ઉત્તરસંડા ગામ દીકરીઓના વિકાસ માટે પણ ખૂબ કટીબદ્ધ છે. મુંબઈ સ્થિત ગામના જ વતની અને દાતા ડૉ. મોહનભાઈ ઈશ્વરભાઈ પટેલ દ્વારા સુકન્યા સમૃદ્ધિ સ્કીમ હેઠળ કોઈ પણ પ્રકારના ભેદભાવ વિના 4 થી 7 વર્ષની બાળાઓ માટે દીકરી દીઠ રૂ. 11,000 એમ કુલ 349 દીકરીઓના ખાતામાં રૂ. 38,39,000 જમા કરવામાં આવ્યા છે. ઉત્તરસંડા ગ્રામ પંચાયત દ્વારા ડોર ટુ ડોર કચરો કલેક્ટ કરી યોગ્ય નિકાલ કરવામાં આવે છે. ઉપરાંત ઉત્તરસંડાથી આણંદ અને ઉત્તરસંડાથી નડિયાદ તરફ જવા માટે બે નવા બસ સ્ટેન્ડનું અંદાજિત 15 લાખના ખર્ચે નવીનીકરણ કરવામાં આવ્યું છે. તથા ઉત્તરસંડા ગુતાલ રોડ પર ખેડા-આણંદનું બુલેટ ટ્રેનનું સ્ટેશન આપવામાં આવ્યું છે.