IPL 2026 ની ઓપનિંગ મેચમાં રમશે વિરાટ કોહલી, જાણો રોહિત-ધોનીની પહેલી મેચ ક્યારે થશે?

IPL 2026 માટે ચાહકોની આતુરતા હવે વધતી જાય છે, કારણ કે લીગની પ્રથમ 20 મેચનું શેડ્યૂલ જાહેર થઈ ગયું છે. સિઝનની પહેલી મેચમાં રોયલ ચેલેન્જર્સ બેંગ્લોર (RCB) અને સનરાઇઝર્સ હૈદરાબાદ (SRH) આમને-સામને આવશે. આ મુકાબલો ખાસ રહેશે કારણ કે તેમાં વિરાટ કોહલી પહેલી મેચથી જ મેદાનમાં ઉતરશે.

કોહલી પહેલી મેચથી જ મેદાનમાં

ગયા સિઝનમાં RCBએ શાનદાર પ્રદર્શન કરીને ખિતાબ જીત્યો હતો. હવે ડિફેન્ડિંગ ચેમ્પિયન તરીકે ટીમ ફરી એકવાર જીતનો સિલસિલો જાળવી રાખવા માગશે. વિરાટ કોહલીએ પણ ગયા સિઝનમાં 657 રન બનાવીને ટીમની જીતમાં મહત્વપૂર્ણ ભૂમિકા ભજવી હતી.

29 માર્ચે મુંબઈ ઈન્ડિયન્સની પહેલી મેચ

બીજી તરફ, મુંબઈ ઈન્ડિયન્સના ચાહકો રોહિત શર્માને મેદાનમાં જોવા આતુર છે. મુંબઈ ઈન્ડિયન્સ IPL 2026 માં પોતાની પહેલી મેચ 29 માર્ચે કોલકાતા નાઈટ રાઇડર્સ સામે રમશે. આ મેચ મુંબઈમાં યોજાશે અને તેમાં રોહિત શર્મા પણ પહેલી વાર આ સીઝનમાં રમતા જોવા મળી શકે છે.

IPL 2026 માં રોહિત પર રહેશે નજર

મુંબઈ ઈન્ડિયન્સે રોહિત શર્માને IPL 2026 માટે ₹16.30 કરોડમાં રિટેન કર્યો છે. રોહિત છેલ્લે ન્યુઝીલેન્ડ સામેની ODI શ્રેણી દરમિયાન રમ્યો હતો, જ્યાં તે ત્રણ મેચમાં કુલ 61 રન જ બનાવી શક્યો હતો. ત્યારથી હવે IPL 2026 રોહિત શર્માની પહેલી મોટી ટુર્નામેન્ટ છે.

30 માર્ચે ધોની મેદાનમાં

ચેન્નાઈ સુપર કિંગ્સના ચાહકો માટે પણ સારા સમાચાર છે. ટીમનો પહેલો મુકાબલો 30 માર્ચે ગુવાહાટીમાં રાજસ્થાન રોયલ્સ સામે રમાશે. આ મેચમાં એમએસ ધોની પણ મેદાનમાં ઉતરવાની સંભાવના છે. CSK એ ધોનીને IPL 2026 માટે ₹4 કરોડમાં રિટેન કર્યો છે.

ધોનીને રમતો જોવા ફેન્સ ઉત્સાહિત

ધોની હવે આંતરરાષ્ટ્રીય ક્રિકેટથી નિવૃત્ત થયા બાદ માત્ર IPLમાં જ રમે છે. ગયા સિઝનમાં તેણે કુલ 196 રન બનાવ્યા હતા, જોકે તેનું પ્રદર્શન ખાસ રહ્યું નહોતું. તેમ છતાં, IPL માં તેમની હાજરી હંમેશા ચાહકો માટે ખાસ આકર્ષણ બની રહે છે અને આ સિઝનમાં પણ તેની બેટિંગ જોવા ચાહકો ઉત્સુક રહેશે.

IPL 2026 Schedule: મુંબઈ ઈન્ડિયન્સ બનશે ચેમ્પિયન? IPL શેડ્યૂલ વિશે 5 ચોંકાવનારી વાતો