08 ઓક્ટોબરના મહત્વના સમાચાર : પાકિસ્તાનમાં ફરી લોટની અછત અને મોંઘવારીનો માર, 20 કિલોની થેલીનો ભાવ 3,300 રૂપિયા થયો

રાજકોટના જંગલેશ્વર વિસ્તારમાં આધેડની હત્યાનો ભેદ પોલીસે ઉકેલી બે આરોપીની ધરપકડ કરી છે. પ્રાથમિક તપાસમાં સામે જોવા જેવી બાબતે ત્રણ શખ્સોએ આધેડ પર લોખંડની પાઈપ વડે હુમલો કરી હત્યાને અંજામ આપ્યો હોવાનું સામે આવ્યું છે. પોલીસે બે આરોપીને ઝડપી લીધા છે, જ્યારે એક આરોપી હજુ ફરાર છે. હત્યા પાછળનું ચોક્કસ કારણ જાણવા પોલીસે વધુ તપાસ હાથ ધરી છે.

વડોદરામાં યોજાયેલા વિકસિત ભારત સંકલ્પ ગરબાએ ગીનીસ બુક ઓફ વર્લ્ડ રેકોર્ડમાં સ્થાન મેળવી ઈતિહાસ રચ્યો છે. રાત્રે 11 વાગ્યા બાદ ત્રણ તાલીના તાલે અંદાજે 50 હજાર લોકોએ એકસાથે ગરબા રમીને વિશ્વ રેકોર્ડ બનાવ્યો હતો. ગીનીસ બુક ઓફ વર્લ્ડ રેકોર્ડ તરફથી મ્યુનિસિપલ કમિશનરને પ્રમાણપત્ર એનાયત કરવામાં આવ્યું હતું. આ સિદ્ધિ બાદ લોકગાયક અતુલ પુરોહિતે વર્લ્ડ રેકોર્ડ વડોદરાની જનતાને સમર્પિત કર્યો હતો.

પાકિસ્તાનમાં ફરી એકવાર લોટની અછત અને વધતી મોંઘવારીથી લોકો પરેશાન થયા છે. 20 કિલોની લોટની થેલીનો ભાવ વધીને 3,300 રૂપિયા સુધી પહોંચી ગયો છે, જ્યારે રોટલીનો ભાવ પણ 20 રૂપિયાથી વધીને 30 રૂપિયા થઈ ગયો છે. લોટના વધતા ભાવ વચ્ચે કેટલાક વેપારીઓ પર સંગ્રહખોરી કરવાનો પણ આરોપ લાગી રહ્યો છે. લોટ મોંઘો થતાં સામાન્ય લોકોમાં ભારે રોષ જોવા મળી રહ્યો છે અને સરકાર સામે પણ સવાલો ઉઠી રહ્યા છે.