મધ્યમ વર્ગના લોકો માટે ખુશખબર, નવા વર્ષમાં લોટ, દાળ, ચોખાના ભાવ ઘટશે ! RBIએ આપ્યું મોટું અપડેટ
Dec 30, 2024 | 10:14 PM
રિઝર્વ બેંક ઓફ ઈન્ડિયાના રિપોર્ટ અનુસાર, ચાલુ નાણાકીય વર્ષમાં ભારતીય અર્થવ્યવસ્થાનો વિકાસ દર 6.6 ટકા રહેવાનો અંદાજ છે. જેને કારણે અનેક નવી આશા લોકોને બંધાઈ છે.
ભારતીય અર્થતંત્ર હાલમાં મજબૂત અને સ્થિર દેખાય છે. રિઝર્વ બેંક ઓફ ઈન્ડિયાના રિપોર્ટ અનુસાર, ચાલુ નાણાકીય વર્ષમાં ભારતીય અર્થવ્યવસ્થાનો વિકાસ દર 6.6 ટકા રહેવાનો અંદાજ છે. RBI એ કહ્યું કે ગ્રામીણ વિસ્તારોમાં વપરાશ વધ્યો હોવાથી અર્થતંત્રને વેગ મળી રહ્યો છે.
તેમજ સરકારી ખર્ચ અને રોકાણમાં પણ ઝડપથી વધારો થયો છે. સર્વિસ સેક્ટરમાંથી નિકાસ વધુ મજબૂત બની રહી છે.
RBIના રિપોર્ટમાં કહેવામાં આવ્યું છે કે ભારતીય નાણાકીય વ્યવસ્થાની સ્થિતિ પણ મજબૂત છે. બેંકોના નફામાં વધારો થયો છે. તેમની પાસે પૂરતી મૂડી અને રોકડ છે. વધુમાં, બેંકો પાસે હવે ઓછી બેડ લોન (નોન-પર્ફોર્મિંગ એસેટ્સ) છે. તેમનું ડેટ પરનું વળતર (ROA) અને રોકાણ પરનું વળતર (ROE) દાયકાઓમાં શ્રેષ્ઠ છે.
મોંઘવારી અંગે રિપોર્ટમાં એવું પણ કહેવામાં આવ્યું હતું કે આવનારા સમયમાં અનાજની કિંમતોમાં ઘટાડો થવાની સંભાવના છે. બમ્પર ખરીફ અને રવિ પાક થઈ રહ્યા છે. જો કે, આબોહવા પરિવર્તન અને વૈશ્વિક સંઘર્ષોને કારણે કેટલાક જોખમો રહે છે. તેનાથી કિંમતો પર અસર પડી શકે છે. રિપોર્ટમાં એમ પણ કહેવામાં આવ્યું છે કે બેંકો પાસે પ્રતિકૂળ પરિસ્થિતિઓનો સામનો કરવા માટે વધારાની મૂડી પણ છે.
જ્યાં સુધી ભારતીય અર્થવ્યવસ્થાનો સંબંધ છે, RBIએ કહ્યું કે 2024-25ના પ્રથમ છ મહિનામાં જીડીપી વૃદ્ધિ દર 6 ટકા રહી શકે છે. ગયા વર્ષના પ્રથમ અર્ધવાર્ષિક ગાળામાં તે 8.2 ટકા અને બીજા ભાગમાં 8.1 ટકા હતો. આરબીઆઈનું માનવું છે કે આગામી કેટલાક મહિનામાં વૃદ્ધિ દર ફરી સુધરશે. કારણ કે સરકારી ખર્ચ, રોકાણ અને મજબૂત સેવા નિકાસને કારણે અર્થતંત્રને ટેકો મળશે.
Published On - 10:14 pm, Mon, 30 December 24