વર્લ્ડ ચેમ્પિયન બનવા પર મોટું ઈનામ, આ ખેલાડીના નામ પર બનશે નવું સ્ટેડિયમ, મમતા બેનર્જીએ કરી જાહેરાત

ભારતીય મહિલા ટીમે તાજેતરમાં મહિલા વર્લ્ડ કપ 2025 જીત્યો હતો. આ ઐતિહાસિક જીત બાદથી ભારતીય ખેલાડીઓ પર પુરસ્કારોનો વરસાદ થઈ રહ્યો છે. આ દરમિયાન, પશ્ચિમ બંગાળના મુખ્યમંત્રી મમતા બેનર્જીએ એક ઐતિહાસિક નિર્ણય લીધો છે. દાર્જિલિંગમાં બની રહેલા નવા ક્રિકેટ સ્ટેડિયમનું નામ એક ખેલાડીના નામ પર રાખવામાં આવશે જે 2025 મહિલા વર્લ્ડ કપ વિજેતા ટીમનો ભાગ હતી. આ ખેલાડીને તાજેતરમાં પશ્ચિમ બંગાળ સરકાર દ્વારા સન્માનિત કરવામાં આવી હતી.

રિચા ઘોષના નામ પર સ્ટેડિયમ

મમતા બેનર્જીએ જાહેરાત કરી છે કે દાર્જિલિંગમાં બની રહેલા નવા ક્રિકેટ સ્ટેડિયમનું નામ ભારતની 2025 મહિલા વર્લ્ડ કપ વિજેતા રિચા ઘોષના નામ પરથી રાખવામાં આવશે. આ પગલું ફક્ત રિચાનું સન્માન જ નહીં પરંતુ યુવા ખેલાડીઓને પણ પ્રેરણા આપશે. રિચા ઘોષ સિલિગુડીની રહેવાસી છે અને દાર્જિલિંગ સાથે તેનો ઊંડો સંબંધ છે. માત્ર 22 વર્ષની ઉંમરે, તે ભારતીય મહિલા ક્રિકેટ ટીમની મુખ્ય સભ્ય છે. તેણે આ વર્લ્ડ કપમાં પણ અસાધારણ રીતે સારું પ્રદર્શન કર્યું હતું.

મમતા બેનર્જીએ કરી જાહેરાત

મમતા બેનર્જીએ કહ્યું, “રિચાએ માત્ર 22 વર્ષની ઉંમરે વર્લ્ડ ચેમ્પિયન બનીને ઈતિહાસ રચ્યો. પશ્ચિમ બંગાળ વતી, અમે તેમનું સન્માન કરવા માંગીએ છીએ, પરંતુ હું તેનાથી વધુ કરવા માંગુ છું. દાર્જિલિંગમાં 27 એકર જમીન છે, અને મેં મેયરને ત્યાં ક્રિકેટ સ્ટેડિયમ બનાવવાની યોજના વિકસાવવા કહ્યું છે. તેનું નામ રિચા ક્રિકેટ સ્ટેડિયમ રાખવું જોઈએ, જેથી લોકો તેમનું નામ યાદ રાખી શકે અને ભાવિ પેઢીઓ તેમાંથી પ્રેરણા લઈ શકે.”

રિચા ઘોષને એવોર્ડથી નવાજવામાં આવી

શુક્રવારે વિકેટકીપર-બેટ્સમેન રિચા ઘોષનું તેના વતન સિલિગુડી પહોંચતા ભવ્ય સ્વાગત કરવામાં આવ્યું. ત્યારબાદ, 8 નવેમ્બરના રોજ, પશ્ચિમ બંગાળ સરકાર અને ક્રિકેટ એસોસિએશન ઓફ બંગાળ (CAB) એ એક ખાસ કાર્યક્રમમાં તેનું સન્માન કર્યું. CAB પ્રમુખ સૌરવ ગાંગુલીએ રિચાને એસોસિએશન વતી ₹34 લાખ ભેટમાં આપ્યા. મમતા બેનર્જીએ રિચાને DSPના હોદ્દા પર નિયુક્તિ પણ કરી અને રાજ્યના બીજા ક્રમના સર્વોચ્ચ સન્માન બંગ ભૂષણથી પણ સન્માનિત કરી. મુખ્યમંત્રી મમતા બેનર્જીએ રિચાને એક ખાસ સોનાની ચેઈન પણ ભેટમાં આપી.

આ પણ વાંચો: IND vs SA: દક્ષિણ આફ્રિકા સામે ટેસ્ટ સિરીઝ પહેલા ટીમ ઈન્ડિયાને મળી ચેતવણી, કોલકાતા ટેસ્ટમાં ભારે પડશે આ ખેલાડી!

ક્રિકેટ સહિત રમતગમતના દરેક સમાચાર વાંચવા અહીં ક્લિક કરો