રિંકુ સિંહે મોટી તક ગુમાવી, રોહિત-અગરકરને ‘યોગ્ય જવાબ’ આપી શક્યો નહીં
છેલ્લા એક વર્ષમાં IPLમાં કોલકાતા નાઈટ રાઈડર્સ અને ઈન્ટરનેશનલમાં ટીમ ઈન્ડિયા માટે T20 ક્રિકેટમાં જોરદાર પ્રદર્શન કરવા છતાં, રિંકુ સિંહને T20 વર્લ્ડ કપ માટે 15 ખેલાડીઓમાં સ્થાન મળી શક્યું નથી. તેનો શુભમન ગિલ સહિત 4 રિઝર્વ ખેલાડીઓમાં સમાવેશ કરવામાં આવ્યો છે. આજે મુંબઈ સામે ટીમ ઈન્ડિયાના કેપ્ટન રોહિત શર્મા સામે સારું પ્રદર્શન કરી પોતાનો દાવો મજબૂત કરવાની રિંકુ પાસે સારી તક હતી, પરંતુ તે નિષ્ફળ રહ્યો હતો.
જ્યારથી ભારતીય ક્રિકેટ ટીમની T20 વર્લ્ડ કપ માટે પસંદગી થઈ છે, ત્યારથી યુવા બેટ્સમેન રિંકુ સિંહને તેમાં સ્થાન ન મળતા દરેક લોકો નારાજ છે. BCCIની પસંદગી સમિતિએ 15 ખેલાડીઓની જાહેરાત કરી હતી પરંતુ પ્રબળ દાવેદાર હોવા છતાં રિંકુની પસંદગી કરવામાં આવી ન હતી.
જો કે IPL 2024માં તેનું અત્યાર સુધીનું પ્રદર્શન તેની પાછળનું કારણ માનવામાં આવતું હતું, પરંતુ મુખ્ય પસંદગીકાર અજીત અગરકરે આ અંગે સ્પષ્ટતા કરી હતી અને કહ્યું હતું કે આમાં રિંકુની ભૂલ નથી પરંતુ ટીમનું કોમ્બિનેશન એવું બની રહ્યું હતું કે રિંકુનો સમાવેશ ન થઈ શક્યો.
રિંકુને ચાર રિઝર્વ ખેલાડીઓમાં ચોક્કસપણે સ્થાન મળ્યું હોવા છતાં, રિંકુ પાસે હજુ પણ વર્લ્ડ કપની શરૂઆત પહેલા પોતાનો દાવો વધુ મજબૂત કરવાની તક હતી. તેને વાનખેડે સ્ટેડિયમમાં કેપ્ટન રોહિત શર્મા અને મુખ્ય પસંદગીકાર અજીત અગરકરની સામે આ તક મળી હતી, પરંતુ તેણે તે તક ગુમાવી દીધી હતી.
હકીકતમાં, 30 એપ્રિલે ટીમની જાહેરાત થયા બાદ, 3 મેના રોજ IPL 2024માં કોલકાતા નાઈટ રાઈડર્સ અને મુંબઈ ઈન્ડિયન્સ વચ્ચે ટક્કર થઈ હતી, જેમાં KKRનો ટોપ ઓર્ડર ખરાબ રીતે નિષ્ફળ ગયો હતો અને માત્ર 43 રનમાં 4 વિકેટ પડી ગઈ હતી. ત્યારબાદ રિંકુ મેદાનમાં આવ્યો.
હવે રિંકુ પાસે એક જોરદાર ઈનિંગ રમીને ટીમને આવી સ્થિતિમાંથી બહાર કાઢવાની અને કેપ્ટન અને ચીફ સિલેક્ટરને મેસેજ આપવાની તક હતી, પરંતુ રિંકુ એવું કરી શક્યો નહીં. તે 8 બોલમાં માત્ર 9 રન બનાવીને આઉટ થયો હતો અને ટીમ મેનેજમેન્ટને જવાબ આપવામાં નિષ્ફળ રહ્યો હતો.
Published On - 11:34 pm, Fri, 3 May 24