Breaking News : રીલ્સ અને વીડિયો જોવામાં બિહાર દેશમાં નંબર-1, ગુજરાત કયા ક્રમે? જાણો ડેટા વપરાશનું આખું ગણિત

બિહારમાં દરરોજ 49.1 પેટાબાઇટ્સ ડેટાનો ઉપયોગ થાય છે. જે દેશમાં સૌથી વધુ છે. મહારાષ્ટ્ર બીજા ક્રમે આવે છે અને ઉત્તર પ્રદેશ ત્રીજા ક્રમે છે. 24.3% ડેટા વપરાશ YouTube માં ઉપયોગ થાય છે.

Indians Are Using A Lot Of Data

Dhruval Shah | Updated on: Sep 16, 2026 | 7:55 AM

સ્માર્ટફોન અને આઈપેડ સ્ક્રીન પર કલાકો સુધી સ્ક્રોલ કરવાથી, વિડિઓ સ્ટ્રીમિંગથી અને સોશિયલ મીડિયા પ્રવૃત્તિમાં વધારો થવાથી દેશમાં ઇન્ટરનેટ વપરાશ નવી ઊંચાઈએ પહોંચ્યો છે. રસપ્રદ વાત એ છે કે ટેલિકોમ રેગ્યુલેટર ટ્રાઈ (TRAI)ના તાજેતરના આંકડા અનુસાર બિહારની ટેલિ-ડેન્સિટી એટલે કે વસ્તીના પ્રમાણમાં ફોન કનેક્શન દેશમાં સૌથી ઓછું છે. તેમ છતાં રોજિંદા ડેટા વપરાશમાં બિહાર સૌથી ઉપર છે. સ્પષ્ટ છે કે જેટલા લોકો સુધી ઇન્ટરનેટ પહોંચ્યું છે તેઓ તેનો ભરપૂર ઉપયોગ કરી રહ્યા છે અને રીલ્સ પણ મોટા પ્રમાણમાં જોઈ રહ્યા છે.

બીજા ક્રમે છે મહારાષ્ટ્ર

ટેલિકોમ ક્ષેત્રના આંકડા મુજબ બિહારમાં દરરોજ આશરે 49.1 પેટાબાઇટ ડેટાનો વપરાશ થઈ રહ્યો છે. જે લગભગ 5 કરોડ 14 લાખ જીબી જેટલો છે. આ લિસ્ટમાં મહારાષ્ટ્ર 48.7 PB સાથે બીજા અને ઉત્તર પ્રદેશ (પૂર્વ વિસ્તાર) 42.31 PB સાથે ત્રીજો ક્રમ ધરાવે છે. ત્યારબાદ ગુજરાત 42.2 PB અને મધ્ય પ્રદેશ 41.3 PB સાથે આવે છે.

શું જોવામાં સૌથી વધુ ડેટા ખર્ચાઈ રહ્યો છે?

દેશભરના ઇન્ટરનેટ યુઝર્સની પહેલી પસંદ હજુ પણ યુટ્યુબ છે. કુલ ડેટા વપરાશમાં યુટ્યુબનો હિસ્સો 24.3% છે. એટલે કે ઇન્ટરનેટ પર વપરાતા ડેટાનો લગભગ ચોથો ભાગ માત્ર યુટ્યુબ પર વીડિયો જોવા માટે ખર્ચાય છે. ઇન્સ્ટાગ્રામ 21.7% હિસ્સા સાથે બીજા અને ફેસબુક 17.5% સાથે ત્રીજા ક્રમે છે. ત્યારબાદ ગૂગલ પર સર્ચિંગ અને અન્ય ઓનલાઈન પ્રવૃત્તિઓનો 5.2% અને વોટ્સએપનો 3.5% હિસ્સો છે.

ડેટા વપરાશ વધવાની ત્રણ મોટી કારણો

વીડિયો સ્ટ્રીમિંગ: યુટ્યુબ, નેટફ્લિક્સ જેવા OTT એપ્સ પર વીડિયો જોવાથી સૌથી વધુ ડેટા ખર્ચાય છે. સોશિયલ મીડિયા: ઇન્સ્ટાગ્રામ અને ફેસબુક પર રીલ્સ તથા ફોટા જોવામાં પણ સતત ડેટા વપરાતો રહે છે. ડાઉનલોડિંગ અને ઓટો-અપડેટ: મોટી ફાઇલો ડાઉનલોડ કરવાથી અથવા એપ્સને ઓટો-અપડેટ પર રાખવાથી ડેટા ઝડપથી ખતમ થાય છે.

ભારતીયો મહિનામાં કેટલો ડેટા વાપરે છે?

એરિક્સનની જૂન 2026 ની મોબિલિટી રિપોર્ટ અનુસાર, ભારતમાં દરેક સ્માર્ટફોન યુઝર સરેરાશ દર મહિને 37 જીબી ડેટાનો ઉપયોગ કરી રહ્યો છે. આગામી પાંચ વર્ષમાં આ આંકડો વધીને 70 જીબી સુધી પહોંચવાનો અંદાજ છે. રિપોર્ટ અનુસાર સસ્તા 5G ડિવાઇસ, વધુ સારા નેટવર્ક કવરેજ અને ફિક્સ્ડ વાયરલેસ એક્સેસ (FWA) સેવાઓની વધતી માંગને કારણે 2031 સુધીમાં ભારતમાં 5G સબ્સ્ક્રિપ્શન 1.10 અબજથી વધુ થઈ શકે છે. એટલે કે કુલ સબ્સ્ક્રિપ્શનમાં તેનો હિસ્સો લગભગ 81% સુધી પહોંચી શકે છે.