સુરત : મહિલા પોલીસકર્મીના આપઘાત કેસમાં સાયબર ક્રાઈમના કોન્સ્ટેબલની પૂછપરછ કરાઈ, શું ઘટના પાછળ પ્રેમ પ્રકરણ છે જવાબદાર?

સુરતમાં મહિલા કોસ્ટેબલ સુસાઇડ કેસ મામલે સાયબર ક્રાઈમમાં ફરજ બજાવતાં કોન્સ્ટેબલ પ્રશાંત ભોંયેની પોલીસ પૂછપરછ કરાઈ છે. મામલા પાછળ પ્રેમ પ્રકરણ જવાબદાર હોવાની પોલીસને શંકા છે. કોન્સ્ટેબલની પૂછપરછના આધારે પોલીસ ઘટનાના મૂળ સુધી પહોંચવા પ્રયાસ કરી રહી છે.

સિંગણપોરમાં રહેતી મહિલા પોલીસ કોન્સ્ટેબલએ ઘરે ફાંસો ખાઈ આપઘાત કરી લેવાનાં ચકચારી પ્રકરણમાં મહિલા કોન્સ્ટેબલનું સાયબર ક્રાઈમમાં ફરજ બજાવતાં કોન્સ્ટેબલ પ્રવિણ ભોંયે સાથે પ્રેમ પ્રકરણ હોવાની માહિતી મળી છે. આપઘાત પૂર્વે પ્રેમીને મળવા આવવા દબાણ કરતાં મેસેજીસ પણ કર્યાનું બહાર આવતાં તપાસમાં  નવો વળાંક આવ્યો છે.

સિંગણપોર કંથેરીયા હનુમાન મંદિર પાસે માહેશ્વરી એપાર્ટમેન્ટમાં રહેતી અને સિંગણપોર પોલીસ સ્ટેશનમાં ટપાલ રવાનગી વિભાગમાં ફરજ બજાવતી મહિલા કોન્સ્ટેબલ હર્ષના મહેન્દ્રભાઈ ચૌધરીએ સોમવારે સાંજે તેના ઘરમાં ફાંસો ખાઈ આપઘાત કર્યો હતો. સોમવારે હર્ષનાબેન પોતાની ફરજ પર ગઈ નહોતી. ઘરનો દરવાજો અંદરથી બંધ મળતાં તપાસમાં સમગ્ર મામલો બહાર આવ્યો હતો.

પોલીસ સૂત્રોના જણાવ્યા પ્રમાણે બંને હર્ષનાના ફોનથી છેલ્લા એકાદ મહિનાથી પ્રશાંતને સંખ્યાબંધ વખત કોલ કરવામાં આવ્યા હતા. સોમવારે બપોરે પણ કોલ કરવામાં આવ્યા હતા પરંતુ પ્રશાંતે ફોન રિસિવ નહિ કરતાં બપોરે સાડા બાર વાગ્યે મળવા આવ તેમ કહી મેસેજીસ પણ કર્યો હતો. મેસેજ બાદ પ્રશાંત તેને મળવા ગયો ન હતો. પ્રશાંતને છેલ્લો મેસેજ કર્યા બાદ જ આ મહિલા કોન્સ્ટેબલે અંતિમ પગલું ભર્યું હોવાની સંભાવના વ્યક્ત કરાઈ રહી છે.

કોન્સ્ટેબલ પ્રશાંતે પોલીસને જણાવ્યું હતું કે તે પહેલા સિંગણપોર પોલીસ મથકે જ ફરજ બજાવતો હતો. થોડાંક સમય પહેલાં તે સાયબર ક્રાઇમમાં બદલી પામ્યો હતો બંને વચ્ચે પ્રેમસંબંધ સિંગણપોરમાં ફરજ બજાવતો હતો તે અરસામાં જ થયો હતો.અકસ્માતને કારણે તે દોઢેક મહિનાથી તેના વતન ડાંગમાં હતો જ્યાં મોબાઇલ નેટવર્કને અભાવે સંપર્કમાં રહી શક્યો ન હતો. બે દિવસ પહેલાં જ તે નોકરી ઉપર પરત હાજર થયો હતો. હર્ષના તેને મળવા બોલાવતી હતી પરંતુ નોકરીને કારણે તે મળવા જઇ શક્યો ન હોવાનું પોલીસને જણાવ્યું હતું.

આ પણ વાંચો : Gold Silver Price Today : સોનુ મોંઘુ થયું તો ચાંદીનો ચળકાટ ઘટ્યો, જાણો આજના સોના-ચાંદીના લેટેસ્ટ ભાવ