રેખા ગુપ્તા

રેખા ગુપ્તા દિલ્હીના નવા મુખ્યમંત્રી બન્યા છે. રેખા ગુપ્તા દિલ્હીના શાલીમાર બાગ વિધાનસભા ક્ષેત્રમાંથી ધારાસભ્ય તરીકે ચૂંટાયા છે. તેઓ પ્રથમ વખત ધારાસભ્ય તરીકે ચૂંટાયા છે. તેમનો જન્મ 19 જુલાઈ 1974ના રોજ હરિયાણાના જુલાનામાં થયો હતો. રેખાએ દિલ્હી યુનિવર્સિટીમાંથી કોમર્સમાં ગ્રેજ્યુએશન કર્યું છે. બાદમાં મેનેજમેન્ટ અને આર્ટ્સમાં માસ્ટર્સ કર્યું.

રેખા ગુપ્તાએ પોતાની રાજકીય કારકિર્દી 1993માં અખિલ ભારતીય વિદ્યાર્થી પરિષદ સાથે શરૂ કરી હતી. 1996-1997માં દિલ્હી યુનિવર્સિટી વિદ્યાર્થી સંઘના પ્રમુખ બન્યા. 2007 અને 2012 માં ઉત્તર પીતમપુરા (વોર્ડ 54) થી મ્યુનિસિપલ કાઉન્સિલર તરીકે ચૂંટાયા. આ પછી, તેણીને 2022 માં દિલ્હી મ્યુનિસિપલ કોર્પોરેશન (MCD) ના મેયર પદ માટે ભાજપના ઉમેદવાર તરીકે જાહેર કરવામાં આવી હતી.

રેખા ગુપ્તાએ દિલ્હી વિધાનસભા ચૂંટણીમાં શાલીમાર બાગથી આમ આદમી પાર્ટી (AAP)ના ઉમેદવાર બંદના કુમારીને 29,595 મતોથી હરાવ્યા હતા. તેમણે તેમના વિસ્તારમાં સ્વિમિંગ પૂલ, જિમ, પુસ્તકાલય અને કોમ્યુનિટી હોલ જેવી સુવિધાઓ સ્થાપી છે. રેખા ગુપ્તા દિલ્હીના ચોથી મહિલા મુખ્ય પ્રધાન છે. તેમના પહેલા સુષ્મા સ્વરાજ, શીલા દિક્ષીત અને આતિશી મુખ્યપ્રધાન તરીકે રહી ચૂક્યા છે.