શું મુંબઈ ઈન્ડિયન્સ હાર્દિક પંડ્યા પાસેથી છીનવી લેશે કેપ્ટન્સી? જાણો કોણ છે એ 3 ખેલાડીઓ જે રેસમાં છે સૌથી આગળ

IPL 2026 માં મુંબઈ ઈન્ડિયન્સની કથળતી હાલત બાદ હવે કેપ્ટન બદલવાની ચર્ચાઓ તેજ થઈ છે. સતત ત્રણ સીઝનમાં નિષ્ફળતા બાદ હાર્દિક પંડ્યાના સ્થાને કોઈ નવા ચહેરાને કમાન સોંપવામાં આવી શકે છે. આ રેસમાં એક યુવા સ્ટાર અને બે અનુભવી દિગ્ગજોના નામ સૌથી વધુ ચર્ચાઈ રહ્યા છે.

Sachin Agrawal | Updated on: May 03, 2026 | 9:15 PM

મુંબઈ ઈન્ડિયન્સ (MI) મેનેજમેન્ટે જ્યારે હાર્દિક પંડ્યાને ગુજરાત ટાઇટન્સ સાથે ટ્રેડ કર્યો ત્યારે તેને લાંબા ગાળાના કેપ્ટન તરીકે જોવામાં આવતો હતો. પરંતુ છેલ્લા ત્રણ વર્ષ (2024, 2025 અને હવે 2026) થી ટીમનું પ્રદર્શન ખૂબ જ નબળું રહ્યું છે. સતત નિષ્ફળતા બાદ હવે મેનેજમેન્ટ હાર્દિકના વિકલ્પ તરીકે આ ત્રણ ખેલાડીઓ પર વિચાર કરી શકે છે.

તિલક વર્મા: ભવિષ્યનો યુવા સુકાની

જો મેનેજમેન્ટ ફરી એકવાર લાંબા ગાળાના પ્લાન પર ધ્યાન કેન્દ્રિત કરવા માંગતું હોય, તો 23 વર્ષીય તિલક વર્મા શ્રેષ્ઠ વિકલ્પ છે. છેલ્લા પાંચ વર્ષથી મુંબઈ ઈન્ડિયન્સ સાથે જોડાયેલો છે. ટીમના માહોલથી સારી રીતે પરિચિત છે અને યુવા જોશ ધરાવે છે. તિલકને કેપ્ટન બનાવીને ટીમ ભવિષ્ય માટે એક નવો લીડર તૈયાર કરી શકે છે.

જસપ્રિત બુમરાહ: મુંબઈનો સૌથી વિશ્વાસુ ખેલાડી

જસપ્રિત બુમરાહ છેલ્લા 14 વર્ષથી મુંબઈ ઈન્ડિયન્સનો મુખ્ય હિસ્સો છે. વર્લ્ડ ક્રિકેટમાં તેણે પોતાની કેપ્ટન્સીની ઝલક દેખાડી દીધી છે. તાજેતરમાં તેની કેપ્ટન્સીમાં ભારતીય ટીમે પર્થ ટેસ્ટમાં મોટી જીત મેળવી હતી. બુમરાહ રમતને સમજવાની ગજબની ક્ષમતા ધરાવે છે અને તે એક પ્રભાવશાળી લીડર સાબિત થઈ શકે છે.

સૂર્યકુમાર યાદવ: અનુભવનો ખજાનો

સૂર્યકુમાર યાદવ અત્યારે ટી20 ફોર્મેટમાં ભારતનો સફળ કેપ્ટન છે. તેની કેપ્ટન્સીમાં ભારતીય ટીમે ટી20 વર્લ્ડ કપનો ખિતાબ જીત્યો હતો. સૂર્યાની ઉંમર 35 વર્ષ હોવાથી તે કદાચ લાંબા ગાળાનો વિકલ્પ ન બની શકે. પરંતુ, તેને ટૂંકા ગાળા માટે કેપ્ટન્સી સોંપીને તેની નીચે તિલક વર્મા જેવા યુવા ખેલાડીઓને તૈયાર કરી શકાય છે.

રોહિત શર્માનો વિકલ્પ હજુ પણ ખુલ્લો?

જોકે મેનેજમેન્ટ પાસે રોહિત શર્માને ફરી કેપ્ટન બનાવવાનો વિકલ્પ છે, પરંતુ ટીમ હવે ભવિષ્ય તરફ જોઈ રહી હોય તેવું લાગે છે. હવે જોવાનું એ રહેશે કે IPL 2026 ના અંતે મુંબઈ ઈન્ડિયન્સ હાર્દિક પંડ્યા પર ભરોસો જાળવી રાખે છે કે પછી નવા સુકાનીની જાહેરાત કરે છે.