22 જૂનના મહત્વના સમાચાર : આજથી 3 દિવસ અમદાવાદમાં હળવા વરસાદની શક્યતા, 22થી 24 જૂન દરમિયાન છુટાછવાયા વરસાદી ઝાપટાની આગાહી
આજે 22 જૂનને સોમવારના રોજ ગુજરાત સહીત દેશના વિવિધ રાજ્યોમાં અનેકવિધ કાર્યક્રમો યોજાવા જઈ રહ્યા છે. આજના બ્રેકિંગ ન્યૂઝ, દિવસભરના મોટા અને મહત્વના સમાચાર સૌથી પહેલા જાણવા અને વિવિધ સમાચારના ત્વરીત અપડેટ્સ મેળવવા માટે આપ, આ પેજને સતત રિફ્રેશ કરતા રહો.
LIVE NEWS & UPDATES
-
હૈદરાબાદઃ મીરપેટ વિસ્તારમાં ડેકોરેશનના ગોડાઉનમાં ભયાનક બ્લાસ્ટ
હૈદરાબાદના મીરપેટ વિસ્તારમાં આવેલા એક ડેકોરેશન સામગ્રીના ગોડાઉનમાં ભયાનક બ્લાસ્ટ સર્જાતા ચકચાર મચી ગઈ હતી. પ્રાથમિક માહિતી મુજબ ગોડાઉનમાં રાખવામાં આવેલા કેમિકલ ભરેલા બોક્સમાં વિસ્ફોટ થતાં એક શ્રમિકનું ઘટનાસ્થળે જ કરૂણ મોત થયું હતું. બ્લાસ્ટ એટલો શક્તિશાળી હતો કે મૃતકના શરીરના ટુકડા આશરે 10 મીટર સુધી વિખેરાઈ ગયા હતા. ઘટનાની જાણ થતાં પોલીસ અને ફોરેન્સિક ટીમ તાત્કાલિક સ્થળ પર પહોંચી હતી અને પુરાવા એકત્રિત કરવાની કાર્યવાહી હાથ ધરી હતી. સુરક્ષાના ભાગરૂપે પોલીસે દુર્ઘટના સ્થળે સામાન્ય લોકોના પ્રવેશ પર પ્રતિબંધ મૂકી દીધો છે. મૃતક શ્રમિક હાલમાં જ કોલકાતાથી રોજગાર માટે હૈદરાબાદ આવ્યો હોવાનું જાણવા મળ્યું છે. સમગ્ર ઘટનાને લઈને પોલીસે વધુ તપાસ શરૂ કરી છે.
-
અમદાવાદ: બુટલેગરે કરી યુવતીની છેડતી
અમદાવાદના રાણીપ વિસ્તારમાં બુટલેગરોના વધતા ત્રાસને લઈને સ્થાનિકોમાં ભારે રોષ જોવા મળી રહ્યો છે. ગતરાતે એક બુટલેગરે યુવતી સાથે છેડતી કરી હોવાના આક્ષેપ બાદ વિસ્તારના રહેવાસીઓમાં અસુરક્ષાની લાગણી વધુ ઘેરી બની છે. સ્થાનિકોના જણાવ્યા મુજબ બુટલેગરોના કારણે મહિલાઓ અને યુવતીઓ માટે વિસ્તાર અસુરક્ષિત બન્યો છે. વારંવાર પોલીસ અને તંત્રને રજૂઆત કરવા છતાં અસરકારક કાર્યવાહી ન થતી હોવાનો પણ આક્ષેપ કરવામાં આવ્યો છે. રહેવાસીઓનું કહેવું છે કે છેલ્લા 20થી 25 વર્ષથી વિસ્તારમાં ખુલ્લેઆમ દારૂનો ગેરકાયદે ધંધો ચાલી રહ્યો છે. સમગ્ર મામલે કડક કાર્યવાહી અને સુરક્ષાની માંગ સાથે મોટી સંખ્યામાં સ્થાનિકો પોલીસ કમિશ્નર કચેરીએ પહોંચ્યા હતા.
-
-
નવસારી જિલ્લાના વાતાવરણમાં પલટો
નવસારી જિલ્લાના વાતાવરણમાં અચાનક પલટો જોવા મળ્યો છે. વહેલી સવારથી જિલ્લાના વિવિધ તાલુકાઓમાં મેઘરાજાએ પધરામણી કરતાં વરસાદી માહોલ જામ્યો હતો. વાદળછાયા વાતાવરણ બાદ ધાનેરા પોઈન્ટ, સ્ટેશન રોડ સહિતના અનેક વિસ્તારોમાં વરસાદી ઝાપટાં પડ્યાં હતા. ભારે પવન સાથે વરસેલા વરસાદને કારણે વાતાવરણમાં ઠંડક પ્રસરી ગઈ હતી અને લોકોને ગરમીથી આંશિક રાહત મળી હતી. જોકે ખેડૂતો હજુ પણ વાવણી લાયક સારા વરસાદની રાહ જોઈ રહ્યા છે, જેથી ખેતીની કામગીરીને વેગ મળી શકે.
-
આગામી સાત દિવસ રાજ્યમાં વરસાદની આગાહી
રાજ્યમાં વરસાદને લઈને હવામાન વિભાગે મોટી આગાહી કરી છે. આગામી સાત દિવસ દરમિયાન ગુજરાતના અનેક વિસ્તારોમાં વરસાદી માહોલ યથાવત રહેવાની શક્યતા વ્યક્ત કરવામાં આવી છે. વેસ્ટર્ન ડિસ્ટર્બન્સની અસરના કારણે રાજ્યના વિવિધ ભાગોમાં છૂટાછવાયો વરસાદ પડી શકે છે. ખાસ કરીને સૌરાષ્ટ્ર અને દક્ષિણ ગુજરાતના જિલ્લાઓમાં હળવાથી મધ્યમ વરસાદની આગાહી કરવામાં આવી છે. સાથે જ ઉત્તર ગુજરાતના કેટલાક વિસ્તારોમાં પણ વરસાદી ઝાપટાં પડવાની સંભાવના દર્શાવવામાં આવી છે. વરસાદી પ્રવૃત્તિના કારણે વાતાવરણમાં ભેજનું પ્રમાણ વધશે અને કેટલાક વિસ્તારોમાં વાદળછાયું વાતાવરણ જોવા મળી શકે છે.
-
આજથી 3 દિવસ અમદાવાદમાં હળવા વરસાદની શક્યતા
અમદાવાદમાં આગામી ત્રણ દિવસ દરમિયાન હળવાથી મધ્યમ વરસાદી ઝાપટાં પડવાની સંભાવના વ્યક્ત કરવામાં આવી છે. હવામાન વિભાગની આગાહી મુજબ 22થી 24 જૂન દરમિયાન શહેરના વિવિધ વિસ્તારોમાં છૂટાછવાયા વરસાદી ઝાપટાં જોવા મળી શકે છે. એકસાથે બે વરસાદી સિસ્ટમ સક્રિય થતાં ભેજવાળા પવનો ફૂંકાઈ રહ્યા છે, જેના કારણે વાતાવરણમાં ભેજનું પ્રમાણ વધશે. હાલ સાઇક્લોનિક સરક્યુલેશન અને વેસ્ટર્ન ડિસ્ટર્બન્સની અસર જોવા મળી રહી છે. જોકે વાદળીયા વાતાવરણ વચ્ચે પણ ગરમીથી સંપૂર્ણ રાહત મળવાની શક્યતા ઓછી છે અને તાપમાન 38થી 40 ડિગ્રી સેલ્સિયસ વચ્ચે રહેવાની આગાહી કરવામાં આવી છે.
-
-
આજે દિલ્હીમાં બ્રિક્સ NSA ની બેઠક
આજે દિલ્હીમાં અજિત ડોભાલની અધ્યક્ષતામાં બ્રિક્સ NSA ની બેઠક યોજાશે. આ બેઠક દરમિયાન, બ્રિક્સ સભ્ય દેશોના રાષ્ટ્રીય સુરક્ષા સલાહકારો/પ્રતિનિધિમંડળોના વડાઓ વિશ્વ સામેના બિન-પરંપરાગત સુરક્ષા પડકારો પર પોતાના વિચારો શેર કરશે.
આજે 22 જૂનને સોમવારના રોજ ગુજરાત સહીત દેશના વિવિધ રાજ્યોમાં અનેકવિધ કાર્યક્રમો યોજાવા જઈ રહ્યા છે. આજના બ્રેકિંગ ન્યૂઝ, દિવસભરના મોટા અને મહત્વના સમાચાર સૌથી પહેલા જાણવા અને વિવિધ સમાચારના ત્વરીત અપડેટ્સ મેળવવા માટે આપ, આ પેજને સતત રિફ્રેશ કરતા રહો.
Published On - Jun 22,2026 7:26 AM
