો સામે હત્યાનો કેસ નોંધવામાં આવ્યો હતો અને આમાં શાકિબને પણ આરોપી બનાવવામાં આવ્યો હતો. આનાથી બધા ચોંકી ગયા. શાકિબ તે સમયે બાંગ્લાદેશમાં હાજર ન હતો પરંતુ આ સમગ્ર ઘટના બાદથી તે પોતાના દેશ પરત આવ્યો નથી.
શાકિબ પરેશાન નહીં થાય: BCB
જ્યારથી શાકિબ વિરુદ્ધ FIR નોંધવામાં આવી છે ત્યારથી એવી અટકળો ચાલી રહી છે કે શું તેની બાંગ્લાદેશ પરત ફરતી વખતે ધરપકડ કરવામાં આવશે? આ ડરને કારણે હજુ પણ શાકિબના બાંગ્લાદેશ પરત ફરવા અંગે શંકા છે અને આ શંકા અને ડરને દૂર કરવા માટે બાંગ્લાદેશ ક્રિકેટ બોર્ડના અધિકારી શહરયાર નફીસે એક અપીલ જારી કરી છે. મંગળવારે નફીસે ઢાકામાં વિશ્વાસ વ્યક્ત કર્યો હતો કે શાકિબ દેશ પરત ફરશે અને તેને કોઈપણ પ્રકારની સમસ્યાનો સામનો કરવો પડશે નહીં. બાંગ્લાદેશી બોર્ડમાં ક્રિકેટ ઓપરેશનના વડા નફીસે જણાવ્યું હતું કે દેશની સરકારના મુખ્ય સલાહકાર, કાયદાકીય સલાહકાર અને રમત સલાહકારે શાકિબના કેસમાં સ્થિતિ એકદમ સ્પષ્ટ કરી દીધી છે કે તેને અથવા કોઈને પણ બિનજરૂરી રીતે હેરાન કરવામાં આવશે નહીં.
શાકિબની ધરપકડ નહીં થાય એવી આશા
નફીસે કહ્યું કે જો શાકિબ ફિટનેસ સંબંધિત સમસ્યાઓથી પીડિત નથી તો શાકિબનું દક્ષિણ આફ્રિકા સામેની હોમ ટેસ્ટ સિરીઝમાં ન રમવાનું કોઈ કારણ નથી. ESPN ક્રિકઈન્ફોના અહેવાલ મુજબ બાંગ્લાદેશના કાયદાકીય સલાહકાર આસિફ નઝરુલે આશા વ્યક્ત કરી હતી કે દેશ પરત ફરવા પર શાકિબની ધરપકડ કરવામાં નહીં આવે. તેણે કહ્યું હતું કે સ્ટાર ઓલરાઉન્ડર સામે માત્ર એક FIR નોંધવામાં આવી છે અને પોલીસને વધુમાં વધુ ધીરજ રાખવાનું કહેવામાં આવ્યું છે. ગયા મહિને હસીનાની સરકાર પડી ત્યારે શાકિબ દેશમાં ન હતો, પરંતુ ત્યારથી તે પાછો ફર્યો નથી.
આ પણ વાંચો: IND vs BAN: બાંગ્લાદેશ સામે કાનપુર ટેસ્ટમાં વિરાટ કોહલી તોડશે 5 મોટા રેકોર્ડ
