ગુજરાતમાં નવા વર્ષે પણ નક્લીની ભરમાર, અમદાવાદમાંથી પકડાયો વધુ એક નક્લી પોલીસ, LCBનો PSI હોવાનુ કહી લોકો સાથે કરતો છેતરપિંડી
અમદાવાદમાં એક વ્યક્તિ નકલી પોલીસ બની છેતરપિંડી કરતો ઝડપાયો છે. પોલીસ ભરતીમાં પસંદગી પામ્યા બાદ ડૉક્ટર પ્રેમિકાના કારણે નોકરી ન સ્વીકારી અને ગુનાઓ કરવા લાગ્યો. તેણે PMJAY યોજનાના નકલી કાર્ડ બનાવ્યા અને છેતરપિંડી કરી. પોલીસે તેની ધરપકડ કરી અનેક ગુનાઓનો પર્દાફાશ કર્યો છે.
અમદાવાદમાં ફરી એક વખત નકલી પોલીસ બની લોકો સાથે છેતરપિંડી કરતો વ્યક્તિ પકડાયો છે. આ વ્યક્તિ નકલી પોલીસ બની બે મહિનાથી એક હોટલમાં રહેતો હતો. નકલી પોલીસ અંગે અસલી પોલીસને શંકા જતા સમગ્ર ભાંડો ફૂટ્યો હતો. એટલું જ નહીં નકલી પોલીસની પૂછપરછ અને તપાસમાં એવા ખુલાસા થયા છે કે જેનાથી પોલીસ પણ ચોંકી ઉઠી હતી.
અમદાવાદ પોલીસના સકંજામાં રહેલા આ આરોપીનું નામ કિરીટ અમીન છે. આરોપી કિરીટ અમીન મૂળ અરવલ્લી જિલ્લાનો રહેવાસી છે. કિરીટ અમીન મણીનગરની હોટલમા ગાંધીનગર એલસીબીના પી.એસ.આઇ હોવાનું જણાવી છેલ્લા બે મહિનાથી રોકાયો હતો. જોકે વાહન ચેકિંગ દરમિયાન કિરીટ અમીન પોલીસ તથા રેવન્યુ વિભાગના બનાવટી ઓળખકાર્ડ સાથે મળી આવતા મણીનગર પોલીસે ધરપકડ કરી છે. આરોપી પાસેથી પોલીસના બે બનાવટી આઈકાર્ડ, ડેપ્યુટી મામલતદારનું પણ એક આઈકાર્ડ મળી આવ્યું છે. જે આઈકાર્ડ તેણે વલસાડના એક યુવક પાસે બનાવ્યા હોવાનું સામે આવ્યું છે. જેથી પોલીસે કિરીટ અમીન વિરુદ્ધ ગુનો દાખલ કરી વધુ તપાસ હાથ ધરી છે.
પોલીએ આરોપીની પૂછપરછ કરતાં હકિકત સામે આવી કે પોતે પોલીસ વિભાગમાં નોકરી કરવા માંગતો હતો. વર્ષ 2012 પોલીસ વિભાગની ભરતીમાં પણ પાસ કરી હતી. જોકે તેની ડોક્ટર પ્રેમિકાએ ગૃહવિભાગમા નોકરીની ના પાડતા તે તાલીમમાં ગયો ના હતો. જે બાદ તેણે એક બાદ એક ગુનાને અંજામ આપ્યા. જેમા આરોપી વિરૂદ્ધમાં અત્યાર સુધીમાં રામોલ, મોડાસા, હિંમતનગર, કેરાલા જીઆઇડીસી, ઠાસરા, ધરમપુર સહિત કુલ 8 ગુના દાખલ થઈ ચૂક્યા છે. જેમા પોલીસ તરીકેની ઓળખ આપી એક કા ડબલ કરવાની લાલચે રૂપિયા પડાવી ફરાર થઈ જતો હતો.
આ ઉપરાંત વર્ષ 2016 માં કિરીટ અમીને અન્ય આરોપી વિનોદ વણઝારા, ભાનુ પંડ્યા સાથે મળીને PMJAY ના બનાવટી કાર્ડ બનાવ્યા હતા. જે ગુનામા કિરિટે તેની પ્રેમિકા સાથે મળી આરોપીઓએ 3000 જેટલા બનાવટી કાર્ડ બનાવ્યા હોવાનું પોલીસ તપાસ દરમિયાન સામે આવ્યું હતુ. જ્યારે વલસાડ જિલ્લાના ધરમપુરમાં એકના ડબલ કરવાની લાલચ આપીને પોતે ડુપ્લીકેટ પોલીસ બની રેડ કરીને ફરિયાદી પાસેથી રૂપિયા ૪૦ લાખ પણ પડાવ્યા હતા. જેમાં તેની સાથે જીતેન્દ્ર પંડ્યા નામનો પોલીસ કર્મચારી પણ સામેલ હતો જેથી તેના વિરોધ પણ કાર્યવાહી કરવામાં આવી હતી.
આરોપી કિરીટ અમીન એમ.એ, બીએડ સાથે પીટીસીનો અભ્યાસ કર્યો છે અને તેના પિતા પણ સિંચાઈ ખાતામાં ઇજનેર તરીકે ફરજ બજાવતા હતા. આરોપી કિરીટનો ભાઈ અને ભાભી પણ સરકારી કર્મચારી છે. જોકે પ્રેમિકાના કારણે પોલીસની નોકરી છોડી તે ગુનેગાર બન્યો. છેલ્લા બે મહિનાથી પોલીસ થી બચવા હોટલમાં રોકાયો હતો તે દરમિયાન તેને ત્રણ લોકો મળવા પણ આવતા હતા. જેથી પોલીસને શંકા છે કે આરોપી અન્ય કોઈ ગુનાને અંજામ આપવાની તૈયારી કરી રહ્યો હતો. જે અંગે પણ પોલીસે વધુ તપાસ શરૂ કરી છે.
