25 જુલાઈના મહત્વના સમાચાર : પાટણના સાંતલપુરમાં 24 કલાકમાં 15 ઈંચ વરસાદ, અનેક ગામમાં વરસાદી પાણી ફરી વળતાં જનજીવન પ્રભાવિત

મોરબીમાં ભારે વરસાદ વચ્ચે સગીરનું સફળ રેસ્ક્યૂ

મોરબી જિલ્લામાં ભારે વરસાદ દરમિયાન કાલિન્દ્રી નદીના કોઝવે પર એક સગીર ઘૂંટણ સુધીના ધસમસતા પાણીના પ્રવાહ વચ્ચે ફસાઈ ગયો હતો. ઘટનાની જાણ થતાં સ્થાનિકો અને બચાવ ટીમ તાત્કાલિક સ્થળ પર પહોંચી હતી. ભારે જહેમત બાદ સગીરનું સુરક્ષિત રીતે રેસ્ક્યૂ કરીને તેનો જીવ બચાવવામાં આવ્યો હતો. ભારે વરસાદને પગલે નદી-નાળા અને કોઝવે પર પાણીનો પ્રવાહ વધતા તંત્રએ લોકોને આવા સ્થળોથી દૂર રહેવાની અપીલ કરી છે.

રાજકોટમાં મોજ નદી ગાંડીતૂર બની

રાજકોટ જિલ્લાના જામકંડોરણા પાસેથી પસાર થતી મોજ નદીમાં ભારે વરસાદને પગલે પાણીની ભરપૂર આવક થતાં નદી બે કાંઠે વહેતી થઈ છે. અવિરત વરસાદના કારણે નદીની જળસપાટીમાં સતત વધારો નોંધાઈ રહ્યો છે. પરિસ્થિતિને ધ્યાનમાં રાખીને તંત્રએ લોકોને નદીના પટમાં અવરજવર ન કરવા અપીલ કરી છે. સાથે જ નદી કિનારાના નીચાણવાળા ગામોના લોકોને પણ સાવચેત રહેવા અને જરૂરી હોય તો સુરક્ષિત સ્થળે ખસેડાવા માટે સૂચના આપવામાં આવી છે.

દક્ષિણ ગુજરાતમાં યુદ્ધના ધોરણે રાહત કામગીરી

દક્ષિણ ગુજરાતમાં ભીષણ પૂર વચ્ચે રાહત અને બચાવ કામગીરી યુદ્ધના ધોરણે ચાલી રહી છે. ભારતીય કોસ્ટ ગાર્ડની ટીમે અત્યાર સુધીમાં 170થી વધુ પૂરપીડિતોને સુરક્ષિત સ્થળે ખસેડીને તેમનો જીવ બચાવ્યો છે. દમણ અને દાદરા નગર હવેલીના 11 સ્થળોએ સતત રેસ્ક્યૂ ઓપરેશન હાથ ધરવામાં આવ્યું છે. નવસારી, વલસાડ અને પારડીના પૂરગ્રસ્ત વિસ્તારોમાંથી અનેક લોકોને સલામત સ્થળે સ્થળાંતર કરવામાં આવ્યા છે. ઉપરાંત વેલસ્પન ઔદ્યોગિક વિસ્તારમાં ફસાયેલા અનેક લોકોનું પણ સફળતાપૂર્વક રેસ્ક્યૂ કરવામાં આવતા રાહત કામગીરી સતત ચાલુ રાખવામાં આવી રહી છે.

પાટણમાં વરસાદનો કહેર, 15 ઈંચ જેટલો ધોધમાર વરસાદ