વડોદરામાં શહેર ભાજપ પ્રમુખ બનવા ઉમેદવારોનો રાફડો ફાટ્યો, શહેર મહામંત્રી, વર્તમાન પ્રમુખ સહિત 44 ભાજપીઓએ નોંધાવી ઉમેદવારી
વડોદરા શહેર ભાજપના પ્રમુખ પદ માટે 44 ઉમેદવારોએ ઉમેદવારી નોંધાવી છે. વર્તમાન પ્રમુખ, પૂર્વ મેયરો અને શહેર મહામંત્રી સહિત અનેકે દાવેદારી નોંધાવી છે. ઉમેદવારી નોંધાવવાની પ્રક્રિયા દરમિયાન કાર્યાલયમાં વિવાદ પણ સર્જાયો હતો. પૂર્વ કોર્પોરેટર વચ્ચે આક્ષેપ-પ્રતિઆક્ષેપો થયા હતા, પરંતુ ચૂંટણી અધિકારીએ કોઈ ફરિયાદ ન મળી હોવાનું જણાવ્યું છે.
વડોદરા શહેર ભાજપમાં છેલ્લા લાંબા સમયથી ચાલી રહેલી સેન્સ પ્રક્રિયામાં પણ જોવા મળી. વડોદરા શહેર ભાજપ કાર્યાલય ખાતે ઉમેદવારોની સેન્સપ્રક્રિયા અને ફોર્મ સ્વીકારવાની શરૂઆત થઈ છે. ત્યારે સેન્સપ્રક્રિયા દરમિયાન વડોદરા શહેર ભાજપના ઉપપ્રમુખ અને પૂર્વ કોર્પોરેટર વચ્ચે આક્ષેપ-પ્રતિઆક્ષેપો થતાં કાર્યાલય પર સોપો પડી ગયો હતો. પૂર્વ કોર્પોરેટર ગોપી તલાટીએ મહિલાઓનું અપમાન થાય એવું નિવેદન કર્યાનો સુનિતા શુક્લાએ આક્ષેપ કર્યો હતો. જ્યારે પૂર્વ કોર્પોરેટરે ગોપી તલાટીએ બચાવમાં કહ્યું કે, મારી દાવેદારીને નબળી પાડવા માટે ખોટા આક્ષેપો કરાઈ રહ્યા છે.
પૂર્વ કોર્પોરેટર વચ્ચે થયા આક્ષેપ-પ્રતિઆક્ષેપ
પૂર્વ કોર્પોરેટર અને પ્રમુખપદ માટે દાવેદારી કરનાર ગોપી તલાટીએ કહ્યું હતું કે હું કોઈપણ કાર્યકર્તા અંગે બોલ્યો નથી. આક્ષેપો પાયાવિહોણા છે. તેમને એમ લાગતું હશે કે મારી અધ્યક્ષપદ માટેની દાવેદારી વર્તમાન અધ્યક્ષ સાથે કોમ્પિટ થઈ રહી છે એટલે ગંદા આક્ષેપો કરી રહ્યા છે. આ આક્ષેપો કોણ કરાવી રહ્યું છે એ સૌકોઈ જાણે છે અને સુનિતાબેનને પણ ખબર છે. મેં પાર્ટીની પ્રક્રિયા મુજબ મારી ઉમેદવારી નોંધાવી છે. દરેકને આક્ષેપ કરવાનો અધિકાર છે કરી શકે. વડોદરા શહેર ભાજપ-અધ્યક્ષ માટે વર્તમાન પ્રમુખ વિજય શાહે દાવેદારી નોંધાવી હતી. આ ઉપરાંત પૂર્વ સ્ટેન્ડિંગ કમિટીના ચેરમેન હિતેન્દ્ર પટેલ, પૂર્વ મેયર જિગીષાબેન શેઠ અને પૂર્વ મેયર સુનીલ સોલંકી પણ દાવેદારી નોંધાવવા માટે પહોંચ્યાં હતાં.
ચૂંટણી અધિકારીએ વિવાદ અંગે કોઈ ફરિયાદ ન મળી હોવાનું કહ્યુ
વડોદરા શહેર ભાજપ-પ્રમુખની ચૂંટણી માટે નિમાયેલા ચૂંટણી અધિકારી કુશલસિંહ પઢેરિયાએ જણાવ્યું હતું કે બહાર વિખવાદ થયો એ તમને ખબર હશે, અમને અંદર કંઈ ખબર નથી. કોઈએ ફરિયાદ કરી નથી. કોને શિસ્તભંગ કર્યો છે એ તમે બહાર હતા તો તમને ખ્યાલ આવે. અમને ફરિયાદ મળશે તો એ અંગે વિચારીશું. પ્રદેશમાં આ બાબતે ધ્યાન દોરવામાં આવશે.
શહેર પ્રમુખ માટે કોણ રેસમાં?
વડોદરા શહેર ભાજપ પ્રમુખ બનવા માટે વર્તમાન પ્રમુખ ડૉ. વિજય શાહ ડૉ. જીગર ઇનામદાર, શહેર મહામંત્રી સત્યેન કુલાબકર, ડૉ. હિતેન્દ્ર પટેલ પૂર્વ મેયર ભરત શાહ પૂર્વ મેયર સુનિલ સોલંકી, ધર્મેશ પંચાલ સહિત 44ભાજપીઓ એ શહેર પ્રમુખ પદ પર દાવેદારી નોંધાવી હતી.
