IND vs ENG: રોહિત સદીઓની હેટ્રિક ફટકારશે! ‘હિટમેન’ હૈદરાબાદમાં બદલશે ઈતિહાસ
આ વખતે ટીમ ઈન્ડિયાની બેટિંગ લાઈન અપમાં અનુભવી બેટ્સમેનોનો અભાવ છે. વિરાટ કોહલી પ્રથમ અને બીજી ટેસ્ટમાંથી બહાર હોવાને કારણે આ ઉણપ વધુ અનુભવાશે અને આવી સ્થિતિમાં કેપ્ટન રોહિત શર્મા પર પહેલા કરતા વધુ દબાણ રહેશે. જોકે, ઈંગ્લેન્ડ સામેના તેમના તાજેતરના રેકોર્ડને જોતા સારા પ્રદર્શનની અપેક્ષા છે. સાથે જ તેની પાસે ઈંગ્લેન્ડ સામે એક ખાસ સિદ્ધિ હાંસલ કરવાની સારી તક પણ છે.
ભારત અને ઈંગ્લેન્ડ વચ્ચે 25 જાન્યુઆરી ગુરુવારથી 5 ટેસ્ટ મેચની શ્રેણી શરૂ થઈ રહી છે. સિરીઝની પ્રથમ મેચ હૈદરાબાદમાં રમાવાની છે. જો કે આ સિરીઝમાં ટીમ ઈન્ડિયાના સ્પિનરો પર નજર રહેશે, જે ઈંગ્લેન્ડ માટે સૌથી મોટો ખતરો હશે, પરંતુ બેટ્સમેનોની ભૂમિકા પણ મહત્વની રહેશે. સ્ટાર બેટ્સમેન વિરાટ કોહલી પ્રથમ અને બીજી ટેસ્ટ મેચમાં નહીં રમે, જેના કારણે બેટિંગ ક્રમમાં કેપ્ટન રોહિત શર્મા પર વધુ જવાબદારી અને દબાણ રહેશે, પરંતુ તેની સાથે તેની પાસે હેટ્રિક ફટકારવાની પણ તક છે.
ટેસ્ટમાં ઓપનર તરીકે રોહિત સફળ રહ્યો
ટીમ ઈન્ડિયાના કેપ્ટન રોહિતે જ્યારથી ટેસ્ટ ક્રિકેટમાં ઓપનિંગ શરૂ કરી છે ત્યારથી આ ફોર્મેટમાં તેનું પ્રદર્શન શાનદાર રહ્યું છે. પછી જો સામે ઈંગ્લેન્ડની ટીમ હશે તો રોહિત શર્મા વધુ ખુશ થશે કારણ કે આ ટીમ સામે તેનું પ્રદર્શન સારું રહ્યું છે. તાજેતરના વર્ષોમાં, રોહિત ઈંગ્લેન્ડ સામે સૌથી વધુ રન બનાવનાર ખેલાડી રહ્યો છે અને આ વખતે તે સદીઓની ‘હેટ્રિક’ સાથે આ ટ્રેન્ડ ચાલુ રાખવા માંગશે.
રોહિત પાસે સતત ત્રણ શ્રેણીમાં સદી ફટકારવાની તક
હવે તમે વિચારશો કે શું રોહિતે ઈંગ્લેન્ડ સામે સતત 2 ટેસ્ટ સદી ફટકારી હતી? તો જવાબ છે- ના. વાસ્તવમાં, આ હેટ્રિક સળંગ મેચોની નથી, પરંતુ સતત ત્રણ શ્રેણીમાં સદી ફટકારવાની છે. 2021માં જ્યારે ઈંગ્લેન્ડની ટીમ ભારત આવી ત્યારે રોહિતે ચેન્નાઈમાં રમાયેલી બીજી ટેસ્ટમાં શાનદાર સદી ફટકારી હતી. આ પછી તે જ વર્ષે ટીમ ઈન્ડિયાએ ઈંગ્લેન્ડનો પ્રવાસ કર્યો અને રોહિતે લંડનના ઓવલમાં રમાયેલી ચોથી ટેસ્ટમાં પણ સદી ફટકારી.
શું રોહિત હૈદરાબાદમાં ઈતિહાસ બદલશે?
હવે ફરી એકવાર બંને ટીમો આમને-સામને છે અને સતત ત્રીજી શ્રેણીમાં રોહિત પાસે સદી ફટકારવાની તક હશે. આ ટીમ સામે ભૂતકાળના રેકોર્ડને ધ્યાનમાં લેતાં તેની શક્યતા પણ ઘણી વધારે છે. રોહિતે અત્યાર સુધી ઈંગ્લેન્ડ સામે 9 ટેસ્ટમાં 49.80ની એવરેજથી 747 રન બનાવ્યા છે, જેમાં 2 સદી અને 3 અડધી સદી સામેલ છે. આટલું જ નહીં, રોહિત હૈદરાબાદમાં પોતાનો ઈતિહાસ પણ બદલવા માંગશે. રોહિત હજુ સુધી આ મેદાન પર કોઈ ટેસ્ટ રમ્યો નથી, જ્યારે તે 3 ODIમાં માત્ર 72 રન અને 2 T20માં માત્ર 25 રન જ બનાવી શક્યો છે.
આ પણ વાંચો : ગુજરાત ટાઈટન્સના આ ખેલાડીએ 11 વર્ષ બાદ ટીમને બનાવી BBL ચેમ્પિયન, હરાજીમાં લાગી હતી 10 કરોડની બોલી
Latest News Updates
