10 જુલાઈના મહત્વના સમાચાર : ગુજરાતમાં સિઝનનો સરેરાશ માત્ર 9 ઈંચ વરસાદ, ગયા વર્ષની સરખામણીએ નોંધપાત્ર ઘટાડો

સુરત: ભીષણ પૂરમાં મૃત્યુઆંક 41 પર પહોંચ્યો

ગુજરાતમાં સિઝનનો સરેરાશ માત્ર 9 ઈંચ વરસાદ, ગયા વર્ષની સરખામણીએ નોંધપાત્ર ઘટાડો

ગુજરાતમાં ચોમાસાની સિઝનમાં અત્યાર સુધી સરેરાશ માત્ર 9 ઈંચ વરસાદ નોંધાયો છે, જે સિઝનના કુલ સરેરાશ વરસાદના માત્ર 24.63 ટકા જેટલો છે. ગત વર્ષની સરખામણીએ રાજ્યમાં 23.37 ટકા ઓછો વરસાદ નોંધાતા કૃષિ અને જળસંચય અંગે ચિંતા વધી છે. ગયા વર્ષે 9 જુલાઈ સુધીમાં રાજ્યમાં સરેરાશ 16.45 ઈંચ વરસાદ વરસ્યો હતો. હવામાન વિભાગના અનુમાન મુજબ આગામી એક અઠવાડિયા દરમિયાન રાજ્યમાં વ્યાપક વરસાદની શક્યતા નહીંવત્ છે અને વિવિધ વિસ્તારોમાં માત્ર હળવાથી મધ્યમ વરસાદી ઝાપટાં પડવાની જ સંભાવના વ્યક્ત કરવામાં આવી છે.

મહારાષ્ટ્રઃ નાંદેડ-લાતુર રોડ પર બ્રિજનો એક હિસ્સો ધરાશાયી

મહારાષ્ટ્રના નાંદેડ-લાતુર રોડ પર આવેલા એક વર્ષ પહેલાં બનાવાયેલા ફ્લાયઓવરનો એક હિસ્સો અચાનક ધરાશાયી થતાં ભારે અફરાતફરી મચી હતી. બ્રિજનો કાટમાળ નીચે પડતાં ત્યાંથી પસાર થતા કેટલાક વાહનચાલકો માંડમાંડ બચી ગયા હતા. સદનસીબે આ દુર્ઘટનામાં કોઈ જાનહાની કે ઇજાના અહેવાલ સામે આવ્યા નથી. ઘટનાની જાણ થતાં સ્થાનિક તંત્ર અને પોલીસ તાત્કાલિક સ્થળ પર પહોંચી હતી અને વિસ્તારને સુરક્ષિત કરી વધુ તપાસ હાથ ધરી છે.

ખેડાઃ કપડવંજ ફટાકડા ફેક્ટરી બ્લાસ્ટ કેસમાં મુખ્ય આરોપીની ધરપકડ

ખેડાના કપડવંજમાં 27 જૂને થયેલા ફટાકડા ફેક્ટરીના પ્રચંડ બ્લાસ્ટ કેસમાં પોલીસને મહત્વની સફળતા મળી છે. વિસ્ફોટના 11 દિવસ બાદ ફેક્ટરી માલિક અને મુખ્ય આરોપી મિતુલ પટેલની બાતમીના આધારે ધરપકડ કરવામાં આવી છે. કોર્ટે આરોપીના એક દિવસના રિમાન્ડ મંજૂર કર્યા છે. પ્રાથમિક તપાસમાં મંજૂરી વિના ગેરકાયદેસર રીતે ફેક્ટરી ચલાવવામાં આવતી હોવાનો આરોપ સામે આવ્યો છે. આ દુર્ઘટનામાં બે શ્રમિકો ગંભીર રીતે દાઝ્યા હતા, જેમાં એક શ્રમિકનું સારવાર દરમિયાન મોત થયું હતું. પોલીસનું માનવું છે કે આરોપીની પૂછપરછ દરમિયાન વિસ્ફોટ કેસમાં વધુ મહત્વના ખુલાસા થઈ શકે છે.

સુરતઃ પૂરની સ્થિતિ અંગે DyCM હર્ષ સંઘવીએ કરી સ્થળ મુલાકાત

ગુજરાતના નાયબ મુખ્યમંત્રી હર્ષ સંઘવીએ મધ્યરાત્રિએ પૂરગ્રસ્ત વિસ્તારોમાં સફાઈ કામગીરીનું નિરીક્ષણ કર્યું હતું.

Gujarat Deputy Chief Minister Harsh Sanghavi conducted a midnight ground inspection of cleanup operations in flood-affected areas.

(Image source: X/Harsh Sanghvi) pic.twitter.com/OIKvg3BSzz

— ANI (@ANI) July 9, 2026

18 રાજ્યોમાં ભારે વરસાદની ચેતવણી

દેશભરમાં ચોમાસું સંપૂર્ણપણે સક્રિય થઈ ગયું છે. ગુજરાત, દિલ્હી-એનસીઆર અને ઉત્તર પ્રદેશ સહિત 18 રાજ્યોમાં ભારે વરસાદ અને વાવાઝોડાની ચેતવણી જારી કરવામાં આવી છે.