મોદી કેબિનેટે તેની બેઠકમાં પ્રધાનમંત્રી આવાસ યોજના (PMAY) હેઠળ ગ્રામીણ અને શહેરી ગરીબો માટે 3 કરોડ ઘર બનાવવાની યોજનાને મંજૂરી આપી છે. આ નિર્ણય નવી નરેન્દ્ર મોદી સરકારની પ્રથમ બેઠકમાં લેવામાં આવ્યો હતો જે તેમના નિવાસસ્થાન 7 લોક કલ્યાણ માર્ગ પર યોજાઈ હતી.
રાષ્ટ્રપતિ ભવનમાં શપથ ગ્રહણ સમારોહમાં શપથ લીધાના એક દિવસ બાદ નવનિયુક્ત મંત્રીઓ વડાપ્રધાનના નિવાસસ્થાને પહોંચ્યા હતા અને બેઠકમાં હાજરી આપી હતી. પ્રધાનમંત્રી આવાસ યોજના હેઠળ છેલ્લા 10 વર્ષમાં ગરીબ પરિવારો માટે કુલ 4.21 કરોડ મકાનો પૂર્ણ કરવામાં આવ્યા છે.
પ્રધાનમંત્રી આવાસ યોજના એ ભારત સરકારનો સામાજિક કલ્યાણ માટેનો મુખ્ય કાર્યક્રમ છે.આ યોજનાને વર્ષ 2015માં વડાપ્રધાન નરેન્દ્ર મોદીએ લોન્ચ કર્યું હતું. વચગાળાના બજેટ 2024માં નાણામંત્રીએ જાહેરાત કરી હતી કે આગામી 5 વર્ષમાં 2 કરોડ વધુ મકાનો બનાવવામાં આવશે. આ યોજના હેઠળ સરકાર 3 કરોડ મકાનોના લક્ષ્યાંકને હાંસલ કરવાની નજીક છે.
પ્રધાનમંત્રી આવાસ યોજના સમાજના નબળા વર્ગો, ઓછી આવક ધરાવતા વર્ગના લોકો, શહેરી ગરીબો અને ગ્રામીણ ગરીબોને ઓછી કિંમતે મકાનો આપવાના ઉદ્દેશ્ય સાથે શરૂ કરવામાં આવી હતી. આ યોજનામાં પોષણક્ષમ ભાવે લગભગ 20 મિલિયન મકાનોનું નિર્માણ સામેલ છે. બજેટ 2023માં પ્રધાનમંત્રી આવાસ યોજના માટેનો ખર્ચ 66 ટકા વધીને રૂપિયા 79,000 કરોડથી વધુ થયો હતો.
આર્થિક રીતે નબળા વર્ગો જેમાં ઓછી આવક જૂથ (LIG), મધ્યમ આવક જૂથ (MIG) અને EWSનો સમાવેશ થાય છે તે તમામને આવાસ યોજના માટે લાભાર્થી ગણવામાં આવે છે. EWS માટે વાર્ષિક આવક મર્યાદા 3 લાખ રૂપિયા, LIG રેન્જ 3 થી 6 લાખ રૂપિયા અને MIG રેન્જ 6 થી 18 લાખ રૂપિયા છે.