મોહમ્મદ શમીની મોટી જાહેરાત, ભારત પહેલા આ ટીમ માટે રમતો જોવા મળશે
મોહમ્મદ શમીએ 2023 ODI વર્લ્ડ કપ દરમિયાન ટીમ ઈન્ડિયા માટે તેની છેલ્લી મેચ રમી હતી. ત્યારથી તે ઈજાના કારણે મેદાનની બહાર છે. હવે શમીએ પોતે પરત ફરતા ફેન્સ સાથે એક મોટું અપડેટ શેર કર્યું છે.
ભારતીય ટીમનો ફાસ્ટ બોલર મોહમ્મદ શમી વર્લ્ડ કપ 2023થી મેદાનથી દૂર છે. ગયા વર્ષે નવેમ્બર 2023માં રમાયેલા ODI વર્લ્ડ કપ દરમિયાન પગમાં ઈજા થવાથી તે પરેશાન હતો. જે પછી, ફેબ્રુઆરી 2024 માં, તેની પગની ઘૂંટીની ઈજા માટે સફળ સર્જરી કરવામાં આવી. હાલમાં તે મેદાન પર વાપસી કરવા માટે નેશનલ ક્રિકેટ એકેડમીમાં સખત મહેનત કરી રહ્યો છે. તે ટીમ ઈન્ડિયામાં ક્યારે વાપસી કરશે તે હજુ સ્પષ્ટ નથી. આ દરમિયાન મોહમ્મદ શમીએ પોતાની વાપસી પર એક મોટું નિવેદન આપ્યું છે.
શમીએ તેના વાપસી પર મોટું અપડેટ આપ્યું
મોહમ્મદ શમી હાલ બંગાળમાં છે. હાલમાં જ કોલકાતામાં ઈસ્ટ બંગાળ ક્લબ દ્વારા શમીનું સન્માન કરવામાં આવ્યું હતું. આ દરમિયાન તેણે પોતાની વાપસી વિશે વાત કરતા કહ્યું કે તે ટીમ ઈન્ડિયામાં પરત ફરતા પહેલા ઘરેલુ ક્રિકેટ રમી શકે છે.
શમી ડોમેસ્ટિક સિઝનમાં બંગાળ તરફથી રમશે
આ સન્માન સમારોહમાં બોલતા શમીએ કહ્યું, ‘હું ક્યારે પરત ફરીશ તે કહેવું મુશ્કેલ છે. હું ખૂબ મહેનત કરી રહ્યો છું પરંતુ હું ફરીથી ભારતીય જર્સી પહેરું તે પહેલાં તમે મને બંગાળની જર્સીમાં જોશો. હું બંગાળ માટે 2-3 મેચ રમવા આવીશ અને સંપૂર્ણ તૈયારી સાથે આવીશ. મતલબ કે શમી આગામી ડોમેસ્ટિક સિઝનમાં બંગાળની ટીમ માટે રમતો જોવા મળી શકે છે.
ODI વર્લ્ડ કપ દરમિયાન ઈજા વધુ ગંભીર બની
પોતાની ઈજા વિશે વાત કરતા શમીએ કહ્યું, ‘મેં ક્યારેય વિચાર્યું ન હતું કે ઈજા આટલી ખરાબ હશે. મારો પ્લાન T20 વર્લ્ડ કપ પછી આ ઈજા પર કામ કરવાનો હતો. પરંતુ ODI વર્લ્ડ કપ દરમિયાન આ ઈજા વધુ ગંભીર બની ગઈ અને મેં તેની સાથે રમવાનું જોખમ લીધું નહીં. ડોક્ટરોએ પણ વિચાર્યું ન હતું કે ઈજા એટલી ગંભીર થઈ જશે અને તેને સાજા થવામાં આટલો સમય લાગશે. તમને જણાવી દઈએ કે, શમી 2023ના ODI વર્લ્ડ કપનો સૌથી સફળ બોલર હતો. તેણે 7 મેચમાં 24 વિકેટ ઝડપી અને ટીમ ઈન્ડિયાને ફાઈનલમાં પહોંચાડી હતી.
આંતરરાષ્ટ્રીય ક્રિકેટમાં આશ્ચર્યજનક આંકડા
મોહમ્મદ શમીએ ટીમ ઈન્ડિયા માટે અત્યાર સુધીમાં 64 ટેસ્ટ, 101 વનડે અને 23 T20 મેચ રમી છે. તેણે ટેસ્ટમાં 229, વનડેમાં 195 અને T20માં 24 વિકેટ ઝડપી છે. આ દરમિયાન તેણે 11 વખત એક ઈનિંગમાં 5 વિકેટ લેવાની સિદ્ધિ હાંસલ કરી છે. શમીએ આંતરરાષ્ટ્રીય ક્રિકેટમાં 970 રન પણ બનાવ્યા છે, જેમાં 2 અડધી સદી સામેલ છે.
આ પણ વાંચો: Paris Olympics 2024: પાકિસ્તાન 32 વર્ષમાં જે ન કરી શક્યું, તે મનુ ભાકરે 6 દિવસમાં બે વાર કરી બતાવ્યું
