વડોદરાના ચાની કીટલી ચલાવતા ધારકે એક ના ડબલ કરવાની લાલચમાં ₹23 લાખ ગુમાવ્યા
વડોદરામાં વેમાલીમાં ચાની કીટલી ચલાવતા એક વ્યક્તિને ડબલ પૈસા કમાવવાની લાલચ આપીને 23 લાખ રૂપિયાની છેતરપિંડી કરવામાં આવી છે. ઠગ ટોળકીએ દસ રૂપિયાની મોરછાપવાળી નોટનો ઉપયોગ કરીને પૈસા ડબલ કરવાનું વચન આપ્યું હતું. પોલીસે ત્રણ આરોપીઓ સામે ગુનો દાખલ કરી તપાસ શરૂ કરી છે.
વડોદરાના વેમાલીમાં ચાની કીટલી ચલાવનારને દસ રૂપિયાની મોરછાપ ચલણી નોટની પૂજા દ્વારા એકના ડબલ કરી આપવાની લાલચ આપી રૂપિયા 23 લાખ લઇ રફૂચક્કર થઇ જનાર ઠગ ત્રિપુટી સામે મંજુસર પોલીસ મથકમાં ફરિયાદ નોંધાઇ છે. પોલીસે ગુરૂજી બનીને આવેલા ઠગ સહિત ત્રણ સામે છેતરપિંડીનો ગુનો દાખલ કરી ધરપકડના ચક્રોગતિમાન કર્યા છે. વેમાલીમાં બનેલી આ ઘટનાએ ચકચાર જગાવી મૂકી છે.
મંજુસર પોલીસ મથકમાં અજયકુમાર પરમારે નોંધાયેલી ફરિયાદ મુજબ વિગત એવી છે કે, વેમાલીમાં મહાદેવ ફળિયામાં રહેતો 41 વર્ષિય અજયકુમાર પરમાર સમા-સાવલી રોડ ઉપર જય માતાજીના નામથી ટી-સ્ટોલ ચલાવે છે. તેમની સાથે તેમની માતા અને પત્ની પણ જોડાયેલા છે. એક માસ પહેલા અલગ-અલગ વાહન પર રાજુ, મહેશ તથા બે ઇસમો આવ્યા હતા. બાદમાં તેઓ સમાજના હોવાથી છોકરી માટે લગ્ન કરવાનું હોવાનું જણાવીને વાતચીત કરી હતી.
દરમિયાન ટોળકીએ ફરિયાદીને જણાવ્યું હતું કે, જો રૂપિયા 10ની નોટ જેના પર મોરની છાપ હોય તેવી નોટ હોય તો મને કહેજો, અમારે કામ છે. બાદમાં ઉત્સુકતાવશ તેનું કારણ પૂછતા જણાવ્યું કે, અમારી પાસે એક ગુરૂજી છે, તેઓ આ નોટ વડે રૂપિયા ડબલ કરી આપે છે. બાદમાં ચાની લારી ઉપર તમામે અવારનવાર આવવાનુ શરૂ કર્યું હતું.
તે સમયે ગુરૂજીએ જણાવ્યું કે, રૂપિયા ડબલ કરવામાં વિધ્ન આવી રહ્યું છે. જેથી વિધી કરવી પડશે અને તેનું એડવાન્સ બુકિંગ કરવું પડશે. બાદમાં વિધિનો સામાન લાવવા રૂપિયા 18 લાખ માંગવામાં આવ્યા હતા. જે બાદ અજયકુમારે રૂપિયા 3 લાખની વ્યવસ્થા કરીને આપ્યા હતા. બાદમાં ગુરૂજી તથા તેમના સાગરીતો અવારનવાર પૂજાનો સામાન લાવવા માટે બાકી રકમ માટે અજયકુમારને ફોન કરતા હતા.
દરમિયાન એકના ડબલ કરવાની લાલચમાં અજયકુમારે બાકીના રૂપિયા 15 લાખ ઠગોને આપ્યા હતા. આ રકમ આપ્યા બાદ ઠગ ત્રિપુટીએ 11 દિવસની રાહ જુઓ તમારા રૂપિયા ડબલ થઇ જશે, તેમ જણાવ્યું હતું. થોડા દિવસ બાદ અજયકુમારને ખબર પડી કે, આ ઠગ ટોળકીએ અન્ય લોકોને પણ એકના ડબલ નાણાં કરી આપવાની લાલચ આપી છેતરપિંડી કરી છે.
