ચૂંટણી કાર્ડમાં ફેરફાર કરાવતા પહેલા રાખો આ સાવચેતી, અજાણી લિંક પરની એક ક્લિક કરી દેશે તમારુ એકાઉન્ટ ખાલી
થોડા દિવસોમાં જ દેશભરમાં લોકસભાની ચૂંટણી યોજાવાની છે. ત્યારે મોટાભાગના લોકો તેમના ચૂંટણી કાર્ડમાં નાં સરનામુ કે અન્ય સુધારા વધારા ઓનલાઈન કરતા હોય છે. જો કે આજકાલ સાયબર ગઠિયાઓ પણ ચૂંટણી કાર્ડમાં સુધારા વધારા કરાવવાની લિંક મોકલી લોકોને છેતરી રહ્યા છે.આવી કોઈપણ લિંક પર ક્લિક કરતા પહેલા રાખજો સાવધાની નહીં તો તમારી એક ક્લિક તમારુ આખુ બેંક અકાઉન્ટ કરી દેશે ખાલી.
તાજેતરમાં લોકસભાની ચૂંટણી આવી રહી છે, ત્યારે રાજ્યમાં મોટાભાગના લોકો પોતાના મતાધિકારનો ઉપયોગ કરવા માટે તેમના ચૂંટણી કાર્ડમાં નામ, સરનામું કે પછી નામ ઉમેરવું કે કમી કરવું જેવી પ્રક્રિયાઓ કરતા હોય છે. ઇલેક્શન કમિશન દ્વારા પણ ખાસ ચૂંટણી કાર્ડમાં આ પ્રમાણેની કામગીરી માટે કવાયત હાથ ધરવામાં આવતી હોય છે. જોકે આ સમયનો લાભ હવે સાઇબર ગઠિયાઓ લઈ રહ્યા છે. સાયબર ગઠિયાઓ ચૂંટણી સમયે વધુ સક્રિય થયા છે અને જે લોકો ઓનલાઈન ચૂંટણી કાર્ડમાં કોઈ ફેરફાર કરાવવા માટે સર્ચ કરે છે તેમના સુધી સાયબર ગઠિયાઓ પહોંચી રૂપિયા પડાવી રહ્યા છે. આ પ્રમાણેના ફ્રોડના અનેક લોકો શિકાર થયા હોવાની પણ માહિતી સામે આવી છે.
ચૂંટણી કાર્ડમાં સુધારા વધારાની લિંક મોકલી સાયબર ગઠિયાઓ પડાવે છે પૈસા
આમ તો સાઇબર ગઠિયાઓ લોકો પાસેથી પૈસા પડાવવા અનેક નવા નવા રસ્તાઓ અપનાવતા આવ્યા છે, ત્યારે હવે સમગ્ર દેશમાં ચૂંટણીનો માહોલ પણ જામ્યો છે અને ચૂંટણીની જાહેરાત પણ થઈ ચૂકી છે. આવા સમયે લોકો પાસેથી રૂપિયા પડાવવા સાઇબર ગઠિયાઓએ નવો રસ્તો અપનાવ્યો છે. સામાન્ય રીતે ચૂંટણી નજીક આવતી હોય છે ત્યારે લોકો તેમના ચૂંટણી કાર્ડમાં કોઈ જરૂરી ફેરફાર અથવા તો નવું નામ ઉમેરવું સહિતની સામાન્ય પ્રક્રિયાઓ કરતા હોય છે, ત્યારે આ સમયનો લાભ હવે સાયબર ગઠિયાઓ ઉઠાવી રહ્યા છે. સામાન્ય નાગરિક પોતાના ચૂંટણી કાર્ડમાં કોઈપણ પ્રકારનો ફેરફાર કરવા માટે સૌ પહેલા ઓનલાઇન સર્ચ કરતા હોય છે, ત્યારે સાયબર ગઠિયાઓ હવે આવા લોકો સુધી પહોંચી રહ્યા છે. જે કોઈ વ્યક્તિ કોઈપણ ઓનલાઇન માધ્યમથી ચૂંટણી કાર્ડમાં ફેરફાર કરાવવા સર્ચ કરે છે. સાઇબર ગઠિયાઓ તેવા લોકો સુધી તેને મેસેજ દ્વારા લિંક મોકલે છે જેના દ્વારા લોકોને તેનું કામ થઈ જશે તેવું જણાવી પૈસા પડાવી રહ્યા છે.
કઈ રીતે સાઇબર ગઠિયાઓ પડાવે છે પૈસા ?
જે રીતે લોકો ઓનલાઈન ચૂંટણી કાર્ડ માં ફેરફાર માટે સર્ચ કરતા હોય છે તેવા લોકો ને સાયબર ગાંઠિયાઓ દ્વારા એક મેસેજ મોકલવામાં આવતો હોય છે જેમાં એક ડમી એટલે કે ખોટી લીંક મોકલવામાં આવતી હોય છે જે બાદ સાયબર ગઠિયાઓ લોકોનો સંપર્ક કરી તેને તે લિંક ઓપન કરી તેમાં તેની માહિતીઓ ભરવા માટે કહેતા હોય છે આ માહિતીઓ ભર્યા બાદ તેમનું કામ થઈ જશે તેવી બાહેંધરી આપતા હોય છે જેના દ્વારા સાયબર ગઠિયાઓ આવા લોકોની તમામ માહિતીઓ મેળવતા હોય છે જે બાદ તેમના એકાઉન્ટ માંથી રૂપિયા પડાવી લે છે આ ઉપરાંત સાયબર ગઠિયાઓ પાસે લોકોની માહિતી આવતા જ તે તેને ચૂંટણી કાર્ડમાં ફેરફાર માટે પૈસા ભરવાનું કહેતા હોય છે અને પોતાના એકાઉન્ટમાં આ પ્રમાણે રૂપિયા જમા કરાવતા હોય છે.
લોકોએ શું ધ્યાન રાખવું
- મહત્વનું છે કે ચૂંટણી કાર્ડમાં કોઈપણ ફેરફાર અથવા નામ ઉમેરવા કે કમી કરવા માટે કોઈ પણ જાતની ફી લેવામાં આવતી નથી.
- કોઈપણ વ્યક્તિ પોતાની નજીકની કલેકટર ઓફિસ કે અન્ય જગ્યાઓ પર ચૂંટણી કાર્ડમાં પોતાનો ફેરફાર કરાવી શકે છે.
- ઇલેક્શન કમિશન દ્વારા બી.એલ.ઓ ની નિમણૂક કરવામાં આવેલી હોય છે જેનો પણ લોકો સંપર્ક કરી શકે છે.
હાલ જે રીતે સાઇબર ગઠિયાઓ સક્રિય થયા છે અને લોકો સુધી પહોંચી તેમની પાસેથી રૂપિયા પડાવવાનો પ્રયત્ન પણ કરવામાં આવી રહ્યો છે, ત્યારે લોકોએ પણ સાવધાની રાખવી જોઈએ અને ઇલેક્શન કમિશનની વેબસાઈટ પર જ કોઈ પણ ચૂંટણી કાર્ડ અંગેની પ્રક્રિયાઓ કરવી જોઈએ અથવા તો નજીકની કલેકટર ઓફિસમાં પહોંચી અને ચૂંટણી કાર્ડ ને લગતી કામગીરી કરવી જોઈએ જેથી લોકો આવા સાઈબર ગઠિયાઓને શિકાર થતાં અટકી શકે.
Latest News Updates
