Constitution day : બંધારણના 75 વર્ષ પૂર્ણ, રાષ્ટ્રપતિ દ્રૌપદી મુર્મુ આજે સંસદના બંને ગૃહોને સંબોધશે, બહાર પડશે સિક્કા અને ટિકિટ
Constitution day : રાષ્ટ્રપતિ દ્રૌપદી મુર્મુ આજે 'બંધારણ દિવસ' પર જૂની સંસદના સેન્ટ્રલ હોલમાં બંને ગૃહોના સભ્યોને સંબોધિત કરશે. આ સાથે વર્ષભરના કાર્યક્રમો શરૂ થશે. સંસદીય બાબતોના કાર્ય મંત્રી કિરેન રિજિજુએ કહ્યું કે, વર્ષભરની ઉજવણીની ટેગલાઇન 'આપણું બંધારણ, અમારું સ્વાભિમાન' હશે.
આજે બંધારણ દિવસ છે અને દેશ બંધારણની 75મી વર્ષગાંઠની ઉજવણી કરી રહ્યો છે. રાષ્ટ્રપતિ દ્રૌપદી મુર્મુ જૂની સંસદના સેન્ટ્રલ હોલમાં બંને ગૃહોના સભ્યોને સંબોધિત કરશે. આ સાથે ભારતના બંધારણને અપનાવવાના 75 વર્ષ પૂરા થયાની યાદમાં વર્ષભરની ઉજવણીનો પ્રારંભ થશે. ઉપરાષ્ટ્રપતિ અને રાજ્યસભાના અધ્યક્ષ પણ બંને ગૃહોના સભ્યોને સંબોધિત કરશે. લોકસભા સ્પીકર ઓમ બિરલા સ્વાગત પ્રવચન આપશે.
ટૂંકી ફિલ્મ પણ બતાવવામાં આવશે
આ પ્રસંગે ભારતીય બંધારણની ખુબીઓ, તેના નિર્માણ અને ઐતિહાસિક સફરને લગતી ટૂંકી ફિલ્મ પણ બતાવવામાં આવશે. સંસદીય બાબતોના પ્રધાન કિરેન રિજિજુએ કહ્યું કે, વર્ષભરની ઉજવણીની ટેગલાઇન ‘આપણું બંધારણ, અમારું સ્વાભિમાન’ હશે. રિજિજુએ કહ્યું કે રાષ્ટ્રપતિની સાથે ભારત અને વિદેશના લોકો પણ બંધારણની પ્રસ્તાવના વાંચશે.
26 જાન્યુઆરી 1950 ના રોજ બંધારણ લાગુ કરવામાં આવ્યું
બંધારણ સભાએ 26 નવેમ્બર 1949 ના રોજ બંધારણ સ્વીકાર્યું. બાદમાં તેને 26 જાન્યુઆરી 1950ના રોજ લાગુ કરવામાં આવ્યો હતો. સામાજિક ન્યાય અને અધિકારિતા મંત્રાલયે 19 નવેમ્બર 2015ના રોજ એક નોટિફિકેશન બહાર પાડ્યું હતું. એવું કહેવામાં આવ્યું હતું કે, 26 નવેમ્બરને દર વર્ષે ‘બંધારણ દિવસ’ તરીકે ઉજવવામાં આવશે. તેનો હેતુ નાગરિકોમાં બંધારણીય મૂલ્યોને પ્રોત્સાહન આપવાના માર્ગ તરીકે ઉજવવાનો છે.
ક્યા કાર્યક્રમો યોજાશે?
- બંધારણની 75મી વર્ષગાંઠને સમર્પિત એક સ્મારક સિક્કો અને સ્ટેમ્પ જાહેર કરવામાં આવશે.
- ‘મેકિંગ ઓફ ધ કોન્સ્ટિટ્યુશન ઓફ ઈન્ડિયા : અ ગ્લિમ્પ્સ’ અને ‘મેકિંગ ઓફ ધ કોન્સ્ટિટ્યુશન ઓફ ઈન્ડિયા એન્ડ ઈટ્સ ગ્લોરીયસ જર્ની’ નામના પુસ્તકોનું વિમોચન કરવામાં આવશે.
- ભારતના બંધારણની કળાને સમર્પિત પુસ્તિકાનું વિમોચન કરવામાં આવશે.
- ભારતના બંધારણની કોપી સંસ્કૃતમાં જાહેર કરવામાં આવશે.
- મૈથિલીમાં ભારતના બંધારણની કોપી જાહેર કરવામાં આવશે.
આ કાર્યક્રમમાં ઉપરાષ્ટ્રપતિ અને રાજ્યસભાના અધ્યક્ષ જગદીપ ધનખર ઉપરાંત વડાપ્રધાન નરેન્દ્ર મોદી, લોકસભા અધ્યક્ષ ઓમ બિરલા, કેન્દ્રીય મંત્રીઓ, સંસદ સભ્યો અને અન્ય મહાનુભાવો હાજર રહેશે. સેન્ટ્રલ હોલ ઉપરાંત રાજ્યો અને કેન્દ્રશાસિત પ્રદેશોમાં રાજ્યપાલ, લેફ્ટનન્ટ ગવર્નર અને મુખ્યમંત્રીઓના વિશેષ કાર્યક્રમો હશે.
સ્વાભિમાન યાત્રા કાઢવામાં આવશે
કેન્દ્રીય મંત્રી રિજિજુએ કહ્યું કે, બંધારણના નિર્માણમાં બીઆર આંબેડકરના યોગદાનનો પ્રચાર કરવા માટે પંચાયતોને આગામી વર્ષે 14 એપ્રિલથી 28 એપ્રિલ સુધી સંવિધાન સ્વાભિમાન યાત્રાનું આયોજન કરવા માટે કહેવામાં આવ્યું છે. આ યાત્રાઓનું આયોજન SC/ST વસ્તીની ઊંચી ગીચતા ધરાવતા ગામોમાં અને દરેક પંચાયતના મુખ્ય વિસ્તારોમાં કરવામાં આવશે.
