IPL 2024 : જે મેચમાં ધોનીએ રચ્યો ઈતિહાસ, તે જ મેચમાં જાડેજાએ તોડ્યો ધોનીનો જ રેકોર્ડ
ધર્મશાલામાં રમાયેલી મેચમાં ચેન્નાઈ સુપર કિંગ્સે પંજાબ કિંગ્સને 28 રનથી હરાવ્યું હતું. CSKની આ જીત દરમિયાન ધોનીએ ઈતિહાસ રચ્યો અને જાડેજાએ મોટો રેકોર્ડ બનાવ્યો. આ બંને ખેલાડીઓએ એક જ મેચમાં એક જ ટીમ તરફથી રમતા એક-એક રેકોર્ડ બનાવ્યો હતો. જેમાં જાડેજાએ તો ધોનીને જ પાછળ છોડી દીધો હતો.
પહેલા એમએસ ધોની ઈતિહાસ રચે છે અને પછી બીજી જ ક્ષણે જાડેજાએ તેનો મોટો રેકોર્ડ તોડે છે. આ બંને ઘટના 5 મેના રોજ પંજાબ કિંગ્સ સામે રમાયેલી મેચમાં બની હતી. ધોનીએ જે ઈતિહાસ રચ્યો તે ફિલ્ડિંગ વખતે બન્યો. પરંતુ જાડેજાએ તેનો એક રેકોર્ડ તોડ્યો તે ઘટના CSK અને PBKS વચ્ચે રમાયેલી મેચ પછી બની હતી.
ધોની અને જાડેજાના નામે રેકોર્ડ
ધોની દ્વારા રચવામાં આવેલો ઈતિહાસ IPLમાં તેના 150 કેચ પકડવાથી સંબંધિત હતો. આ સાથે જ જાડેજાએ આ મેચમાં પ્લેયર ઓફ ધ મેચનો એવોર્ડ જીતીને ધોનીનો રેકોર્ડ તોડ્યો હતો. પંજાબ સામેની મેચમાં જાડેજાએ બેટ અને બોલ બંનેથી પ્રભાવિત કર્યા, જેના કારણે તેને પ્લેયર ઓફ ધ મેચનો એવોર્ડ આપવામાં આવ્યો.
IPLમાં 150 કેચ ઝડપનાર ધોની પ્રથમ ખેલાડી
જો કે, સૌથી પહેલા ધોનીએ રચેલા ઈતિહાસની વાત કરીએ. તે IPL ઈતિહાસમાં 150 કેચ લેનારો પ્રથમ ખેલાડી બની ગયો છે. ધોનીએ જીતેશ શર્માનો 150મો કેચ લીધો હતો. આ 150 કેચમાંથી ધોનીએ કીપર તરીકે 146 કેચ લીધા છે. તેણે ફિલ્ડર તરીકે 4 કેચ લીધા છે. જો આપણે IPLમાં ધોનીના ઓવરઓલ શિકારની વાત કરીએ તો આ આંકડો 192 છે, જેમાં 150 કેચ અને 42 સ્ટમ્પિંગ સામેલ છે.
જાડેજાએ ધોનીને પાછળ છોડી દીધો
રવીન્દ્ર જાડેજાએ બેટ અને બોલ બંનેથી કમાલ પ્રદર્શન કર્યું. બેટિંગ કરતી વખતે જાડેજાએ 26 બોલમાં 43 રન બનાવ્યા હતા અને જ્યારે તે બોલિંગ કરવા આવ્યો ત્યારે તેણે 4 ઓવરમાં 20 રન આપીને 3 વિકેટ ઝડપી હતી. આ પ્રદર્શન માટે રવીન્દ્ર જાડેજાને પ્લેયર ઓફ ધ મેચ પસંદ કરવામાં આવ્યો હતો. આ રીતે, તે IPLમાં CSK માટે સૌથી વધુ પ્લેયર ઓફ ધ મેચ જીતનાર ખેલાડી બન્યો. અગાઉ તે અને ધોની 15-15 પ્લેયર ઓફ ધ મેચ એવોર્ડ સાથે સંયુક્ત રીતે ટોચ પર હતા.
આ પણ વાંચો : IPL 2024 MI vs SRH: પોઈન્ટ ટેબલમાં ટોપ-4 ટીમો કઈ હશે? આજની મેચના પરિણામ બાદ ચિત્ર લગભગ સ્પષ્ટ થઈ જશે
