IPL 2024: હોમ ગ્રાઉન્ડ પર દિલ્હીની કારમી હાર, સનરાઈઝર્સ હૈદરાબાદે 67 રને હરાવ્યું
સનરાઈઝર્સ હૈદરાબાદે દિલ્હીને 67 રને હરાવ્યું હતું. સતત 2 મેચ જીત્યા બાદ દિલ્હી કેપિટલ્સને હારનો સામનો કરવા પડ્યો હતો. આ સિઝનની હોમ ગ્રાઉન્ડ પર તેમની પ્રથમ મેચમાં DCને હાર મળી હતી. આ સિઝનમાં દિલ્હીની આ પાંચમી હાર છે, જ્યારે સનરાઈઝર્સ હૈદરાબાદની ચોથી જીત છે. આ જીત સાથે હૈદરાબાદ પોઈન્ટ ટેબલમાં બીજા ક્રમે પહોંચી ગયું છે, જ્યારે દિલ્હી સાતમા સ્થાને પહોંચી ગયું છે.
પેટ કમિન્સના નેતૃત્વમાં સનરાઈઝર્સ હૈદરાબાદનો IPL 2024માં વિસ્ફોટક બેટિંગ, મોટા સ્કોર અને જીતનો સિલસિલો ચાલુ જ છે. મુંબઈ ઈન્ડિયન્સ અને રોયલ ચેલેન્જર્સ બેંગ્લોર બાદ સનરાઈઝર્સે દિલ્હી કેપિટલ્સને રેકોર્ડબ્રેક મેચમાં હરાવ્યું હતું અને સિઝનની ચોથી જીત નોંધાવી હતી. દિલ્હીના અરુણ જેટલી સ્ટેડિયમમાં રમાયેલી આ સિઝનની પ્રથમ મેચમાં ટ્રેવિસ હેડ અને અભિષેક શર્માની જોરદાર બેટિંગના આધારે સનરાઈઝર્સે 266 રનનો જબરદસ્ત સ્કોર કર્યો હતો, જેના જવાબમાં દિલ્હી અથાગ પ્રયત્નો છતાં માત્ર 199 રન જ બનાવી શકી અને 67 રને મેચ હારી ગઈ.
પાવરપ્લેમાં 125 રન બનાવીને તોડ્યો રેકોર્ડ
દિલ્હી કેપિટલ્સે સતત 2 મેચ જીત્યા બાદ આ મેચમાં પ્રવેશ કર્યો હતો અને એવી અપેક્ષા રાખવામાં આવી રહી હતી કે તેઓ ઘરઆંગણે આ સિઝનની પ્રથમ મેચમાં આ ફોર્મ જાળવી રાખવામાં સફળ રહેશે. પરંતુ સનરાઈઝર્સે આવું ન થવા દીધું અને આ મેચની પ્રથમ ઓવરથી જ વિસ્ફોટક બેટિંગ ચાલુ રાખી. હૈદરાબાદ ભલે ત્રીજી વખત સર્વોચ્ચ સ્કોરનો રેકોર્ડ તોડી ન શક્યું, પરંતુ આ ટીમે પાવરપ્લેમાં નવો રેકોર્ડ ચોક્કસ બનાવ્યો.
ટ્રેવિસ હેડ અને અભિષેક શર્માએ કર્યો કમાલ
દર વખતની જેમ તેની શરૂઆત ટ્રેવિસ હેડ અને અભિષેક શર્માએ કરી હતી. બંનેએ ત્રીજી ઓવરમાં જ ટીમના 50 રન અને પાંચમી ઓવરમાં જ 100 રન પૂરા કર્યા હતા. માત્ર IPL જ નહીં, પરંતુ T20 ક્રિકેટના ઈતિહાસમાં પ્રથમ વખત કોઈ ટીમે પ્રથમ 5 ઓવરમાં પોતાના 100 રન પૂરા કર્યા. આ દરમિયાન ટ્રેવિસ હેડે માત્ર 16 બોલમાં અડધી સદી ફટકારી હતી. આ બંનેએ પાવરપ્લેમાં 125 રન બનાવીને કોલકાતા નાઈટ રાઈડર્સ (105 રન)નો રેકોર્ડ પણ તોડ્યો હતો. બંને વચ્ચે 38 બોલમાં 131 રનની પાર્ટનરશિપ થઈ હતી, જે પછી રનની ગતિ અચાનક બંધ થઈ ગઈ હતી.
કુલદીપ યાદવે લીધી વિકેટ
કુલદીપ યાદવે સાતમી ઓવરમાં અભિષેક અને એડન માર્કરામને આઉટ કરીને આ કર્યું. ત્યારબાદ ટૂંક સમયમાં ટ્રેવિસ હેડ સતત બીજી સદી ચૂકી ગયો, જ્યારે હેનરિક ક્લાસેન પણ કંઈ ખાસ કરી શક્યો નહીં. એટલે કે, એક સમયે 300 રનનો સ્કોર આસાનીથી પાર કરી જશે તેવું લાગતી હૈદરાબાદની ઇનિંગ્સ પલટવા લાગી હતી. જોકે, શાહબાઝ અહેમદે માત્ર 29 બોલમાં અણનમ 59 રન બનાવ્યા હતા અને ટીમને 266 રનના વિશાળ સ્કોર સુધી લઈ ગયા હતા.
મેકગર્કનો રેકોર્ડ અડધી સદી
દિલ્હીએ આ વિશાળ સ્કોરનો પીછો કરતા જોરદાર શરૂઆત કરી હતી. પૃથ્વી શોએ પ્રથમ 4 બોલમાં સતત 4 ચોગ્ગા સાથે શરૂઆત કરી હતી. જોકે વોશિંગ્ટન સુંદરના પાંચમાં બોલ પર પોતાની વિકેટ આપી દીધી હતી. ડેવિડ વોર્નર સસ્તામાં આઉટ થયો હતો, પરંતુ યુવા બેટ્સમેન જેક ફ્રેઝર મેકગર્કનો ઈરાદો અલગ હતો. તેણે ત્રીજી ઓવરમાં વોશિંગ્ટન સુંદરની બોલિંગમાં 3 ચોગ્ગા અને 3 છગ્ગા ફટકારીને 30 રન બનાવ્યા હતા. ત્યારબાદ તેણે મયંક માર્કંડેને સતત 3 સિક્સર ફટકારી અને માત્ર 15 બોલમાં અડધી સદી ફટકારી, જે આ સિઝનની સૌથી ઝડપી અડધી સદી સાબિત થઈ.
બાકીના બેટ્સમેનો નિષ્ફળ રહ્યા
મેકગર્ક (65 રન, 18 બોલ, 5 ચોગ્ગા, 7 છગ્ગા) સતત ચોથો છગ્ગો મારવા જતા થયો હતો, ત્યારબાદ અભિષેક પોરેલે (40) એટેકની જવાબદારી લીધી હતી. પરંતુ તેનો એટેક પણ લાંબો સમય ચાલ્યો નહીં અને તે પણ માર્કંડેના બોલ પર સ્ટમ્પ આઉટ થઈ ગયો. આ બંનેની ઈનિંગ્સના આધારે દિલ્હીએ નવમી ઓવર સુધી 134 રન બનાવી લીધા હતા, પરંતુ ત્યાર બાદ કેપ્ટન રિષભ પંત (44) સિવાય કોઈ બેટ્સમેન આવી ઈનિંગ્સ રમી શક્યું નહીં. ડાબા હાથના ફાસ્ટ બોલર ટી નટરાજને (4/19) ઉત્તમ બોલિંગ વડે પરિસ્થિતિને કાબૂમાં લીધી હતી. પંતે કેટલાક શોટ ફટકાર્યા પરંતુ તેણે સંઘર્ષ ચાલુ રાખ્યો. નટરાજને 19મી ઓવરમાં 3 વિકેટ લીધી હતી અને 20મી ઓવરના પહેલા બોલ પર પંતની વિકેટ સાથે દિલ્હીની ઈનિંગનો અંત આવ્યો હતો.
આ પણ વાંચો : IPL 2024: દિનેશ કાર્તિક ગંભીર બન્યો, રોહિત શર્માની મજાક સાચી પાડવાનો નિર્ણય કર્યો, કરી મોટી જાહેરાત
Latest News Updates
