મોંઘવારીથી પરેશાન લોકો માટે ખાંડના ભાવને લઈને રાહતના સમાચાર સામે આવ્યા છે. છેલ્લા બે દિવસમાં હોલસેલ બજારમાં ખાંડના ભાવમાં પ્રતિ કિલો ₹10થી ₹15 સુધીનો ઘટાડો નોંધાયો છે. અગાઉ જે ખાંડનો ભાવ પ્રતિ કિલો આશરે ₹45 હતો, તે અચાનક વધીને ₹70 સુધી પહોંચી ગયો હતો. જોકે, હવે ભાવ ઘટીને ફરી ₹55થી ₹60ની આસપાસ આવી ગયા છે.

બે દિવસમાં ખાંડના ભાવમાં મોટો ઘટાડો

ખાંડના ભાવમાં થયેલા અચાનક વધારા બાદ હવે હોલસેલ બજારમાં ઘટાડો જોવા મળ્યો છે. છેલ્લા બે દિવસમાં પ્રતિ કિલો ₹10થી ₹15 સુધીનો ઘટાડો થતાં વેપારીઓ અને ગ્રાહકોને થોડી રાહત મળી છે. નિષ્ણાતોના મતે, કેન્દ્ર સરકારે 10 લાખ ટન ખાંડની આયાતની જાહેરાત કર્યા બાદ બજારમાં પુરવઠો વધવાની અપેક્ષાએ ભાવમાં ઘટાડો થયો છે.

છૂટક બજારમાં પણ ભાવ ઘટવાની શક્યતા

હાલમાં આ ઘટાડો મુખ્યત્વે હોલસેલ બજારમાં જોવા મળી રહ્યો છે. આગામી દિવસોમાં હોલસેલ ભાવમાં થયેલા ઘટાડાની અસર છૂટક બજારમાં પણ જોવા મળી શકે છે. જો ઘટાડો યથાવત રહેશે તો ગ્રાહકોને પણ ખાંડ સસ્તા ભાવે મળવાની શક્યતા છે.

ગુજરાતમાં અન્ય રાજ્યોમાંથી આવે છે ખાંડ

ગુજરાતમાં ખાંડની સ્થાનિક માગને પહોંચી વળવા માટે મહારાષ્ટ્ર, ઉત્તર પ્રદેશ અને કર્ણાટક જેવા રાજ્યોમાંથી પણ મોટા પ્રમાણમાં ખાંડનો જથ્થો આવે છે. સરકારની આયાતની જાહેરાત અને બજારમાં પુરવઠાની સ્થિતિને કારણે આગામી દિવસોમાં ખાંડના ભાવ કઈ દિશામાં જાય છે તેના પર વેપારીઓ અને ગ્રાહકોની નજર રહેશે.