અમદાવાદના સાઉથ બોપલ ખાતે ઓશિયા મોલના સંચાલક સામે છેતરપિંડીના આક્ષેપોને લઈને ભોગ બનનાર વેપારીઓની મહત્વપૂર્ણ બેઠક મળી હતી. સુરત, વડોદરા, અમદાવાદ અને મુંબઈ સહિતના શહેરોમાંથી 50થી વધુ વેપારીઓ બેઠકમાં એકત્ર થયા હતા. વેપારીઓએ સમગ્ર મામલે આગળની કાયદાકીય લડત માટે રણનીતિ તૈયાર કરી હોવાનું જાણવા મળ્યું છે.

7 જુલાઈએ CID ક્રાઇમમાં ફરિયાદ

ઓશિયા મોલના સંચાલક દ્વારા વેપારીઓ પાસેથી માલ મેળવી તેની ચુકવણી ન કરવામાં આવી હોવાના આક્ષેપ સાથે 7 જુલાઈના રોજ CID ક્રાઇમમાં ફરિયાદ કરવામાં આવી હતી. ફરિયાદ બાદ તપાસ દરમિયાન અત્યાર સુધીમાં 17 વેપારીઓના નિવેદન નોંધવામાં આવ્યા હોવાનું સામે આવ્યું છે.

વેપારીઓના જણાવ્યા અનુસાર, CID ક્રાઇમની તપાસમાં અત્યાર સુધીમાં 17 વેપારીઓ સાથે મળીને રૂ.17 કરોડથી વધુની છેતરપિંડી થઈ હોવાનું સામે આવ્યું છે.

325 જેટલા વેપારીઓ પાસેથી માલ ખરીદ્યો હોવાનો આક્ષેપ

સમગ્ર મામલે વેપારીઓનો આક્ષેપ છે કે ઓશિયા મોલના સંચાલકે રિટેલ ચેન મારફતે અલગ-અલગ વેપારીઓ પાસેથી માલ મેળવ્યો હતો. જોકે, માલની ચુકવણી કરવામાં આવી ન હોવાનો આક્ષેપ કરવામાં આવ્યો છે. પ્રાથમિક માહિતી મુજબ, આશરે 325 જેટલા રજિસ્ટર્ડ વેપારીઓ પાસેથી માલ ખરીદવામાં આવ્યો હોવાની માહિતી સામે આવી છે. આ મામલે વધુ વેપારીઓના નિવેદનો અને દસ્તાવેજો પણ તપાસનો ભાગ બની શકે છે.

કુલ રૂ.365 કરોડની છેતરપિંડીનો વેપારીઓનો દાવો

વેપારીઓનો દાવો છે કે સમગ્ર મામલામાં અત્યાર સુધીમાં કુલ રૂ.365 કરોડની છેતરપિંડી થઈ હોવાનો અંદાજ છે. જોકે, આ આંકડો વેપારીઓ દ્વારા કરવામાં આવેલો દાવો છે અને સમગ્ર રકમ અંગે સત્તાવાર તપાસ બાદ વધુ સ્પષ્ટતા થઈ શકે છે. હાલ વિવિધ મોલના બુક્સ ઓફ એકાઉન્ટ અને એકાઉન્ટ સંબંધિત માહિતી મંગાવી તપાસ કરવામાં આવી રહી હોવાનું વેપારીઓએ જણાવ્યું છે.

શેરના ભાવમાં અપડાઉન કરી કમાણી કરવાનો પણ આક્ષેપ

વેપારીઓ દ્વારા ઓશિયા મોલના સંચાલક સામે અન્ય ગંભીર આક્ષેપો પણ કરવામાં આવ્યા છે. જેમાં NSEમાં શેરના ભાવમાં અપડાઉન કરી કમાણી કરવામાં આવી હોવાનો આક્ષેપ સામેલ છે. વેપારીઓનો આરોપ છે કે તેમની સાથે ઇરાદાપૂર્વક છેતરપિંડી કરવામાં આવી છે.આ આક્ષેપોની સત્યતા અંગે સંબંધિત તપાસ એજન્સીઓની તપાસ અને ઉપલબ્ધ નાણાકીય દસ્તાવેજોના આધારે જ અંતિમ સ્થિતિ સ્પષ્ટ થઈ શકશે.

ફોરેન્સિક ઓડિટ કરાવવાની તૈયારી

વેપારીઓએ સમગ્ર નાણાકીય વ્યવહારોની તપાસ માટે ફોરેન્સિક ઓડિટ કરાવવાનો નિર્ણય કર્યો હોવાનું જાણવા મળ્યું છે. આ માટે વેપારીઓ દ્વારા એજન્સીની શોધખોળ કરવામાં આવી રહી છે. ફોરેન્સિક ઓડિટના માધ્યમથી મોલના નાણાકીય વ્યવહારો, એકાઉન્ટ્સ અને વેપારીઓ સાથે થયેલા વ્યવહારોની તપાસ કરાવવાની તૈયારી છે.

NCLT મારફતે પણ લડતની તૈયારી

વેપારીઓ હવે માત્ર પોલીસ ફરિયાદ પૂરતી કાર્યવાહી નહીં, પરંતુ NCLT (National Company Law Tribunal)ના માધ્યમથી પણ ઓશિયાના સંચાલક સામે કાયદાકીય લડત આપવા નવી રણનીતિ બનાવી રહ્યા છે. બેઠકમાં આગામી સમયમાં કાયદાકીય કાર્યવાહી વધુ મજબૂત બનાવવાનો નિર્ણય લેવામાં આવ્યો હોવાનું જાણવા મળ્યું છે. વેપારીઓએ પોતાના બાકી નાણાંની વસૂલાત અને સમગ્ર મામલાની નિષ્પક્ષ તપાસ માટે સંગઠિત રીતે આગળ વધવાની તૈયારી દર્શાવી છે.

Breaking News : અંબાલાલ પટેલની મોટી આગાહી, સૌરાષ્ટ્રમાં ગાજવીજ સાથે વરસાદની શક્યતા, જુઓ Video