7 ઓક્ટોબરના મહત્વના સમાચાર : ભાયલી દુષ્કર્મના આરોપીઓને જમીનમાં અડધા દાટી મુસ્લિમ કાયદા મુજબ સજા આપવા માગ
આજે 07 ઓક્ટોબરના બ્રેકિંગ ન્યૂઝ, દિવસભરના મોટા અને મહત્વના સમાચાર સૌથી પહેલા જાણવા અને વિવિધ સમાચારના અપડેટ્સ મેળવવા માટે આ પેજને સતત રિફ્રેશ કરતા રહો..
ચેન્નઇમાં મોટી દુર્ઘટના બની છે. મરિના બિચ પર આયોજીત એર શોમાં દોડધામ મચતા 4ના મોત થયા છે, જ્યારે 250થી વધુ ઘાયલ થયા છે. આ કાર્યક્રમમાં 15 લાખ લોકો એકઠા થયા હતા. ગૃહપ્રધાન અમિત શાહ નક્સલ પ્રભાવિત 8 રાજ્યોની સમિક્ષા કરશે. કેન્દ્રીય પ્રધાનો પણ તેમાં હાજર રહેશે. મેઘાલયમાં મૂશળધાર વરસાદથી આફત સર્જાઇ છે. પૂર બાદ ભૂસ્ખલનથી 13ના મોત થયા છે. તો બેંગાલુરૂમાં બારે મેઘ ખાંગા જેવી સ્થિતિ છે. ચોથા નોરતે જૂનાગઢના કેશોદ પંથકમાં ધોધમાર વરસાદ વરસ્યો છે. તો ગીર પંથક ભારે વરસાદથી પાણી પાણી થયું છે. 7થી 15 ઓક્ટોબર દરમિયાન ‘વિકાસ સપ્તાહ’ની ઉજવણી કરવામાં આવશે. મોદી કાર્યકાળના 23 વર્ષ નિમિત્તે ગુજરાત સરકારે નિર્ણય લીધો. રાજ્ય સરકારના કર્મચારીઓને દિવાળી ભેટ મળી છે. 60 હજાર કર્મચારીઓને OPSનો લાભ મળશે. સરકારને 200 કરોડ રુપિયાનું ભારણ પડશે.
LIVE NEWS & UPDATES
-
ઈકો સેન્સેટીવ ઝોનને કારણે ખેડૂતોની સમસ્યાની અમરેલીના ભાજપના ધારાસભ્યોએ વનમંત્રી સમક્ષ કરી રજૂઆત
અમરેલી જિલ્લામાં ઈકો સેન્સેટીવ ઝોનને કારણે ખેડૂતો પડનારી મુશ્કેલીઓથી વાકેફ કરાવવા માટે વિધાનસભાના નાયબ દંડક કૌશિક વેકરીયા, મહેશ કસવાળા અને જે.વી.કાકડીયાએ વન મંત્રી મૂળુભાઈ બેરા સાથે મુલાકાત કરી હતી. ઈકો સેન્સેટીવ ઝોનના કાયદાથી ખેડૂતોને પડનારી મુશ્કેલીઓનું નિવારણ આવે તે અંગે રજૂઆત કરાઈ હતી. તો બીજી બાજુ ખેડુતોને સમજાય તેવી સરળ ભાષામાં ઈકો સેન્સેટીવ ઝોનની સ્પષ્ટતા કરવા તંત્રને ખાસ અનુરોધ કર્યો હતો.
-
ભાયલી સામુહિક દુષ્કર્મ કેસ માટે SITની રચના, આઠ સભ્યોની કરાઈ નિમણૂંક
વડોદરાના ભાયલી સામુહિક દુષ્કર્મ કેસની તપાસ ઝડપથી થાય અને કોર્ટમાં સત્વરે ચાર્જશીટ રજૂ કરવામાં આવે તે માટે, રેન્જ આઈજી સંદીપ સિંધ દ્વારા આઠ સભ્યોની SITની રચના કરાવમાં આવી છે. વડોદરા જિલ્લા પોલીસ વડા રોહન આનંદના નેતૃત્વમાં SIT રચાઈ છે. જેમાં વડોદરા ગ્રામ્યના DYSP બી એચ ચાવડા, વડોદરા ગ્રામ્ય એલસીબીના PI કૃણાલ પટેલ, વડોદરા તાલુકાના PSI ગોહિલ, ત્રણ રાયટર ઉપરાંત LCB ના PSI પેરવી ઓફિસર તરીકેની જવાબદારી નિભાવશે. SIT દ્વારા સામુહિક દુષ્કર્મ કેસની તપાસ અંગેની પ્રગતિને લઈને દૈનિક મોનીટરીંગ કરવામાં આવશે. અગાઉ આ કેસની તપાસ PSI કરતા હતા, હવેથી આ કેસની તપાસ DYSP ચાવડા કરશે.
-
-
ભાયલી દુષ્કર્મના આરોપીઓને જમીનમાં અડધા દાટી મુસ્લિમ કાયદા મુજબ સજા આપવા માગ
વડોદરાના ભાયલીમાં થયેલી દુષ્કર્મની ઘટનાને લઈ મુસ્લિમ સમાજે આરોપીઓને કડકમા કડક સજાની માંગણી કરી છે. આરોપીઓ મુસ્લિમ હોઈ તેઓને તેમને સોંપી દેવા મુસ્લિમ સમાજે માંગણી કરી છે. મુસ્લિમ કાયદા પ્રમાણે તેઓને અડધા જમીનમાં દાંટી સજા આપવામાં આવે તેવી પણ માગણી કરી છે. પર પ્રાંતીયના કારણે વડોદરાના મુસ્લિમ સમાજના લોકો પર કલંક થતું હોવાનો પણ આક્ષેપ લગાવ્યો છે.
-
ભાવનગરના ચિત્રા પાસે અકસ્માતમાં મોપેડ સવાર વિદ્યાર્થિનીનુ મોત
ભાવનગર શહેરના ચિત્રા પાસે અકસ્માતમાં મોપેડ સવાર વિદ્યાર્થિનીનુ મોત થયું છે. કાર ચાલકે પૂરપાટ ઝડપે આવી અકસ્માત સર્જતાં બનાવ સ્થળ પર વિદ્યાર્થિનીનું મોત થયું છે. ઝીલ બારૈયા નામની 18 વર્ષની વિદ્યાર્થિની સિદસર રોડ પર આવેલ ઓઝા ઇન્સ્ટિટયૂટમાં અભ્યાસ કરતી હતી. પોતાના ઘરેથી મોપેડ લઈને સ્કૂલે જઈ રહી હતી એ સમયે અકસ્માત સર્જાયો હતો.
-
મોરબીમાં અલગ અલગ બે બનાવમાં ડૂબી જવાથી 3ના મોત
મોરબીમાં અલગ અલગ બે બનાવમાં ડૂબી જવાથી 3ના મોત થયા છે. જૂના આરટીઓ પુલ પાસે મચ્છુ-3 ડેમમાં ડૂબી જતાં યુવાનનું મોત થયું હતું. મૃતકની ઓળખ કૈલા પરેશ અમૃતલાલ હોવાનું સામે આવ્યું છે. જ્યારે બીજા બનાવમાં મોરબી તાલુકાના ગુંગણ ગામે ખેત તલાવડીમાં ડૂબી જતાં માતા- પુત્રીના મોત થયા છે. વિલાસબેન અને 7 માસની પુત્રી શરીનાનું ડૂબી જવાથી મોત થયું છે.
-
-
CM ભૂપેન્દ્ર પટેલ આવતી કાલે જઇ શકે છે દિલ્હી
સીએમ ભૂપેન્દ્ર પટેલ આવતી કાલે જઇ શકે છે દિલ્હી. PM મોદી સાથે ભૂપેન્દ્ર પટેલ કરી શકે છે મુલાકાત. PM મોદીના સેવાક્ષેત્રના 23 વર્ષ અનુક્રમે ઔપચારિક મુલાકાત કરી શકે છે. મુલાકાત દરમ્યાન ગુજરાતમાં 24 વર્ષ ઉપક્રમે તૈયાર કરાયેલા વિકસિત સપ્તાહ કાર્યક્રમ અંગે થઈ શકે છે ચર્ચાઓ. રાજ્યમાં આગામી સમયના રોડ મેપ અંગે થઈ શકે છે ચર્ચાઓ. ગુજરાતમાં મહત્વના પ્રોજેકટ અને પોલિસી મુદ્દે પણ થઈ શકે છે ચર્ચા.
-
ઇકો સેન્સિટીવ ઝોનનો વિરોધ કરવા તાલાલામાં યોજાઈ ખેડૂતોની મહાસભા
ગીર સોમનાથના તાલાલાના માધુપુર ખાતે ખેડૂત હિત રક્ષક સમિતિ દ્વારા ખેડૂતોની મહાસભાનું આયોજન થયું હતું. આ મહાસભામાં ઇકો સેન્સિટીવ ઝોન વિરોધ મુદ્દે ચર્ચા વિચારણા કરવામાં આવી હતી. મોટી સંખ્યામાં એકઠા થયેલા ખેડૂતોએ ઇકો સેન્સિટીવ ઝોનનો વિરોધ કરવાનું નક્કી કર્યું. કોંગી નેતા હીરા જોટવા, પૂજા વંશ અને કોંગી પ્રમુખ કરશન બારડ પણ ખેડૂતોની બેઠકમાં ઉપસ્થિત રહ્યાં હતા.
-
“JIO” નાં નામે 12 કરોડથી વધુની છેતરપિંડી કરવાના કેસમાં 15 આરોપીઓને કોર્ટમાં રજૂ કરાયા
“JIO” નાં નામે 12 કરોડથી વધુની છેતરપિંડી કરવાના કેસમાં ક્રાઈમ બ્રાંચે પકડેલા 15 આરોપીઓને કોર્ટમાં રજૂ કરાયા છે. ક્રાઇમ બ્રાન્ચની આર્થિક નિવારણ શાખાએ છેતરપિંડી આચરનાર 15 લોકોની ધરપકડ કરી હતી. પકડાયેલા તમામે તમામ 15 આરોપીને કોર્ટમાં રજૂ કરાયા છે. વર્ષ 2018 થી 2024 સુધીમાં રૂ. .12,12,08,770 ની છેતરપિંડી કેસમાં મોટી કાર્યવાહી કરવામાં આવી છે. કુલ 611 થી વધુ ખોટા અને બનાવટી બિલોને સાચા તરીકે અપલોડ કરી ખોટો હિસાબ બતાવીને છેતરપિંડી કરી હોવાની હકીકતના આધારે ધરપકડ કરવામાં આવી છે.
-
અમેરિકન વૈજ્ઞાનિકોને મેડિકલ ક્ષેત્રનો નોબેલ પુરસ્કાર મળ્યો
અમેરિકન વૈજ્ઞાનિકો વિક્ટર એમ્બ્રોસ અને ગેરી રુવકુનને માઇક્રો આરએનએ પરના તેમના કાર્ય માટે મેડિસિનમાં નોબેલ પુરસ્કાર એનાયત કરવામાં આવ્યો છે.
-
અમદાવાદ મહાનગરપાલિકાએ કેમ્બે હોટલને ફટકારી 14.34 કરોડની નોટિસ, મિલકતની કરાશે હરાજી
અમદાવાદ મહાનગરપાલિકાના ટેક્સ વિભાગે, કેમ્બે હોટલને રૂપિયા 14 કરોડ 34 લાખ વસૂલવા માટે નોટિસ ફટકારી છે. કેમ્બે હોટલનો 14.34 કરોડનો મિલકત વેરો બાકી હોવાથી તે વસૂલવા માટે નોટિસ ફટકારવામાં આવી છે. જો નિયત સમય મર્યાદામાં મિલકત વેરાની રકમ ભરવામાં આવી નથી. આથી મહાનગરપાલિકાના ટેક્સ વિભાગે આખરી નોટિસ કેમ્બે હોટલની મિલ્કત પર ચોટાડવામાં આવી છે. આ નોટિસમાં ઉલ્લેખ કરાયો છે કે, બાકી નીકળતી મિલકત વેરાની રકમ ભરવામાં નહીં આવે તો, મિલકતની જાહેર હરાજી કરવામાં આવશે. મહાનગરપાલિકાએ અગાઉ મિલકત વેરો વસૂલવા માટે 6 નોટિસ પાઠવી હતી.
-
ગીર પંથકમાં ઇકોઝોન કાયદા સામેનો રોષ ગરબા સ્વરૂપે વ્યક્ત કરાયો, મહાલડત લડાશે
ગીર પંથકમાં ઇકોઝોન કાયદા સામેનો રોષસ લોકોએ ગરબા સ્વરૂપે વ્યક્ત કર્યો હતો. ગીરના બોરવાવ , વાડલા , ભોજદે સહિતના ગામોમાં નવરાત્રીની ઉજવણીમાં ઇકોઝોન વિરુદ્ધ ગરબા ગાવામાં આવ્યા હતા. ગીર પંથકમાં આ વિસ્તારના ખેડૂતોના મતે, ઇકોઝોન એ કાળો કાયદો છે. જો તેને લાગુ કરવામાં આવશે તો મહા લડતના લડવામાં આવશે.
-
CBIએ કોલકાતાના ડોક્ટર બળાત્કાર અને હત્યા કેસમાં ચાર્જશીટ દાખલ કરી
કોલકાતાની આરજી કર મેડિકલ કોલેજ અને હોસ્પિટલમાં જુનિયર ડોક્ટર સાથે બળાત્કાર અને હત્યાના કેસમાં સીબીઆઈએ ચાર્જશીટ દાખલ કરી છે. તપાસ એજન્સીએ કોલકાતાની સિયાલદહ કોર્ટમાં ચાર્જશીટ દાખલ કરી છે. ચાર્જશીટમાં સંજય રાયને મુખ્ય આરોપી બનાવવામાં આવ્યા છે.
-
કચ્છના ગાંધીધામમાંથી 120 કરોડનું કોકેઈન પકડાયું
કચ્છના ગાંધીધામમાંથી પોલીસે 120 કરોડની કિંમતનું કોકેઈન ઝડપી પાડ્યું છે. ગાંધીધામના ખારીરોહર ખાડી વિસ્તારમાંથી બિનવારસી હાલતમાં કોકેઈનનો જથ્થો મળી આવ્યો છે. બાતમીના આધારે કચ્છ પોલીસે કોકેઈનનો જથ્થો જપ્ત કરીને વધુ તપાસ હાથ ધરી છે.
-
આગામી 7 દિવસ રાજ્યમાં રહેશે સૂકું વાતાવરણ
આગામી 7 દિવસ રાજ્યમાં સૂકું વાતાવરણ રહેશે. બેવડી ઋતુ અંગે હવામાન વિભાગે આગાહી કરી છે. રાજ્યમાં બેવડી ઋતુની અસર જોવા મળશે. રાજ્યમાં વરસાદની શક્યતા નહિવત્ છે. અમદાવાદ-ગાંધીનગરમાં તાપમાનનો પારો વધી શકે છે.
-
અમદાવાદ: મનપાના ટેક્સ વિભાગની કેમ્બે હોટેલને નોટિસ
અમદાવાદ: મનપાના ટેક્સ વિભાગે કેમ્બે હોટેલને નોટિસ ફટકારી છે. 14.34 કરોડનો મિલકત વેરો બાકી હોવાથી નોટિસ ફટકારી છે. મિલકત વેરાની રકમ નહીં ભરે તો હરાજી કરવાનો નોટિસમાં ઉલ્લેખ છે. લાંબા સમયથી પ્રોપર્ટી ટેક્સ બાકી હોવાથી કાર્યવાહી કરી છે. કેમ્બે હોટલનો 14 કરોડ 34 લાખ 37 હજારનો ટેક્સ બાકી છે. મનપાએ અગાઉ 6 નોટિસો કેમ્બે હોટેલને ફટકારી હતી. મનપાએ લગાવેલી નોટિસને હોટેલે દૂર કરવાનો પ્રયત્ન કર્યો.
-
મંગળવારે પ્રદેશ કમલમ ખાતે મહત્વપૂર્ણ બેઠક
મંગળવારે પ્રદેશ કમલમ ખાતે મહત્વપૂર્ણ બેઠક મળશે. ભાજપના સદસ્યતા અભિયાનને લઈ મહત્વની બેઠક મળશે. ભાજપના તમામ MLA, પૂર્વ MLA, સાંસદ, પૂર્વ સાંસદ હાજર રહેશે. ભાજપ જિલ્લા હોદ્દેદારો, મોરચા પ્રમુખ, પ્રદેશ હોદ્દેદારો બેઠકમાં હાજર રહેશે. 15 ઓક્ટોબરે ભાજપ સદસ્યતા અભિયાનનો પ્રથમ ફેઝ પૂર્ણ થશે. અત્યાર સુધીમાં 97 લાખ સભ્યો બન્યા. 2 કરોડ સભ્ય બનાવવાનો છે ગુજરાત ભાજપનો લક્ષ્યાંક છે. ગુજરાતમાં સદસ્યતા અભિયાન હજુ લક્ષ્યાંકથી ઘણું દૂર છે.
-
ગેંગરેપ કેસમાં વડોદરા ક્રાઇમ બ્રાન્ચે પાંચ શખ્સોને ઝડપ્યા
વડોદરા: ભાયલીમાં સગીરા સાથે ગેંગરેપના કેસમાં મોટો ઘટસ્ફોટ થયો છે. ગેંગરેપ કેસમાં વડોદરા ક્રાઇમ બ્રાન્ચે પાંચ શખ્સોને ઝડપ્યા છે. પાંચમાંથી ત્રણ આરોપીઓ વિધર્મી અને મૂળ ઉત્તર પ્રદેશના રહેવાસી છે. આરોપીઓ વડોદરાના તાંદલજામાં રહી કડીયાકામ કરતા હતા. પોલીસે આરોપીઓના મોબાઈલ સહિતના પુરાવા જપ્ત કર્યા છે. ભાયલીમાં મિત્ર સાથે બેસેલી સગીરા પર બળાત્કાર કર્યો હતો. સુમસાન રોડ પર બેસેલી સગીરા પર ગેંગરેપ કર્યો હતો.
-
ચેન્નઈ: એર શો બાદ નાસભાગમાં 5ના મોત
ચેન્નઈ: એર શો બાદ નાસભાગમાં 5ના મોત થયા છે. 230થી વધુ ઘાયલ, 20ની હાલત ગંભીર છે. એર શોમાં 15 લાખથી પણ વધુ લોકો ઉમટ્યા હોવાનો દાવો છે. ભીડ અને ગરમીને કારણે અનેક લોકો બેભાન થયા હતા. શો ખત્મ થયા બાદ નાસભાગની સ્થિતિ સર્જાઈ. મેટ્રો સહિત, લોકલ ટ્રેનો પ્રવાસીઓથી ખીચોખીચ ભરાઈ હતી. ભારે ભીડને પગલે અનેક લોકોની તબિયત લથડી હતી.
-
મહીસાગર: ગરબા રમ્યા બાદ બાલાસિનોરની યુવતીનું મોત
મહીસાગર: ગરબા રમ્યા બાદ બાલાસિનોરની યુવતીનું મોત થયુ છે. ગરબા રમ્યા બાદ યુવતીને હાર્ટ એટેક આવ્યાની આશંકા છે. ઘરે આવીને સૂઇ ગયા બાદ યુવતી ઉઠી જ નહીં. સવારે હોસ્પિટલ લઇ જતા તબીબે યુવતીને મૃત જાહેર કરી. 22 વર્ષીય યુવતીનું મોત થતા પરિજનોમાં શોકનો માહોલ છે.
-
ભરૂચઃ કારેલી ગામથી જંબુસર જતી બસ વરસાદી કાંસમાં ખાબકી
ભરૂચઃ કારેલી ગામથી જંબુસર જતી બસ વરસાદી કાંસમાં ખાબકી હતી. ચાંદપીર દરગાહ પાસે આ બનાવ બન્યો છે. બસમાં સવાર 15 જેટલા વિદ્યાર્થીઓ ઇજાગ્રસ્ત થયા છે. વિદ્યાર્થીઓને જંબુસર રેફરલ હોસ્પિલમાં દાખલ કરાયા છે.
-
બનાસકાંઠા: બસ અકસ્માતમાં 2થી વધુના મોતની આશંકા
બનાસકાંઠા: બસ અકસ્માતમાં 2થી વધુના મોતની આશંકા છે. અંબાજીના ત્રિશુળિયા ઘાટ પર અકસ્માત સર્જાયો છે. બસમાં સવાર 20થી વધુ લોકોને ઇજા પહોંચી છે. પાલનપુર, દાતા, અંબાજી સહિતની એમ્બ્યુલન્સ સ્થળ પર પહોંચી છે. અંબાજીથી દાતા તરફ આવતી બસને અકસ્માત નડ્યો છે.
-
વડોદરા: PMની સંભવિત મુલાકાતને લઇ પાલિકા લાગ્યું કામે
વડોદરા: PMની સંભવિત મુલાકાતને લઇ પાલિકા કામે લાગ્યું છે. ખોડિયારનગરથી એરક્રાફ્ટ કેરિયરના રસ્તા પર બ્લોક હટાવાયા છે. રસ્તા પર પથરાયેલા પેવર બ્લોક હટાવવાની કામગીરી થઇ રહી છે. ફરી ઉપયોગમાં આવી શકે તેવા પેવર બ્લોક ઉખાડી દેવાયા છે. અધિકારીઓએ રસ્તા સહિતનું સમારકામ હાથ ધર્યું છે.
-
બનાસકાંઠા: અંબાજી ધામમાં ચાચર ચોકમાં ગરબાની રમઝટ
બનાસકાંઠા: અંબાજી ધામમાં ચાચર ચોકમાં ગરબાની રમઝટ જામી હતી. માતાના સાનિધ્યે ગરબા રમવા શ્રદ્ધાળુઓનો ધસારો જોવા મળ્યો. શ્રદ્ધાળુઓના સાગર સામે ચાચર ચોક જાણે નાનો પડ્યો. મંદિર દેવસ્થાન ટ્રસ્ટ, નવયુગ પ્રગતિ મંડળ દ્વારા ગરબાનું આયોજન કરવામાં આવ્યુ છે. પંચમ ગ્રુપના સથવારે ચાચર ચોકમાં ખેલૈયાઓ ગરબે ઘૂમ્યા. અંબાજીના સ્થાનિકો ઉપરાંત શ્રદ્ધાળુઓ પણ ગરબામાં જોડાયા હતા.
-
ગુજરાત ATS અને NCB દિલ્લીએ એક મોટું ઓપરેશન પાર પાડ્યું
મધ્યપ્રદેશની રાજધાની ભોપાલ જઈને ગુજરાત ATS અને NCB દિલ્લીએ એક મોટું ઓપરેશન પાર પાડ્યું. પાડોશી રાજ્યમાં જઈને ATSએ 1800 કરોડથી વધુની કિંમતનું ડ્રગ્સ પકડ્યું છે.. ચૂપચાપ ફેક્ટરીમાં ડ્રગ્સ બનતું હતું અને આસપાસ કોઈને ખ્યાલ જ ન હતો. મધ્યપ્રદેશની પોલીસ તો ઉંઘતી જ ઝડપાઈ, પરંતુ ગુજરાતની પોલીસે કમાલ કર્યો. દરોડામાં 907.019 કિલોગ્રામ MDMA એટલે કે લિક્વિડ અને સોલિડ ફોર્મમાં જથ્થો જપ્ત કર્યો.
-
ભાવનગર: મહુવાના નિકોલબંધારામાં ડૂબી જવાથી એક વ્યક્તિનું મોત
ભાવનગર: મહુવાના નિકોલબંધારામાં ડૂબી જવાથી એક વ્યક્તિનું મોત થયુ છે. સ્થાનિક લોકો અને તરવૈયાઓએ મૃતદેહને બહાર કાઢ્યો છે. બંધાર પરથી પગ લપસી જતા યુવક પાણીમાં ડૂબ્યો હતો. ઘટનાની જાણ થતા જ મામલતદાર તેમજ પોલીસ અને 108 તાત્કાલિક દોડી આવી હતી.
Published On - Oct 07,2024 7:33 AM
