Video : જંબુસરના મંગણાદ ગામે શ્વાનનો આતંક, 5 બાળકોને ઈજાગ્રસ્ત કર્યા

જંબુસર તાલુકાના મંગણાદ ગામે શ્વાનના આતંકથી લોકોમાં ભયનો માહોલ ફેલાયો છે. સુપર સોલ્ટ કંપનીના કોન્ટ્રાકટ કામદારોની વસાહતમાં શ્વાને 5 બાળકોને બચકાં ભરી લેતા ગભરાટ ફેલાયો હતો. ભરૂચ જિલ્લાના જંબુસર તાલુકાના મંગણાદ ગામે શ્વાન હાડકાયું થતા ગામમાં ભારે દહેશત મચાવી હતી. બાળકો તેમજ વાહનો ઉપર જતા લોકોની પાછળ શ્વાન દોડી બચકાં ભરતું હોય લોકોમાં ભયનો માહોલ ફેલાયો હતો. મગણાદ ગામ પાસે આવેલ સુપરસોલ્ટ કંપનીના કોન્ટ્રાકટ મજૂરોની વસાહતમાં આ હડકાયું શ્વાન ઘુસી જતાં પાંચ થી વધુ નાના ભૂલકાઓ શ્વાનના કરડવાનો શિકાર  બન્યા છે.  નાના બાળકોને મોઢા, કમર, પગ અને હાથે  ઇજાઓ પોહચી છે. લોકોએ માંડ માંડ શ્વાનના આતંકથી આ બાળકોને બચાવ્યા હતા.

ઇજાગ્રસ્ત પાંચ બાળકોને રેફરલ હોસ્પિટલ ખાતે સારવાર અર્થે લાવવામાં આવ્યા હતા. સાગમટે આ બાળકોને શ્વાને બચકાં ભરી લેતા કામદારોમાં ગભરાટ સાથે ચિંતા ફેલાઈ ગઈ છે. શ્વાનના હુમલાનો  શિકાર  બનેલા બાળકોના માતા-પિતાએ કંપની કોન્ટ્રાકટરને ઘટનાની જાણ કરી હતી.  જીવદયા સંસ્થા તથા ગામ પંચાયત વહીવટી તંત્રને રજુઆત કરી હડકાયા શ્વાનથી ગ્રામજનોને છુટકારો અપાવવા માંગ કરી છે. સ્થાનિકો અનુસાર પંથકમાં અવાર નવાર શ્વાન કરડવાના બનાવો બની રહ્યાં છે. બાઈકની પાછળ શ્વાન દોડવાથી બાઇક ચાલકો અકસ્માતોનો ભોગ પણ બની રહ્યાં છે. તંત્ર વહેલી તકે શ્વાનના આતંકથી ગ્રામજનોને છુટકારો અપાવે તે જરૂરી બન્યું છે.

 વડોદરામાં વૃદ્ધા ગંભીર રીતે ઇજાગ્રસ્ત

વડોદરામાં નિઝામપુરામાં રખડતા શ્વાને એક વૃદ્ધા પર હુમલો કરતા તે ગંભીર રીતે ઇજાગ્રસ્ત થયા હતા. નિઝામપુરાના અમરપાર્કમાં રહેતા વૃદ્ધા અમદાવાદમાં પ્રમુખ સ્વામી નગરની મુલાકાત લઇને વડોદરા ઘરે પરત ફર્યા  હતા. તે  ચાલતા ઘરે જઇ રહ્યા હતા તે દરમિયાન જ રખડતા શ્વાને તેમના પર હુમલો કર્યો હતો.