શ્વાસ લેવામાં મુશ્કેલી, બર્ડ ફ્લુ જેવા લક્ષણ, ચીનમાં ફેલાઈ રહેલા HMPV વાયરસથી બચવા ICMRS જારી કરી એડવાઈઝરી
હ્યુમન મેટાન્યુમોવાયરસ એક એવો વાયરસ છે જેના મોટાભાગના લક્ષણો સામાન્ય શરદી તાવ જેવા હોય છે. નોર્મલ કેસમાં શરૂઆતી લક્ષણોમાં ઉધરસ, ગળામાં ખરાશ, નાક વહેવુ જોવા લક્ષણો જોવા મળે છે.
વિશ્વભરમાં 70 લાખથી વધુ લોકોના મોતનું કારણ બનેલો ઘાતક કોવિડ- 19ની મહામારી ફેલાયાના બરાબર 5 વર્ષ બાદ ચીનમાં વધુ એક નવા વાયરસે દસ્તક દીધી છે. તેને હ્યુમન મેટાન્યુમોવાયરલ કે HMPV કહેવાઈ રહ્યો છે. આ વાયરસના સંક્રમિત દર્દીઓને શ્વાસ લેવામાં તકલિફ અને ફ્લુ જેવા લક્ષણો જોવા મળી રહ્યા છે.
ઇન્ડિયન કાઉન્સિલ ઓફ મેડિકલ રિસર્ચ (ICMR) એ કર્ણાટકમાં હ્યુમન મેટાપ્યુમોવાયરસ (HMPV) ના બે કેસ ડિટેક્ટ કર્યા છે. સમગ્ર દેશમાં શ્વસન સંબંધી બિમારીઓ પર દેખરેખ રાખવા માટે ICMR દ્વારા ચાલી રહેલા પ્રયાસોના ભાગ રૂપે, બહુવિધ શ્વસન વાયરલ પેથોજેન્સ માટે નિયમિત દેખરેખ દ્વારા બંને કેસોની ઓળખ કરવામાં આવી હતી.
ICMR દ્વારા એ વાત પર ભાર મૂકવામાં આવ્યો છે કે HMPV એ કોઈ નવો વાયરસ નથી. ભારત સહિત વૈશ્વિક સ્તરે પહેલેથી જ છે. અને HMPV સાથે સંકળાયેલ શ્વસન બિમારીના કિસ્સાઓ વિવિધ દેશોમાં નોંધાયા છે. વધુમાં, ICMR અને ઈન્ટિગ્રેટેડ ડિસીઝ સર્વેલન્સ પ્રોગ્રામ (IDSP) નેટવર્કના વર્તમાન ડેટાના આધારે, દેશમાં ઈન્ફલ્યુએન્ઝા જેવી બીમારી (ILI) અથવા ગંભીર તીવ્ર શ્વસન બિમારી (SARI) કેસોમાં કોઈ અસામાન્ય વધારો થયો નથી.
મેટાન્યુમોવાઈરસ (HMPV) વિશે જાણવા જેવી બાબતો
- મેટાન્યુમોવાઈરસ (HMPV) અન્ય શ્વસન વાયરસ જેવો જ વાયરસ છે.
- વર્ષ 2001થી આ વાઈરસની ઓળખ થયેલ છે.
- આ વાઈરસ શિયાળાની ઋતુ દરમિયાન ખાસ કરીને નાના બાળકો અને વૃદ્ધોમાં દેખાય છે અને તેના લક્ષણોમાં સામાન્ય શરદી અને ફલુનો સમાવેશ થાય છે.
સામે આવેલા HMPV કેસોની વિગતો
- 3 મહિનાનું શિશુ, જેને બ્રોન્કોપ્યુનિમોનિયાના હિસ્ટ્રી સાથે બેંગલુરુની બેપ્ટિસ્ટ હોસ્પિટલમાં દાખલ કર્યા પછી HMPV હોવાનું નિદાન થયું હતું. ત્યારથી તેણીને રજા આપવામાં આવી છે.
- 8 મહિનાનું એક શિશુ, જેનું 3 જાન્યુઆરી, 2025 ના રોજ HMPV માટે પોઝિટિવ આવ્યુ, તેને બ્રોન્કોપ્યુનિમોનિયાની હિસ્ટ્રી સાથે, બેંગલુરુની બેપ્ટિસ્ટ હોસ્પિટલમાં દાખલ કર્યા પછી શિશુ હવે સ્વસ્થ થઈ રહ્યું છે.
- જો કે નોંધપાત્ર બાબત એ છે કે આ બંને સંક્રમિત દર્દીઓમાંથી કોઈપણની ઈન્ટરનેશનલ ટ્રાવેલ હિસ્ટ્રી નથી.
કેન્દ્રીય આરોગ્ય મંત્રાલય તમામ ઉપલબ્ધ સર્વેલન્સ ચેનલો દ્વારા પરિસ્થિતિ પર નજર રાખી રહ્યું છે. ICMR આખા વર્ષ દરમિયાન HMPV પરિભ્રમણના વલણોને ટ્રૅક કરવાનું ચાલુ રાખશે. વર્લ્ડ હેલ્થ ઓર્ગેનાઈઝેશન (ડબ્લ્યુએચઓ) પહેલેથી જ ચાલી રહેલા પગલાંને વધુ માહિતી આપવા માટે ચીનની પરિસ્થિતિ અંગે સમયસર અપડેટ્સ પ્રદાન કરી રહ્યું છે. સમગ્ર દેશમાં હાથ ધરવામાં આવેલી તાજેતરની સજ્જતા કવાયત દર્શાવે છે કે ભારત શ્વસન સંબંધી બિમારીઓમાં કોઈપણ સંભવિત વધારાને નિયંત્રિત કરવા માટે સુસજ્જ છે
