IPL ખેલાડીઓ ધર્મશાલાથી દિલ્હી પહોંચ્યા, સુખ સુવિધાથી વંચિત ટ્રેનમાં આવવું પડ્યું
ગુરુવારે રાત્રે ધર્મશાળામાં પંજાબ કિંગ્સ અને દિલ્હી કેપિટલ્સ વચ્ચે રમાયેલી મેચ અધવચ્ચે જ રદ્દ કરવામાં આવી હતી. આ પછી, ધર્મશાલાથી બધા ખેલાડીઓ, મેચ અધિકારીઓ અને પ્રસારણ કરનારા લોકોને બહાર કાઢવાના પ્રયાસો શરૂ કરવામાં આવ્યા હતા. 9 મે શુક્રવારે BCCIએ ખાસ ટ્રેન દ્વારા તમામને સુરક્ષિત રીતે દિલ્હી પહોંચાડ્યા હતા.
ભારત-પાકિસ્તાન વચ્ચે યુદ્ધની સ્થિતિ વચ્ચે IPL 2025 સ્થગિત કરવામાં આવ્યું છે. ભારતીય ક્રિકેટ કંટ્રોલ બોર્ડે શુક્રવાર, 9 મેના રોજ આ જાહેરાત કરી હતી. આ જાહેરાત પહેલા, 8 મેના રોજ ધર્મશાલામાં રમાઈ રહેલી પંજાબ કિંગ્સ અને દિલ્હી કેપિટલ્સ વચ્ચેની મેચ અધવચ્ચે જ રદ્દ કરવામાં આવી હતી. હવે BCCIએ સ્થાનિક વહીવટીતંત્ર અને રેલ્વે મંત્રાલયની મદદથી આ કાર્ય સફળતાપૂર્વક પૂર્ણ કર્યું છે. શુક્રવારે, બધા ખેલાડીઓ, મેચ અધિકારીઓ અને પ્રસારણ સાથે સંકળાયેલા લોકોને ખાસ ટ્રેન દ્વારા સુરક્ષિત રીતે દિલ્હી લઈ જવામાં આવ્યા હતા.
ખેલાડીઓ ધર્મશાલાથી દિલ્હી પહોંચ્યા
ગુરુવારે રાત્રે, પાકિસ્તાને ડ્રોન અને મિસાઈલોનો ઉપયોગ કરીને ધર્મશાલાથી થોડા કિલોમીટર દૂર અનેક શહેરો પર હુમલો કર્યો હતો. આ કારણે, ભારતીય બોર્ડે IPL 2025ની 58મી મેચ અધવચ્ચે જ રદ્દ કરી દીધી હતી. ત્યારથી, બધાની નજર BCCI આ પરિસ્થિતિ વચ્ચે ખેલાડીઓ અને અધિકારીઓને કેવી રીતે સુરક્ષિત રીતે બહાર કાઢશે તેના પર હતી. શુક્રવારે સવારે, હિમાચલ પ્રદેશ પોલીસ અને પંજાબ પોલીસની મદદથી, આ કાર્ય કોઈપણ સમસ્યા વિના પૂર્ણ થયું હતું.
ખાસ વંદે ભારત ટ્રેન દ્વારા પહોંચ્યા
ખાસ વંદે ભારત ટ્રેનની મદદથી તમામ ખેલાડીઓને સુરક્ષિત રીતે દિલ્હી લાવવામાં આવ્યા હતા. BCCIએ ખૂબ જ ઓછા સમયમાં ટ્રેનની વ્યવસ્થા કરવા બદલ રેલ્વે મંત્રી અશ્વિની વૈષ્ણવનો પણ આભાર માન્યો હતો. દિલ્હી કેપિટલ્સના સ્પિનર કુલદીપ યાદવે પણ જણાવ્યું કે કેવી રીતે દરેક માટે ઝડપથી વ્યવસ્થા કરવામાં આવી હતી.
ધર્મશાળાથી ખેલાડીઓ આ રીતે પહોંચ્યા
PTIના અહેવાલ મુજબ, કાંગડા જિલ્લાના એસપી શાલિની અગ્નિહોત્રીએ જણાવ્યું હતું કે શુક્રવારે સવારે લગભગ 40-50 નાના વાહનોમાં તમામ ખેલાડીઓ, ટીમ અને મેચ અધિકારીઓ અને પ્રસારણ કરનારા લોકોને સુરક્ષિત રીતે હોશિયારપુર લઈ જવામાં આવ્યા હતા. આ દરમિયાન રાજ્ય પોલીસનો કાફલો પણ તેમની સાથે હતો. હોશિયારપુરથી, પંજાબ પોલીસે કાફલાની સુરક્ષા સંભાળી અને ત્યાંથી બધાને જલંધર લઈ જવામાં આવ્યા, જ્યાં એક ખાસ ટ્રેન પહેલેથી જ તૈયાર હતી.
આ પણ વાંચો: દેશ માટે રમનાર આ ખેલાડી દેશની વિરોધમાં કરી રહ્યો છે વાત, શું સાબિત કરવા માંગે છે દેશ સાથે ગદ્દારી ?
ક્રિકેટ સહિત રમતગમતના દરેક સમાચાર વાંચવા અહીં ક્લિક કરો
