ક્યારે અને કેવી રીતે કરશો 7 પવિત્ર જ્યોતિર્લિંગના દર્શન ? જાણો IRCTC ના આ ખાસ ‘ભારત ગૌરવ’ પેકેજની વિગતો
શ્રદ્ધાળુઓ માટે IRCTC એક અદભૂત ટૂર પેકેજ લઈને આવ્યું છે, જેમાં માત્ર 23,505 રૂપિયાથી શરૂ કરીને 7 જ્યોતિર્લિંગોની યાત્રા કરી શકાશે. જમવા અને વીમાની સુવિધા પેકેજમાં જ સામેલ છે, જે શ્રદ્ધાળુઓ માટે સુવર્ણ તક સમાન છે.
જો તમે ભગવાન શિવના પવિત્ર જ્યોતિર્લિંગોના દર્શન કરવાનું વિચારી રહ્યા છો, તો ઇન્ડિયન રેલવે કેટરિંગ એન્ડ ટુરિઝમ કોર્પોરેશન (IRCTC) તમારા માટે એક ખાસ ભેટ લઈને આવ્યું છે. ‘ભારત ગૌરવ’ ટૂરિસ્ટ ટ્રેન દ્વારા આયોજિત આ યાત્રા મે 2026 માં શરૂ થશે, જે શ્રદ્ધાળુઓને દેશના વિભિન્ન ખૂણે આવેલા સાત જ્યોતિર્લિંગોના દર્શન કરાવશે.
ક્યારે શરૂ થશે યાત્રા અને કેટલો સમય ચાલશે?
આ ટૂર પેકેજ કુલ 11 રાત અને 12 દિવસનું રહેશે. યાત્રાની શરૂઆત 28 મે 2026 ના રોજ દિલ્હીના સફદરજંગ રેલવે સ્ટેશનથી થશે. આ ટ્રેનમાં એસી અને સ્લીપર ક્લાસની સુવિધા ઉપલબ્ધ છે અને કુલ 750 મુસાફરો આ પવિત્ર યાત્રાનો લાભ લઈ શકશે.
કયા 7 જ્યોતિર્લિંગના થશે દર્શન?
આ પેકેજ અંતર્ગત શ્રદ્ધાળુઓને નીચે મુજબના સ્થળોએ દર્શન કરાવવામાં આવશે:
- ઉજ્જૈન: મહાકાલેશ્વર જ્યોતિર્લિંગ, ઓમકારેશ્વર જ્યોતિર્લિંગ
- વેરાવળ: સોમનાથ જ્યોતિર્લિંગ
- નાસિક: ત્ર્યંબકેશ્વર જ્યોતિર્લિંગ
- પુણે: ભીમાશંકર જ્યોતિર્લિંગ,
- દ્વારકા: નાગેશ્વર જ્યોતિર્લિંગ (સાથે બેટ દ્વારકા અને દ્વારકાધીશ મંદિર)
- છત્રપતિ સંભાજીનગર: ઘૃષ્ણેશ્વર જ્યોતિર્લિંગ
ભાડું અને સુવિધાઓની વિગત
યાત્રા માટે અલગ-અલગ ક્લાસ મુજબ ભાડું નક્કી કરવામાં આવ્યું છે:
- સ્લીપર ક્લાસ: 23,505 રૂપિયા પ્રતિ વ્યક્તિ.
- થર્ડ એસી: 36,560 રૂપિયા પ્રતિ વ્યક્તિ.
- સેકન્ડ એસી: 48,500 રૂપિયા પ્રતિ વ્યક્તિ.
આ કિંમતમાં ટ્રેન ટિકિટ ઉપરાંત શાકાહારી ભોજન, બજેટ હોટલોમાં રહેવાની વ્યવસ્થા, જોવાલાયક સ્થળો માટે એસી કે નોન-એસી વાહનોની સુવિધા, ટ્રાવેલ ઇન્શ્યોરન્સ અને IRCTC ટૂર મેનેજરની સેવાઓનો સમાવેશ થાય છે. એટલે કે, એકવાર ટિકિટ બુક કરાવ્યા પછી ખાવા-પીવા કે રહેવા માટે કોઈ અલગ ખર્ચ કરવાની જરૂર રહેશે નહીં.
બુકિંગ કેવી રીતે કરાવશો?
આ પેકેજ માટે બુકિંગ ‘વહેલા તે પહેલા’ ના ધોરણે કરવામાં આવશે. રસ ધરાવતા શ્રદ્ધાળુઓ IRCTC ની સત્તાવાર વેબસાઇટ પર જઈને ઓનલાઈન ટિકિટ બુક કરી શકે છે.
સસ્તું અને સુરક્ષિત ધાર્મિક પ્રવાસ
મોંઘવારીના જમાનામાં રહેવા અને જમવાની ફ્રી સુવિધા સાથે સાત જ્યોતિર્લિંગોની યાત્રા કરવી એ શિવભક્તો માટે મોટી રાહત સમાન છે. ભારતની સાંસ્કૃતિક વિરાસત અને તીર્થધામોને પ્રોત્સાહન આપવા માટે આ ભારત ગૌરવ ટ્રેન એક મહત્વનું કદમ છે.
શું લોકો પાયલટ રાત્રે દારૂ પીને બીજા દિવસે ડ્યૂટી પર આવી શકે? આ ભૂલ તેને આખી જિંદગી ભારે પડી શકે છે!
