NPS કે UPS…25 વર્ષની નોકરી પછી કઈ સ્કીમ આપશે વધુ પેન્શન ?
સરકારે તાજેતરમાં યુનિફાઇડ પેન્શન સ્કીમ એટલે કે UPSની જાહેરાત કરી છે. ત્યારે સરકારે કર્મચારીઓને બંને પેન્શન યોજનાઓમાંથી કોઈપણ યોજના પસંદ કરવાનો વિકલ્પ આપ્યો છે. ત્યારે આ લેખમાં 80 હજાર રૂપિયાના માસિક સરેરાશ બેઝિક પગારની ગણતરીના આધારે સમજીએ.
મોદી સરકારે તાજેતરમાં યુનિફાઇડ પેન્શન સ્કીમ એટલે કે UPSની જાહેરાત કરી છે. આ સ્કીમને કેટલાક લોકો નેશનલ પેન્શન સ્કીમ એટલે કે NPS કરતાં વધુ સારી ગણાવી રહ્યા છે, કારણ કે આ નવી સ્કીમમાં પેન્શનની ખાતરી આપવામાં આવી છે. NPSમાં આવી કોઈ જોગવાઈ નહોતી. આજના આ લેખમાં અમે તમને જણાવીશું કે, જો કોઈ વ્યક્તિ 25 વર્ષ સુધી સરકારી નોકરી કરે છે, તો તેના માટે NPS અથવા UPS કઈ સ્કીમ વધુ પેન્શન આપશે.
વધુ એક વાત ધ્યાનમાં રાખવા જેવી છે કે સરકારે કર્મચારીઓને બે પેન્શન યોજનાઓમાંથી પસંદગી કરવાનો વિકલ્પ આપ્યો છે. આનો અર્થ એ છે કે તમે UPS અથવા NPS પસંદ કરી શકો છો. તમે તમારી ઈચ્છા મુજબ તેમાં ફેરફાર કરી શકો છો. તો ચાલો આ ગણતરીને 80 હજાર રૂપિયાના માસિક સરેરાશ બેઝિક પગારના આધારે સમજીએ.
NPSની ગણતરી
NPSમાં કર્મચારી તેના પગારના 10 ટકા ફાળો આપે છે, જ્યારે સરકાર 14 ટકા ફાળો આપે છે. આમ, એકંદરે પગારના 24 ટકા રકમ દર મહિને NPSમાં જમા થાય છે.
80,000 રૂપિયાના સરેરાશ પગારના આધારે, કર્મચારીનું માસિક યોગદાન 8,000 રૂપિયા અને સરકારનું યોગદાન 11,200 રૂપિયા હશે. આ રીતે NPSમાં દર મહિને કુલ 19,200 રૂપિયા જમા થશે.
જો આપણે ધારીએ કે NPS 9 ટકા વળતર આપે છે, તો 25 વર્ષમાં તમારું કુલ રોકાણ રૂ. 57.60 લાખ થશે. જો તમે આના પર મળતું વ્યાજ ઉમેરો છો, તો તમારું કુલ ફંડ રૂ. 2.16 કરોડ (2,16,86,983) થશે.
UPSની ગણતરી
UPSમાં કર્મચારીઓનું યોગદાન NPSની જેમ 10 ટકા રહેશે, પરંતુ સરકારી યોગદાન 14 ટકાથી વધીને 18.5 ટકા થશે. તેથી દર મહિને પગારના 28.5 ટકા UPSમાં જમા થશે. 80,000 રૂપિયાની સરેરાશ સેલેરી મુજબ, દર મહિને 22,800 રૂપિયા UPSમાં જમા થશે.
મતલબ કે આગામી 25 વર્ષમાં તમારું કુલ રોકાણ રૂ. 68.40 લાખ થશે. જો આપણે ધારીએ કે NPSની જેમ, UPS પણ 9 ટકા વળતર આપે છે, તો તમારું કુલ ભંડોળ રૂ. 2.57 કરોડ (2,57,53,292) થશે.
હવે પેન્શનનું ગણિત સમજીએ
NPSમાં નિવૃત્તિ સમયે તમને કુલ રકમના 60 ટકા એટલે કે રૂ. 1.30 કરોડ (1,30,12,190) એકસાથે પાછા મળશે. બાકીની રકમમાંથી વાર્ષિકી ખરીદવામાં આવશે, જેના પર વાર્ષિક 6 ટકા વ્યાજ લેખે દર મહિને 43,374 રૂપિયાનું પેન્શન આપવામાં આવશે.
UPSના કિસ્સામાં સમગ્ર ફંડ સરકાર પાસે રહેશે. બદલામાં કર્મચારીને દર 6 મહિનાની સેવા પૂર્ણ કર્યા પછી પગારના 10 ટકાની એકમ રકમ આપવામાં આવશે. 25 વર્ષની સેવામાં 50 છ મહિના થશે. જો આપણે સરેરાશ 80,000 રૂપિયાનો પગાર જોઈએ તો તમને દર 6 મહિના માટે 48,000 રૂપિયા મળશે. આ રીતે 25 વર્ષ પછી કુલ 24 લાખ રૂપિયા એકસાથે મળશે.
આ ઉપરાંત, પેન્શન છેલ્લા 12 મહિનાના સરેરાશ મૂળ પગારના 50 ટકા રહેશે. વર્તમાન પગાર કરતાં નિવૃત્તિ સમયે બેઝિક પગાર બમણો ધારીએ તો, તમારો 12 મહિનાનો સરેરાશ બેઝિક પગાર 1 લાખ રૂપિયા થાય છે, તો તે મુજબ તમને 50 હજાર રૂપિયા પેન્શન મળશે. ધ્યાનમાં રાખો કે જો પગાર બમણું થશે, તો તમારું યોગદાન પણ તે મુજબ વધશે.
આ ગણતરી તમને વિચારવા મજબૂર કરશે
હવે આને થોડું ધ્યાનથી સમજીએ, જો આપણે NPSમાં મળેલી 1.30 કરોડ રૂપિયાની એકસામટી રકમને FDમાં રોકાણ કરીએ, જેમાં 6 ટકા વ્યાજ મળી રહ્યું છે, તો દર મહિને આવક 65,000 રૂપિયા થશે. જો આપણે તેમાં વાર્ષિકીમાંથી મળેલી રૂ. 43,374ની રકમ ઉમેરીએ તો કુલ માસિક પેન્શન રૂ. 1.08 લાખ થશે.
જો આપણે UPSમાંથી મળેલી 24 લાખ રૂપિયાની રકમ FDમાં મૂકીએ તો 6 ટકા વ્યાજના દરે દર મહિને 12,000 રૂપિયા મળશે. આને પેન્શનમાં ઉમેરવાથી કુલ આવક દર મહિને 62,000 રૂપિયા થશે, જ્યારે આ રકમ NPS કરતાં 46,000 રૂપિયા ઓછી છે. આ ઉપરાંત NPSમાં તમારી પાસે કરોડો રૂપિયાનું ભંડોળ રહેશે, જ્યારે UPSમાં તમારી પાસે આ ભંડોળ નહીં હોય. કારણ કે તે સરકાર રાખશે.
