પાકિસ્તાન વધતી મોંઘવારીનો સામનો કરી રહ્યું છે, જેની અસર હવે તેમના રસ્તાઓ પર પણ જોવા મળી રહી છે. પીઓકેમાં વધતી મોંઘવારીને કારણે લોકોનો ગુસ્સો સરકાર સામે ફાટી નીકળ્યો છે. વિવિધ સ્થળોએ વિરોધ પ્રદર્શનો થઈ રહ્યા છે, પોલીસ સાથે ઘર્ષણ અને પથ્થરમારાની ઘટનાઓ પ્રકાશમાં આવી છે. જો કે, મોટી વાત એ છે કે PoKમાં થઈ રહેલા આ પ્રદર્શનોમાં ભારતીય તિરંગો પણ દેખાઈ રહ્યો છે. તમને જણાવી દઈએ કે, જોઈન્ટ અવામી એક્શન કમિટીએ 11મી મેના રોજ એટલે કે શનિવારે પીઓકેમાં મોંઘવારી વિરુદ્ધ પીઓકેની એસેમ્બલી બહાર વિરોધ પ્રદર્શનનું આહ્વાન કર્યું હતું.
જે બાદ PoKમાં કલમ 144 લાગુ કરવામાં આવી છે. જેથી લોકો ઘરની બહાર ન નીકળે. જેના કારણે શુક્રવારે જ સ્થાનિક લોકોનો ગુસ્સો ફાટી નીકળ્યો હતો અને રાજધાની મુઝફ્ફરાબાદ, મીરપુર અને દડિયાલ જેવા વિસ્તારોમાં મોટી સંખ્યામાં લોકો રસ્તા પર ઉતરી આવ્યા હતા. ભીડના હાથમાં PoK અને ભારતીય રાષ્ટ્રધ્વજ જોવા મળ્યા હતા.
પીઓકેમાં વધતી મોંઘવારીથી લોકો ગુસ્સામાં છે અને મોંઘવારી વિરુદ્ધ પીઓકેમાં વિરોધ પ્રદર્શન થઈ રહ્યા છે. પેટ્રોલ, ડીઝલ અને અન્ય આવશ્યક ચીજવસ્તુઓના ભાવ આસમાને છે. ખાદ્યપદાર્થો પણ ચીનથી આયાત કરવામાં આવે છે. જેના કારણે સમિતિએ રાજ્યમાં દેખાવો કરવાની જાહેરાત કરી હતી.
પાકિસ્તાન દ્વારા લાદવામાં આવેલા કર અને વધતી કિંમતોને લઈને શનિવાર (મે 11) માટે વિરોધનું આયોજન કરવામાં આવ્યું હતું, પરંતુ વધારાના દળોની તૈનાતી અને 70 કાર્યકરોની ધરપકડથી લોકો ગુસ્સે થયા અને તેઓ શુક્રવારે જ રસ્તા પર ઉતરી આવ્યા. પ્રદર્શનકારીઓએ કથિત રીતે સુરક્ષાકર્મીઓ પર પથ્થરમારો કર્યો અને તેમની સાથે ઘર્ષણ કર્યું હતું.
પાકિસ્તાની મીડિયા અનુસાર, જમ્મુ-કાશ્મીર જોઈન્ટ અવામી એક્શન કમિટી દ્વારા જાહેર કરાયેલ 'લોંગ માર્ચ'ને રોકવા માટે પોલીસે સિત્તેર કાર્યકરોની અટકાયત કરી છે. મીડિયા અહેવાલો અનુસાર, પોલીસે વિરોધ કરી રહેલા ભીડને વિખેરવા માટે ટીયર ગેસના શેલ પણ છોડ્યા હતા, જેમાંથી કેટલાક નજીકની શાળામાં પડ્યા હતા અને ઘણી છોકરીઓ ઘાયલ થઈ હતી.
એક ખાનગી ન્યુઝ ચેનલના રિપોર્ટ અનુસાર, હાલમાં પંજાબ પ્રાંતના ફ્રન્ટ કોર્પ્સ, રેન્જર્સ અને ક્વિક રિસ્પોન્સ ફોર્સ (QRF)ના સૈનિકો વિસ્તારની સડકો પર છે. ગુરુવારે વહેલી સવારે, મુઝફ્ફરાબાદમાં પોલીસે વેપારી નેતા શૌકત નવાઝ મીરના ઘર તેમજ એક્શન કમિટીના અન્ય કેટલાક લોકોના ઘરો પર દરોડા પાડ્યા હતા.
પાકિસ્તાનીઓ કમરતોડ ફુગાવા સાથે સંઘર્ષ કરી રહ્યા છે, જે 3 બિલિયન ડોલરના નાણાકીય સહાય પેકેજને મંજૂર કરતી વખતે ઇન્ટરનેશનલ મોનેટરી ફંડ (IMF) દ્વારા લાદવામાં આવેલી કડક શરતોને કારણે પરિસ્થિતિ વધુ ખરાબ થઈ છે. વિજળીના દરમાં વધારાને કારણે સમસ્યાઓ વધી છે અને પાકિસ્તાનમાં લોકોને રસ્તા પર ઉતરવાની ફરજ પડી છે.