15 દિવસ અયોધ્યા રામ લલ્લાના દર્શન કરવા ના આવશો, રામ મંદિર ટ્રસ્ટે લોકોને કરી અપીલ
મૌની અમાવસ્યાને કારણે, પ્રયાગરાજ અને અયોધ્યા પહેલેથી જ ભક્તો અને શ્રદ્ધાળુઓની ભારે ભીડથી ભરેલું છે. જ્યારે, મહાકુંભ માટે આવેલા મોટી સંખ્યામાં ભક્તો પણ અયોધ્યા પહોંચી રહ્યા છે. જેના કારણે અયોધ્યામાં ભક્તોની ભારે ભીડ અને ટ્રાફિક જામ પણ થાય છે. ભક્તો માટે મંદિરમાં દર્શન કરવા ખૂબ જ મુશ્કેલ બની રહ્યા છે. આવી સ્થિતિમાં, રામ મંદિર ટ્રસ્ટે, અયોધ્યાની નજીકના વિસ્તારના ભક્તોને અપીલ કરી છે કે તેઓ 15 દિવસ માટે રામ લલ્લાના દર્શને ના આવે.
મૌની અમાવસ્યા પર આવતા લાખો ભક્તોને કોઈ અસુવિધા ન થાય તે માટે વ્યાપક વ્યવસ્થા કરવામાં આવી છે. લગભગ 12 કિમીના વિસ્તારમાં વિકસિત તમામ 44 ઘાટ પર સ્નાન સુવિધાઓ પૂરી પાડવાની તૈયારીઓ ચાલી રહી છે. ઘાટ પર એસડીએમ, સીઓ, તહસીલદાર અને નાયબ તહસીલદારોને પણ તૈનાત કરવામાં આવ્યા છે.
સંગમ કિનારાના ઘાટો તેમજ ઐરાવત ઘાટ અને અરૈલ ઘાટ પર ADM અને SDM રેન્કના IAS અધિકારીઓ અને PCS અધિકારીઓને તહેનાત કરવામાં આવ્યા છે. આ ઉપરાંત પ્રયાગરાજની આસપાસ આવેલા 10 જિલ્લાઓના ડીએમ અને એસપીને પણ તહેનાત કરવામાં આવ્યા છે.
પ્રયાગરાજના ડીએમ રવિન્દ્ર કુમાર માંધાડે પ્રયાગરાજ શહેરના લોકોને મૌની અમાવસ્યા સ્નાન ઉત્સવ નિમિત્તે ફોર વ્હીલરનો ઉપયોગ ના કરવા વિનંતી કરી છે. સોશિયલ મીડિયા X પર પોસ્ટ કરીને, તેમણે પ્રયાગરાજના લોકોને અપીલ કરી કે તેઓ ફોર-વ્હીલરનો ઉપયોગ ના કરે અને ટ્રાફિક જામની સમસ્યા ઊભી ના થાય તે માટે વહીવટીતંત્રને સહકાર આપે. ( તમામ ફોટો સૌજન્યઃ રામજન્મભૂમિ તીર્થ ટ્રસ્ટ- PTI )
