11 સપ્ટેમ્બરના મહત્વના સમાચાર : આજથી રાજ્યમાં ફરીથી વરસાદી વાતાવરણ છવાશે, રાજ્યના અનેક જિલ્લામાં હળવાથી મધ્યમ વરસાદની આગાહી

ચીનના પોર્ટમાં જહાજમાં ભીષણ આગ, 25 લોકોના મોત

ચીનના એક પોર્ટ પર શિપયાર્ડમાં રિપેરિંગ માટે આવેલા જહાજમાં અચાનક ભીષણ આગ લાગી હતી. આગ લાગતાની સાથે જ રેસ્ક્યુ ઓપરેશન શરૂ કરવામાં આવ્યું હતું અને બચાવ કામગીરી હાથ ધરવામાં આવી હતી. જોકે, રેસ્ક્યુ ઓપરેશન છતાં આ દુર્ઘટનામાં 25 લોકોના મોત થયા છે. આગ લાઈબેરિયામાં નોંધાયેલા જહાજમાં લાગી હોવાનું સામે આવ્યું છે. જહાજમાં આગ કેવી રીતે લાગી તે અંગે તપાસ શરૂ કરવામાં આવી છે. ઘટનાને પગલે પોર્ટ વિસ્તારમાં ભારે અફરાતફરી મચી ગઈ હતી અને આગના કારણો તેમજ મૃતકોની ઓળખ અંગે પણ તપાસ હાથ ધરાઈ છે.

13-14 સપ્ટેમ્બરે ભારેથી અતિભારે વરસાદની આગાહી

અમદાવાદના પાંચકુવા દરવાજા પાસે ટેક્સટાઇલમાં આગ, ફાયર બ્રિગેડે કાબૂ મેળવ્યો

અમદાવાદના પાંચકુવા દરવાજા પાસે આવેલા ગુરુકૃપા હાઉસ ટેક્સટાઇલમાં આગ લાગવાની ઘટના સામે આવી છે. આગની જાણ થતાં જ ફાયર બ્રિગેડની ટીમો તાત્કાલિક ઘટનાસ્થળે પહોંચી હતી અને આગ પર કાબૂ મેળવવા કામગીરી હાથ ધરી હતી. ફાયર બ્રિગેડની ટીમે સમયસર આગને કાબૂમાં લીધી હતી. સદનસીબે આગની આ ઘટનામાં કોઈ જાનહાનિ થઈ નથી.

મહેસાણાના ખેરાલુના મીયાસણા ગામમાં ફાયરિંગ, ટ્રેક્ટરની ઉઘરાણી મુદ્દે કનુસિંહને પેટમાં ગોળી વાગી

મહેસાણાના ખેરાલુના મીયાસણા ગામમાં ફાયરિંગની ઘટના સામે આવી છે. નંદાલી ગામના કનુસિંહ રાજપૂત પર ટ્રેક્ટરની ઉઘરાણી મામલે જીવલેણ હુમલો કરવામાં આવ્યો હોવાની પ્રાથમિક વિગતો સામે આવી છે. કનુસિંહ ખેતરમાંથી પસાર થઈ રહ્યા હતા ત્યારે ખેતરમાં છુપાયેલા શખ્સે અચાનક ફાયરિંગ કરતા તેમના પેટમાં ગોળી વાગી હતી. ઘટનાને પગલે ઇજાગ્રસ્ત કનુસિંહને તાત્કાલિક સારવાર માટે વડનગર સિવિલ હોસ્પિટલ ખસેડવામાં આવ્યા હતા. જોકે, વધુ સારવાર અને ઓપરેશનની જરૂરિયાત હોવાથી તેમને અમદાવાદ ખસેડવામાં આવ્યા છે. ફાયરિંગની ઘટનાની જાણ થતાં ખેરાલુ પોલીસ ઘટનાસ્થળે દોડી ગઈ હતી અને સમગ્ર મામલે વધુ તપાસ હાથ ધરી છે.

અમેરિકા-ઈરાન સંઘર્ષ વચ્ચે ક્રૂડ ઓઇલના ભાવમાં ભડકો, બ્રેન્ટ 108 ડોલરને પાર

અમેરિકા અને ઈરાન વચ્ચે વધી રહેલા સંઘર્ષની સીધી અસર આંતરરાષ્ટ્રીય ક્રૂડ ઓઇલ બજાર પર જોવા મળી રહી છે. વૈશ્વિક બજારમાં બ્રેન્ટ ક્રૂડ ઓઇલનો ભાવ પ્રતિ બેરલ 108 ડોલરને પાર પહોંચી ગયો છે. ગત 25 મે બાદ પ્રથમ વખત બ્રેન્ટ ક્રૂડ આટલી ઊંચી સપાટીએ પહોંચ્યું છે. બીજી તરફ WTI ક્રૂડ ઓઇલનો ભાવ પણ વધીને પ્રતિ બેરલ 102.97 ડોલર થયો છે. અમેરિકા-ઈરાન વચ્ચેના તણાવને કારણે વૈશ્વિક સ્તરે ક્રૂડ ઓઇલના પુરવઠાને લઈને ચિંતા વધી છે, જેના પગલે ભાવમાં વધુ ઉછાળો જોવા મળી રહ્યો છે. ક્રૂડ ઓઇલ મોંઘું થતાં પેટ્રોલ-ડીઝલથી લઈને પરિવહન અને ઉત્પાદન ખર્ચમાં વધારો થવાની શક્યતા છે, જેની સીધી અસર વિશ્વના અનેક દેશોની અર્થવ્યવસ્થા અને મોંઘવારી પર પડી શકે છે.