વડોદરા અને આસપાસના વિસ્તારોમાં પૂરથી તારાજી સર્જાઈ છે. પાદરાના ખેતરો હજી પાણીથી ભરાયેલા છે અને પાણીના કારણે ખેતરોમાં ઉભેલો પાક નિષ્ફળ જવાની આરે છે. વિશ્વામિત્રી નદીના પાણીથી હજારો વીઘાના પાકને મોટું નુકસાન પહોંચ્યું છે. ખેતરોમાં પૂરના પાણી ઓસર્યા પરંતુ ખેડૂતોનો સમગ્ર પાક નષ્ટ પામ્યો છે.
એવું કહેવાય કે ખેતી સારી થાય તો દિવાળી સારી જાય અને ખેડૂતોની દિવાળી તો પૂરના વિનાશથી આમ પણ બગડી ગઈ છે અને આર્થિક ભીંસની આ સ્થિતિમાંથી સરકાર ખેડૂતોને ઉગારે તેવી માંગ કરવામાં આવી છે. કુદરત સામે લાચાર અને આર્થિક રીતે પાયમાલ ખેડૂતોએ સરકારી સહાય માટે માંગ કરી છે.
પાદરા તાલુકાના વીરપુર, મેઢાદ, હુસેપુર, કોઠવાડા, સાદર સહિતના નદી કિનારાના ગામોમાં ભારે વરસાદથી નદીના પૂરના પાણીમાં ખેતરો બેટમાં ફેરવાયા હતા. જેના કારણે ખેતીના પાકને મોટું નુકશાન થયું છે. ત્યારે કૃષિ વિભાગના અધિકારીઓને ખેડૂતોએ તત્કાલિન સર્વે કરી સહાય આપવા માગ કરી છે.